پاکستانی پوج ءَ لَس آبادی ءِ سر ءَ بمباری ءَ چہ مسیت ءَ تاوان، شھریانی بیرانی ءِ ھلاپ ءَ شھر بند-
گیشیں ھالانی رِد ءَ بلوچستان ءِ دمگ مستونگ ءِ تھسیل کھڈکوچہ ءَ پاکستانی پوج ءِ نیمگ ءَ چہ آپریشن ءِ میان ءَ لس آبادی شیلنگ ءِ نشانگ کتگ اَنت، چریشی ءِ آسر ءَ شھری ءَ بیرانی ءَ ھال سر بیتگ-
بُرزی شیلنگ ءِ میان ءَ کھڈکوچہ ءَ دینی مدرسہ ءَ سک تاوان رس اِتگ- وھدے کہ قرآن مجید ءُ دگہ مزھبی کتاباں ھم تاوان رس اِتگ-
مستونگ آپریشن ءُ دینی مدرسہ ءَ تاوان رسگ ءِ ھلاپ ءَ مروچی شھر ءَ سرجمی ءَ شٹر ڈاؤن ہڑتال کنگ بیتگ، چریشی ءِ سوب ءَ سرجمیں کار ءُ باز بُنجاہ ءُ دکان بند بیتگ اَنت، وھدے کہ شھریاں ھڑتال ءَ جوانیں وڑے ءَ بھر زرتگ-
وئیل ءِ ھلاپ ءَ شھریاں گم ءُ زھری درشان اِتگ-
دمگی اِھوالکار ءِ رِد ءَ شیلنگ کساس یک کلاکے ءَ تاں برجاہ بیتگ، چریشی ءِ سوب مسیت ءُ مدرسہ ءِ ماڑی ءَ تاوان رس اِتگ، دمگ ءِ مردمانی گوشگ اِنت کہ شیلنگ ءَ میان ءَ مسیت ءَ ھستیں قرآن پاک ءَ ھم تاوان رس اِتگ-
زانگ بہ بیت کہ دمگ ءَ بلوچ لبریشن آرمی ءَ بازیں بساں چہ ھمگرنچ پاکستانی پوج ءِ کاروان اُرش ءِ نشانگ کتگ، گل ءِ رِد ءَ اے کاروائی ءَ زورگریں پوج ءِ چل ءُ پنچ ءَ چہ گیش کارندہ مرتگ ءُ درزنانی ٹپی بیتگ اَنت-
بلوچ لبریشن آرمی ءِ اُرش ءَ پد پاکستانی پوج ءَ بُرزی آپریشن بندات کنان ءَ دمگی آبادی ءِ سر ءَ شیلنگ کتگ، چریشی ءَ چہ مدرسہ ءُ دمگی آبادی ءِ لوگاں تاوان رس اِتگ، وھدے کہ شھریانی ٹپی ءُ بیرانی ھال ھم دیم ءَ اتکگ-