سربوتگیں ھالانی رد ءَ گوادر ءِ دمگ پسنی شادیکور ءَ سیکیورٹی ءِ نام ءَ مزنیں کچے ءَ مردم پہ زور در پہ در کنگ بوگ ءَ انت ۔ چریشی ءِ سوب ءَ زمینداراں مزنیں کچے ءَ تاوان ءِ گمان انت ۔
دمگی اھوالکارانی رد ءَ کساس پنچ ھزار مھلوک ءَ وتی لوگ ءُ کشت ءُ کشار یل داتگ ءُ پسنی ءَ اتکگ انت ۔
اھوالکارانی رد ءَ گوادر ءُ کیچ ءِ تہ ءَ شادی کئور مزنیں کشت ءُ کشاری دمگ ءِزانگ بیت ، کہ اودا ھمک سال کروڈاں کلدار ءِ ھساب ءَ کشار در کئیت ۔ اے دمگ ءَ کساس 10 ھزار ایکڑ زمین ءِ سرا کشت ءُ کشاری کنگ بیت کہ اودا کیٹک ، تیجگ ، ناہ ، کنر ، ٹماٹر ، پل گوبی ، گزرک ، ءُ سبزی ءِ درچک رد ایت ۔
ھمے گوشگ بوگ ءَ انت کہ شادی کئور ءَ ھمک سال کساس بیست ھزار ءِ کیٹگ ءُ تیجگ کراچی ءُ بلوچستان ءِ ایندگہ ھندانی منڈیاں بھا بیت وھدیکہ دو سے کروڈ ءِ ایندگہ سبزی درکئیت ۔
دمگی دھکانکارانی گوشگ انت دمگ ءِ تہ ءَ 80 درسد مردم ھمے کشت ءُ کشاری ءَ بندوک انت وھدیکہ ھنو سبزی ، ناہ ءُ ایندگہ سبزی ھم تیار انت ۔ آیانی رد ءَ درآیگ ءِ سوب ءَ اشانی چار ءُ گزار نہ بیت ءُ تنیگ بنت چریشی ءَ کروڈاں کلدار ءِ تاوان بوت کنت ۔
دمگی اھوالکارانی رد ءَ لھتے روچ ساری گاڑیاں سواریں سلاہ بندیں مردم اتکگ ھمدا تر اتگ انت ءُ مردم بیھار داتگ انت کہ ادا چہ بہ لڈ ایت ءُبرو ایت چریشی ءَ بازیں کھول ءِ در اتکگ ءُ شتگ ۔ بلے سرکار ءِ نیمگ ءَ ھچ وڈیں گپ جنگ بوگ ءَ نہ انت ۔
سانمندیں زمینداراں چہ سرکار ءَ لوٹ کتگ کہ مارا کم چہ کم اے تیاریں کشار ءِ چنگ ءِ موہ دئیگ بہ بیت پرچاکہ آیاں بازیں زر ءِ ھرچ کتگ ۔
دومی نیمگ ءَ نوشکی ءَ بید جار ءَ کرفیو جنگ بوتگ ۔
پاکستانی پوج ءَ نوشکی ءِ پترگ ءُ درآیگ ءِ درسیں راہ ءُ در بند کتگ انت ۔ دمگی مردمانی رد ءِ بازار ءِ اناگتی بند کنگ ءِ سوب ءَ باپاری ءُ مھلوک سک باز تکانسر انت.
زانگ بہ بیت چدوساری زھری ءُ مشکے ءَ ھم مھلوک ءَ کرفیو ءِ دیمپانی کتگ وھدیکہ ھپتگ ءِ بیت جیونی پانوان ءَ ھم پاکستانی پوج ءَ راہ ءُ در بند کتگ انت چریشی ءَ مھلوک ءِ سرا ڈکالی ءِ اتکگ ۔