سلاہ بندیں مردماں ٹریلر گاڑی یے سوتکگ-
نوشکی ءِ دمگ کچکی ءَ شال ءُ تپتان ءِ مزن شھدگ ءِ سر ءَ سلاہ بندیں مردماں ٹریلر گاڑی یے آس داتگ کہ ایشی ءِ سبب ءَ ٹرک سُتکگ ءُ تباہ بوتگ۔ سلاہ بندیں مردماں ڈرائیور ءُ کیلنڈر یلہ داتگ انت۔
یات بہ بیت کہ سرجمیں بلوچستان ءَ بلوچ آجوئی لوٹوکیں مردمانی نیمگ ءَ مڈی بروکیں ٹرک مزنیں کچے ءَ نشانگ جوڑ کنگ بوگ ءَ اَنت، ھمے وڑ ھمے وھد ءَ سلاہ بندیں مردمانی رکینگ ءِ ھاتر ءَ پھریزی ءَ ٹرکانی واستا ھواریں سیکیورٹی پورسز ھم نشانگ کنگ بوگ ءَ انت-
بلوچستان ءَ چہ اشکران ھوار ءُ دگہ مڈی سڑک ءِ وسیلگ ءَ پنجاب ءُ پاکستان ءِ دگہ مزنیں شھراں سر کنگ بنت۔ انوگیں امریکا ءُ ایران ءِ جیڑھ ءُ جنجال ءُ آبنائے ہرمز ءِ بند کنگ ءِ سوب ءَ بلوچستان ءِ راہ ءَ تیل ءُ ایل این جی ءِ بارو ءَ پنجاب ءَ سر کنگ ءِ امل ھم برجاہ اِنت کہ بلوچ آجوئی لوٹوکیں اُرشاں پد سک باز سانمند کتگ۔
پنجاب ءَ فیکٹری ءُ مِل ءِ واھنداں یک پریس کانفرنسے ءِ تہ ءَ گْوشتگ کہ بلوچستان ءَ ٹرکانی نشانگ جوڑ کنگ ءَ پد آیانی کاروبار ھم تاوان بیتگ ءُ ھمے وھد ءَ آیاں چہ سرکار ءَ امن ءُ ایمنی ءِ ستک کنگ ءُ ایمنی ءِ پُجارینگ ءِ ھم لوٹ کرتگ ۔