بلوچستان ءِ دمگ نوشکی ءَ ناشناسیں سلاہ بندیں مردماں مڈی بروکیں گاڑیانی مزنیں کاروان ءِ سر ءَ اُرش کتگ کہ ایشی ءِ آسر ءَ کم چہ کم 10 بوزر گاڑی سوچگ بوتگ اَنت وھدیکہ تیر گواری ءِ وھد ءَ دگہ بازیں گاڑیانی ٹائر تراکینگ بیتگ اَنت۔
بنشون ءِ رد ءَ نوشکی ءِ دمگ مل ءَ 60 ءِ کساسی گاڑیانی کاروان نشانگ جوڑ کنگ بوتگ۔ ارش کنوکاں کاروان داشتگ ءُ گاڑیانی سر ءَ تیرگواری کتگ ءُ پد ءَ بازیں بوزر گاڑیانی سر ءَ تیرگواری کتگ کہ چہ ایشی ءَ آ سرجم ءَ سُتکگ ءُ ھاک بوتگ اَنت۔
چمدیستگیں مردمانی رد ءَ تیرگواری ءِ سبب ءَ بازیں گاڑیانی ٹائر تراکینگ بیتگ اَنت کہ ایشی ءَ چہ کاروان ءِ رؤگ ءُ آیگ ءِ سر ءَ سان کپتگ۔
بنداتی ھالانی رد ءَ اے وئیل ءَ مزنیں مالی تاوانے بوتگ بلے ھچ وڑیں جانی تاوان ءِپدری کنگ نہ بوتگ۔
زانگ بہ بیت گوستگیں روچاں بلوچستان ءِ جتاجتائیں دمگاں مڈی ءُ کمرشل سامان باریں گاڑی اے وڑیں اُرش ءِ آماچ بوتگ انت۔