ناکہ بندی ءِ وھد ءَ سلاہ بندیں مردماں مڈی بروکیں ٹرکانی ٹائر تیرگواری کتگ ءُ تراکینتگ اَنت۔
بلوچستان ءِ دمگ سبی ءِ ھند بختیار آباد ءِ نزیک ءَ بنجاھی شھدگ ءِ سر ءَ سلاہ بندیں مردماں ناکہ بندی کتگ ءُ گاڑی پٹ ءُ پول کتگ۔ ھمے وھد ءَ سلاھبنداں چہ بلوچستان ءَ مڈی باریں ٹرک داشتگ اَنت ءُ ٹرک پٹ ءُ پول ءَ پد ئاٹر تیرگواری کتگ ءُ تراکینتگ اَنت۔
بختیار آباد شاھدگ ءِ سر ءَ سلاہ بندیں مردمانی نیمگ ءَ بندش بازیں کلاکاں برجاہ بوتگ۔
زانگ بہ بیت کہ گوستگیں روچ ءَ سلاہ بندیں مردماں ھمے دمگ ءَ شاھدگ بند کتگ ءُ پاکستانی اُرد ءِ سامان بروکیں گاڑی نشانگ جوڑ کتگ اَنت۔ اے وئیل ءِ زمہ واری بلوچ آجوئی دوستیں بلوچ گل بلوچ ریپبلکن گارڈز ءَ زرتگ ات۔
بلے مرچی بوتگیں ناکہ بندی ءُ اُرشانی زمہ واری انگت ءَ ھچ گل ءَ نہ زرتگ انت۔
یات بہ بیت کہ بس مرچی نوشکی ءِ نزیک ءَ سلاہ بندیں اُرش کنوکاں مڈی باریں 60 ٹرک ءِ کاروان ءِ سر ءَ اُرش کتگ کہ اود ءَ سلاہ بندیں مردماں دہ بوزر گاڑی سوتکگ انت۔