بلوچ یکجھتی کمیٹی ءِ رھشون سید بی بی شریف ءَ تربت پریس کلب ءَ پریس کانفرنس کنان ءَ گوشتگ گوستگیں شپ ءَ مھکمہ انسداد دھشتگردی ءَ آئی ءِ لوگ ءِ سر ءَ سَے رند ءَ چھاپہ جتگ ءُ لوگ ءِ دروازگ پروشتگ ءُ لوگ تاوان داتگ-
آئی ءَ گوشتگ بلوچ یکجھتی کمیٹی ءِ نیمگ ءَ ڈاکٹر ماہ رنگ بلوچ ءُ سبگت اللہ شاجی ءَ دیگ بیتگیں اُمر کیز ءِ ھلاپ ءَ تربت ءَ زھرشانی روانک ءِ جار پرینتگ ات چریشی ءَ پد آ لوگ ءَ دزگیر کنگ بیتگ ءُ سرجمیں روچے ءَ وومن تھانہ ءَ کید کنگ بیتگ – آئی ءِ رد ءَ گوستگیں شپ ءَ یل کنگ بیتگ ءُ یل بیگ ءَ پد نیم ساھت ءَ دوبر آ دزگیر کنگ ءِ ھال دیگ بیتگ-
سید بی بی ءَ گوشتگ یکشلیں دزگیری ءِ ترس ءَ کسان سالیں زھگ ترس آماچ بوتگ انت ءُ شپ ءَ آیاں لوگ یل کنگ کپتگ ءُ آئی ءِ رد ءَ کس ءَ جاہ نہ داتگ ءُ چریشی ءَ آ گوں وتی زھگانی ھمراھی ءَ وتی ھدامرزی ءِ لوگ واجہ ءِ کبر ءِ سریناں گوازینگ ءَ لاچار بوتگ-
آئی ءِ رد ءَ آئی ءِ نام پیش ءَ فورتھ شیڈول ءَ انت ءُ ھمک ھپتگ سی ٹی ڈی ءِ کارگس ءَ روگ ءَ انت ءُ یک سالے بیت من ھمک ھازری ءَ شتگ آں ایشی ءَ ابید آ ترسینگ بوگ ءَ انت-