فیفا ورلڈ کپ 2026 پری کورٹر فائنل ءَ مروچی ارجنٹینا ءُ مسر ءِ گوازی بوتگ کہ مسر ءَ جوانی ءَ گوازی کنان ءَ جھانی چمپئین ارجنٹینا ءِ دیم ءَ دو گول داتگ بلے کوارٹر فائنل ءَ سر بوگ ءَ سوبمند نہ بوتگ ءُ ارجنٹینا ءَ سے گول ءَ گوازی کٹ اتگ ۔ دوشی بوتگیں دومی گوازی سویزر لینڈ ءُ کولمبیا ءِ میان ءَ بوتگ کہ ھردو ٹیم دیمیگ بوتگ انت ۔ پیلانٹی شوٹ ءَ سویزرلینڈ ءَ گوازی کٹ اتگ ءُ کوارٹر فائنل ءَ سربوتگ ۔
دوشی بوتگیں مسر ءِ لیبیاں جوانی ءَ گوازی کنان ءَ ارجنٹینا ءِ دیم داشتگ ءُ گوازی ءِ اولی ھاپ ءَ 15 می منٹ ءَ مسر ءِ لیبی یاسر ابراھیم ہیڈر ءِ کمک ءَ یک گول ءِ داتگ کہ پدا اولی ھاپ ءِ گڈسر ءَ ھچ نیمگ ءَ گول دئیگ نہ بوتگ ۔ بلے گوازی ءِ 21 می منٹ ءَ میسی ءَ پیلانٹی شوٹ ءَ گول ءِ موکگ ءِ موہ رستگ بلے مسر ءِ گولی مصطفی ءَ جوانی ءَ گپتگ ۔ پدا پری کک موہ رستگ بلے آئی ءَ گول کت نہ کتگ ۔ جولیان ءُ الیکسیس میک ءَ ھم دو گول ءِ موہ رستگ بلے آیاں ھم گول کت نہ کتگ انت ۔
گوازی ءِ دومی ھاپ ءَ ھم مسر ءِ لیبیاں جوانی ءَ گوازی کنان ءَ جھانی چیمپئین ارجنٹینا ءِ دیم داشتگ مسر ءِلیبی مصطفیٰ زیکو ءَ 62می منٹ مسر ءِ نیمگ ءَ دومی گول داتگ بلے گوازی ءِ گڈی پانزدھیں منٹانی تہ ءَ ارجنٹینا ءَ گوازی مٹیں اتگ ءُ ارجنٹینا ءِ لیبی کرسٹیان رومرو ءَ گول ءِ داتگ پدا ھشتاد ءُ سیمی منٹ ءَ لیونل میسی ءَ دومی گول داتگ ءُ ھردو ٹیم دو دو گول ءَ دیمیگ بوتگ انت ۔ انجری ٹائم ءَ مسر ءَ پروش وارتگ ءُ ارجنٹینا ءَ باج بری ءِ گول ءِ داتگ ءُ وت ءَ کوارٹر فائنل ءَ سر کتگ ۔
زانگ بہ بیت اے رندی فیفا ورلڈ کپ ءَ دو ھنچیں ٹیم ءَ وت ءَ پری کوارٹر فائنل ءُ کوارٹر فائنل ءَ سرکتگ کہ چدوپیش آیاں پری کوارٹر فائنل ءَ سربوگ ءِ موہ نہ رستگ۔ بلے اے رندی مسر ءُ ناروے ءَ گوستانک مٹ کتگ ، کہ ناروے ءَ ٹوھیں ٹیم برازیل پروش داتگ ءُ وت ءَ کوارٹر فائنل ءَ سرکتگ وھدیکہ مسر ءَ وتی جھد برجاہ داشتگ بلے گوازی ءِ گڈسر ءَ ارجنٹینا ءِ دیم ءَ انجری ٹائم ءَ پروش وارتگ کوارٹر فائنل ءَ سربوت نہ بوتگ ۔ بلے مسر ءَ جھانی چیمپئن ارجنٹینا ءِ دیم مھکمی ءَ داشتگ ارجنٹینا ارزانی ءَ گوازی برگ ءَ نہ اشتگ ۔
دوشی بوتگیں دومی گوازی کولمبیا ءُ سویزر لینڈ ءَ میان ءَ بوتگ کہ ھردو ٹیم داں گوازی ءِ گڈسر ءَ مکابلہ بوتگ انت ۔ پیلانٹی شوٹ ءَ سویزر لینڈ 3-4 گول ءَ گوازی کٹ اتگ ءُ وتی کوارٹر فائنل ءَ سرکتگ ۔ سویزرلینڈ کوارٹر فائنل ءَ ارجنٹینا ءِ دیم ءَ گوازی کنت ۔