شفیق مینگل: بلوچستان ءِ اڑوکیں کِرد
ٹی بی پی شونگال
ھشت جولائی ءِ نیمروچ ءَ بلوچستان ءِ مستریں دمگ ھزدار، شفیق مینگل ءِ جھمنندی جاہ ءِ سر ءَ شورواں پریں گاڑی ءِ تراک ءَ پد بازیں سلاہ بندیں اُرشکارانی ھواری ءَ کلاکانی کلاک داں برجاہ بیتگیں یک اُرشے بیتگ- اے اُرش ءِ زمہ واری بلوچ لبریشن آرمی( بی ایل اے) ءَ من ات اتگ- بی ایل اے ءِ رد ءَ اے کاروائی آئی ءِ فدائی بھرگ مجید بریگیڈ، ءَ سرجم کتگ- 2011 ءَ پد اے شفیق مینگل ءِ سر ءَ دومی مزنیں اُرش انت – ایشی ءَ پیش 30 دسمبر 2011 ءَ شال ءِ دمگ ارباب کرم خان دگ ءَ آئی ءِ جھمنندی جاہ ءَ ‘ فدائی’ اُرش ءِ نشانگ کتگ ات کہ بی ایل اے ءِ فدائی بھرگ ءِ اولی کاروائی بیتگ-
شفیق مینگل ھزدار ءِ جھمنند انت ءُ پاکستان ءِ گوستگیں بنجاھی پتر ءِ وزیر ءُ گوستگیں نگران سر وزیر بلوچستان ءِ زھگ انت- گوستگیں بازیں سالاں آئی ءِ نام بلوچستان ءَ درستاں مستریں اڑوکی کرداراں زانگ بیت انت- بلوچ راجدوستیں پاٹی، بیگواھیں مردمانی کھول ءُ انسانی ھکانی گل آئی ءِ سر ءَ سلاہ بندیں ٹولی ( ڈیتھ اسکواڈز) ءِ سروکی، زورانسری بیگواھی، لٹ ءُ کٹ ءُ سیاسی باسکانی کوش ءِ وڑیں ناوشیں بھتاماں جنگ ءَ انت ئِے- توتک ءَ مچانکی کبراں بہ گر داں شاہ نورانی درگاہ ءَ بیتگیں وتکش اُرش ، بی ایس او آزاد ءِ روانک ءِ سر ءَ تیرگواری، ھزدار یونیورسٹی ءَ دودمانی مراگش ءِ سر ءَ دزبمب اُرش، وڈھ ءَ لیویز کارندھانی سر ءَ اُرش ءُ آیانی بیرانی، چوشکہ میان اُستمانی ناشرکاری گلانی سرشونی کنگ ءِ وڑیں اڑوکی وئیل ھم شفیق مینگل ءِ نام دیم ءَ کیت انت-
بلے پاکستان ءِ پیپلز پاٹی ءَ ھمے زوتاں ھزدار ءِ ھورکیں جاہ ءَ آئی ءَ را وتی امیدوار نامزد کتگ- مھلوک ءِ ایراد ءَ ابید ھم یک دھشدے ءَ پاٹی ءِ ٹکٹ ءِ دیگ چوشکہ یک سیاسی پیسلھے نہ انت بلکیں بلوچستان ءِ مھلوک ءِ تچک ءَ کلوھے کہ آئی ءِ واھشت، سما ءُ سیاسی درچ ءَ ھاسیں پلامرزی گون نہ انت- اے دابیں شکداریں پیسلہ نا ایوک ءَ گچینکاری گامگیجانی سر ءَ شک ءِ نگاہ ءَ چارگ بنت بلکیں آئی ءَ ریاست، سیاسی پاٹی ءُ مھلوک ءِ میان ءَ ستک ءِ سر ءَ اڑوکی رنگے ءَ گندگ بیت انت-
شفیق مینگل ءِ نام بلوچ پھناتاں سکیں اڑوک ءُ بھتامانی ھواری ءَ گرگ بیت انت- گچینی رنگ ءَ بلوچ نسل کشی ءِ بھتام ءُ توتک ءِ مچانکی کبرانی جیڑہ ءَ آئی ءِ سیادی ءِ سبب ءَ بلوچ چاگرد ءِ نیمگ ءَ سکا ترندیں بگیر داریانی دیمپانی انت- بلوچ چاگرد اے دابیں کرداراں مچانگی زانت، گوستانکی جد ءُ جھد ءُ راجی لوٹانی ھلاپ نامین انت – ھمے واستا آئی ءَ یکشل ءَ مھلوک ءِ پژدر ءُ سیاسی ایوکی ءِ دیمپانی انت-
بلوچ مھلوک ءِ چَماں اے وڑیں مردم نا ایوک ءَ یک پردے ءِ جیڑہ نہ انت بلکیں یک مزنیں گوستانکی ءُ چاگردی جیڑھے ءِ بھر انت- ھمود ءَ انسانی ھک، پجار، انساپ ءُ گیرت ءُ ننگ ءِ وڑیں جیڑہ بنکی سنچ دار انت- ھمے سبب انت کہ شفیق مینگل ءِ وڑیں اڑوکی کردانی ھلاپ ءَ بلوچ چاگرد ءَ سکا ترندیں ناوشی ءِ زانگ بیت انت- آئی ءِ جاڑیگ بوگ بلوچستان ءِ ساکمی ءِ واستا سکیں ترسے زانگ بیت انت- مھلوک ءِ پلامرزی ءَ ابید کجام سیاسی ءُ چاگردی با وھدی سان ءِ سر ءَ ایر کنگ بیت-
بی ایل اے ءِ نیمگ ءَ شفیق مینگل ءَ ‘ گدارانی سروک’ ءِ پنام داتگ، چوشکہ اے گپ ءِ پدراھی ءَ کنت ءُ گمان جاڑیگ انت کہ آیوکیں وھداں آئی ءِ سر ءَ گیش ترند ءُ ھترناکیں اُرشانی دیمپانی کنگ کپ ایت-