بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں ھشت جولائی 2026 ءَ مستونگ ءِ دمگ دشت عمر ڈھور ءِ ھند ءِ سر ءَ برجاہ زورگریں پاکستانی پوج ءِ یک چیک پوسٹے ءِ سر ءَ اُرش کتگ دُژمن مزنیں ءُ وتکاریں سلاھاں چہ نشانگ کتگ- اے کاروائی ءِ آسر ءَ دو پوجی کارندہ جاہ پہ جاھی مرتگ ءُ بازین ئِے ٹپی بیتگ اَنت، وھدے کہ چاریگی ءِ مول ءُ مراد ءَ جتگیں کیمرہ ھم سرمچاراں تیرگواری کتگ ناکارہ کتگ اَنت-
جارکش ءَ گوشتگ اشی ءَ ساری شش جولائی 2026 ءَ بی ایل ایف ءِ سرمچاراں شال – کراچی بُنجاھی شھدگ (آر سی ڈی دگ) ءِ سر ءَ ھُزدار ءِ دمگ وڈہ ءَ، سنگری ءِ ھند سر ءَ سرمچارانی ھلاپ ءَ پیشگامی کنوکیں زورگریں پاکستانی پوج ءِ یک کاروانے سنگر گپتگ ءُ اُرش ءِ نشانگ کتگ- سے پوجی گاڑیاں ھمگرنچیں اے کاروان ءِ سر ءَ بیتگیں اُرش ءِ آسر ءَ سے پوجی کارمند جاہ پہ جاھی مرتگ ءُ بازین ئِے ٹپی بیتگ اَنت ،وھدے کہ گاڑیاں ھم سک تاوان رس اِتگ-
جارکش ءَ گْوشتگ ھمے روچ ءَ شش جولائی ءَ دگہ یک کاروائی ءَ بی ایل ایف ءِ سرمچاراں انٹیلیجنس سرپدی بُنیاد ءِ سر ءَ ھاران ءُ واشک ءِ میانی دمگ ءَ ھُرماگے ءَ یک ھاسیں آپریشنے کتگ- اے دمگ ءَ ریاست ءِ سروکی ءَ پُرکاریں کُشندہ ٹولی چیریں ھالانی بُنیاد ءَ سرمچاراں ھاران یکمچ سی پیم لنک دگ سر ءَ ناکہ بندی کتگ، اے میان ءَ شھدگ سر ءَ لَس راج ءُ مساپر گاڑیاں چہ زورانسری زر گرگ ءَ دلگوشیں کُشندہ ٹولی ءِ یک کارندھے دزگیر کتگ ءُ سلاہ برتگ ،آئی ءِ گیشیں جُست ءُ پرس ءِ ھاتر ءَ سرمچاراں بُنجل ءَ برتگ-
جارکش ءَ گوشتگ اشی ءَ اَبید پنچ جولائی 2026 ءَ سرمچاراں ھاران ءِ دمگ گْواش ءَ ھاران یکمچ سی پ
لنگ سر ءَ اداروکی چیک پوسٹے جوڑ کتگ ناکہ بندی کتگ- سرمچاراں یکشل ءَ سے ادار ءَ تاں شھدگ سر ءَ وتی دستیگ سرجمی ءَ برجاہ داشتگ ءُ اے میان ءَ اود ءَ چہ گْوزوکیں گاڑی سک پٹ ءُ پول کتگ اَنت- اے میان ءَ سرمچاراں مساپر بی ایل ایف ءِ مول ءُ مراد ءَ چہ ھمگرنچی ءَ ھم سرپدی داتگ ءُ آ زورگریں پوج ءِ سُر ءُ پُراں چہ دیر بیگ کڈن کتگ اَنت- سرجمیں پوجی مول ءِ سرجم کنگ ءَ پد سرمچار پہ سلامتی وتی اوتاکانی نیمگ ءَ شتگ اَنت-
گُڈی ءَ بی ایل ایف ءَ بیتگیں اُرشانی زمہ واری منّ اِتگ اَنت ءُ گوشتگ کہ زورگپتگیں بلوچستان ءِ وتواجھی ءَ تاں زورگریں پوج ءُ آئی ءِ کُمکارانی سر ءَ مئے اُرش گیش تُرندی ءَ برجاہ بنت-