بلوچستان ءِ راجی شھدگ سندھ ءُ پنجاب ءَ رؤکیں دگ سر ناکہ بندی ءُ ڈی آئی جی مھمان جاہ سر ءَ بیتگیں اُرش ءِ زمہ واری بی آر جی ءَ منّ اِتگ

بلوچ ریپبلکن گارڈز ءِ جارکش دوستین بلوچ ءَ شنگ کتگیں درشان ءِ تہ ءَ گْوشتگ کہ گوستگیں شپ ءَ ھپت ءَ چہ بگر شپ ءَ تاں بلوچ ریپبلکن گارڈز ءِ سرمچاراں زورگپتگیں بلوچستان ءِ راجی شھدگ شال ءَ چہ سندھ ءُ پنجاب ءَ رؤکیں دگ ڈھاڈر ءِ ھند سر ءَ سرجمی ءَ ناکہ بندی کتگ سرجمیں آؤکیں ءُ رؤکیں ھرچ وڑیں ٹرانسپورٹ ءِ سرجمی ءَ پٹ ءُ پول کتگ- اے پٹ ءُ پول میان ءَ لھتے ڈرائیور تُرس آماچ بیتگ اَنت وتی گاڑی تاچینگ ءِ جُھد کتگ، ھمے سوب ءَ آیانی سر ءَ تیرگواری کتگ-

جارکش ءَ گْوشتگ کہ راجی شھدگ سر ءَ سپر کنوکیں سرجمیں ٹرانسپورٹانی واھننداں گوشگ لوٹ ایں کہ آ وتی گاڑیانی ڈرائیوراں کڈن بہ کن اَنت کہ بلوچ راجی شھدگانی سر ءَ سپر ءِ میان ءَ وتی سرجمی ءَ پجّار ءُ گاڑی ءِ پٹ ءُ پول ءَ بدے اَنت اَبید تُرس ءُ ھترہ ءَ پہ ازت بہ رو اَنت- اگاں ناں آ وتی جان ءُ مال ءِ تاوان ءِ زمہ وار وت بنت-

جارکش ءَ گوشتگ ھمے شپ ءَ نُھ ءُ دہ ءِ میان ءَ سبی شھر ءَ ڈی آئی جی ءِ مھمان جاہ ءِ سر ءَ گرنیڈ لانچر ءَ بازیں گولھے آس داتگ – چریشی ءِ آسر ءَ مزنیں کچے ءَ مالی ءُ جانی تاوان ءِ ھال اِنت-

جارکش ءَ گوشتگ مئے گل بی آر جی اے سرجمیں کاروائیانی زمہ واری ءَ منّ اِیت ءُ اے وڑیں کاروائی بلوچستان ءِ وتواجھی ءَ تاں برجاہ بنت-