بلوچ ندکار ،آزمانکار ءُ اھوالکار جاوید ایم بی بلوچ ءِ نوکتریں کتابک ”سر درد ءِ کسہ “ شنگ بوتگ ۔
بلوچ ندکار ءَ وتی اے کتابک چہ وتی جند ءِ ترامجاہ ءَ شنگ کتگ ءُ ھمے گوشتگ کہ سر درد ءِ کِسّہ منی نبشتہ کُتگیں کتابُکے۔ اے ھمے موسم ءَ نبشتہ کُتگ کہ من وتی نادراھی ءَ پَد جنگ ءَ بوتگ آں ۔
کتابک ءِ شنگ کنان ءَ آئی ءَ وتی چاگردی ترامجاہ ءَ نبشتگ کہ بلوچستان ءَ جسمانی نادراھیانی ھمبراھی ءَ ذھنی نادراھی اوں اے نظام ءِ، کول ءِ مولانا ہدایت الرحمٰن ءِ اے ”لعنتی ایں نظام“ ءِ بکشاتگیں کَھر اَنت۔ مولانا آ وھد ءَ کہ اے نظام ءِ بھر نہ اَت آئی ءَ ترّاِت ءُ تران کُت کہ ”اے نظام ءِ سر ءَ لعنت، اگاں اے نظام ءِ جوڑ کنوک مُرتگ آئی ءِ قبر ءِ سر ءَ لعنت“۔ نوں چوشکہ وت ھمے نظام ءِ بھر اِنت گُڑا گُشگ ءَ اِنت کہ بلوچ مات ءُ پِت وتی چُکّاں چہ موبائل فون ءُ سوشل میڈیا ءَ دور بہ دار اَنت۔ من ھئیراناں گُڑا جماعت اسلامی ءِ نوک بندات کُتگیں ڈیجیٹل کورساں چے، سلیٹ ءُ تختی ءِ سر ءَ وانین اَنت؟
آ دیمتر ءَ نبشتہ کنت کہ اے سڑک ءِ سیاست ءَ اگاں یک بورڈے ءِ ءُ یک شھیدی ءِ نام ءِ چوکے گوں تو دارگ نہ بوت، چون بلوچ ءِ نوکیں پدریچ تئی راہ ءَ گِچین بہ کنت؟ ھئیر پہ اے نظام ءَ ”قابلِ اعتماد“ بوھگ ءَ راہ ءُ دَر ھست ءُ ارزان اَنت۔ اودا اوں ذھنی نادراھی اَنت۔ چہ ذھن ءَ گیش لاپی نادراھی اَنت بَلے ھما کہ پہ اے نظام ءَ ”ناقابِلِ اعتماد“ اَنت، آ بہ گِندئے ذھنی نادراھیانی آماچ بہ بنت۔
آ نبشتہ کنت کہ بَلے چون کن ئے کہ زندگ بوھگی اِنت۔۔۔۔۔ پمیشکہ پہ زندگی وت توجیل سازگی اِنت۔ ءُ اے ”سر درد ءِ کِسہ“ منی نادراھی ءُ آئی ءِ اِلاج اِنت۔۔۔۔
آئی ءَ گوشتگ کہ اے کتابک ءِ پہ اِشتاپی آن لائن شنگ کنگ ءِ مستریں مول ءُ مُراد ھمیش اِنت کہ یکے وَ بہ گندئے کسے وتی نادراھی ءَ شوھازاِت بہ کنت ءُ وت وتی اِلاج ءَ بہ کنت ءُ دومی اے ”لعنتی ایں نظام“ ءِ کھر کہ منی دماغ ءِ تہ ءَ گُک بوتگ اَنت من ھمیشاں نبشتہ کنگ ءِ جُھد کُتگ ءُ نوں منی دل ءِ سر ءَ گُک اَنت۔ اے کہ شنگ بنت، ھمے گُک بُج اَنت۔