بلوچستان ءِ جتاجتائیں دمگاں پاکستانی پوج ءِ سر ءَ اُرش، پوج ءِ تیرگواری ءَ چہ یک مردمے بیران

بلوچستان ءِ جتاجتائیں دمگ مستونگ، جھاؤ ءُ کلات ءَ پاکستانی پوج ءِ سر ءَ سلاہ بندیں مردماں اُرش کتگ ءُ پاکستانی پوج ءِ تیرگواری ءَ چہ یک مردمے بیران بیتگ-

گیشیں ھالانی رِد ءَ مستونگ ءِ دمگ کھڈکوچہ ءَ پاکستانی پوج ءِ کاروان ءِ سر ءَ مزنیں کچے ءَ سلاہ بنداں اُرش کتگ-

دمگی اِھوالکار ءِ رِد ءَ پاکستانی پوج ءِ یک کاروانے بُنجاھی شال – کراچی شھدگ سر ءَ گرو ءِ ھند ءِ سر ءَ نشانگ کتگ ، اِھوالکار ءَ ٹاہ داتگ کہ کاروان ءَ ھوار بساں چوٹیاں رؤکیں پوجی کارندہ سوار بیتگ اَنت کہ آ اُرش ءِ نشانگ کنگ بیتگ اَنت-

ھالانی رِد ءَ اُرش ءِ میان ءَ بازیں بس ءُ دگہ گاڑی، آیانی تہ ءَ بکتر بند گاڑی ھم ھوار بیتگ اَنت، کہ آیاں تاوان رس اِتگ-

اِھوالکار ءِ رِد ءَ کاروان ءَ ھوار دہ بساں چہ بازینے ءَ تاوان رس اِتگ، وھدے کہ چار بس ءُ دگہ گاڑی تچکی ءَ اُرش ءِ نشانگ بیتگ اَنت-

دمگی اِھوالکار ءِ نیمگ ءَ چہ اے ھم گوشگ بیگ ءَ اِنت اے بساں سوار چوٹی ءَ رؤکیں کارندہ مزنیں کچے ءَ بیران بیتگ اَنت ،بلے سرکاری نیمگ ءَ انگت ھچ وڑیں درشان دیم ءَ نیتکگ-

دیمتر ءَ گوشگ بیتگ کہ کاروان ءَ کمک دیگ ءِ ھاتر ءَ آؤکیں پوج ءِ کمک ھم بُنجاھی شھدگ سر ءَ مدینہ ھوٹل ءِ دمگ ءَ نشانگ کنگ بیتگ، اود ءَ دو گاڑیانی اُرش ءِ ٹاہ دیگ بیتگ-

اِھوالکار ءِ رِد ءَ میڑ تنی وھدے برجاہ ءَ اِنت ءُ تاں انوں پنچاہ ءَ گیش کارندھانی بیرانی گپ دیم ءَ نیتکگ، بلے تنی کچانی تچکیں ھال سر نہ بیتگ اَنت-

دمگ ءَ پوج ءِ گیشیں سُر ءُ پُر گندگ آیگ ءَ اِنت وھدے کہ ھیلی کاپٹرانی ھم ھال اِنت-

وئیل ءَ پد نواب غوث بخش رئیسانی میموریل ہسپتال مستونگ ءَ ایمرجنسی جنگ بیتگ ،وھدے کہ ھسپتال ءُ آئی ءِ کش ءُ گوراں سکیورٹی تُرند کنگ بیتگ-

شال -کراچی شھدگ ھرچ وڑیں گاڑیانی واستا بند کتگ-

ھمے وڑ کلات ءَ گوستگیں روچ ءَ ھسپتال ءَ برجاہ پاکستانی پوج ءِ سنگرانی تہ ءَ ھستیں پوجی کارندھانی سر ءَ سلاہ بنداں اُرش کتگ ءُ پوج ءَ جانی تاوان چست کنگ کپتگ-

دومی نیمگ ءَ جھاؤ ءِ دمگ گجرو کئور ءَ آپریشن ءِ نئیت کوھی دمگاں پُتروکیں پوجی کارندھانی سر ءَ تُرندیں اُرشے کتگ-

ھالانی رِد ءَ پاکستانی پوج ءُ سلاہ بندانی میان ءَ سُھب ءَ چہ میڑ برجاہ بیتگ –

اُرش ءِ آسر ءَ مزنیں کچے ءَ جانی تاوان ءِ گمان اِنت-

جھاؤ ءَ پاکستانی پوج ءِ سر ءَ سلاہ بندانی ترندیں اُرش ءَ پد پاکستانی پوج ءَ لَس آبادیانی سر ءَ تُرندیں تیرگواری ءُ مارٹر گولہ آس داتگ چریشی ءِ آسر ءَ یک ورنایے بیران ءُ بازینے ٹپی بیتگ اَنت-

بیران بیتگیں ورنا ءِ پجّار زاھد ءِ گنڈہ جھمنند کوٹو جھاؤ نام ءَ چہ بیتگ لاش پوج ءَ وتی ھمراھی ءَ برتگ گوں-