بلوچستان ءِ دمگ ھزدار ءِ دگند بلبل زہری ءَ سَے شمبے ءِ روچ ءَ پاکستانی لشکر ءَ مزنیں آپریشنے ءِ تہ ءَ دمگی سیاسی سروک ءُ یونین کونسل ءِ گچین بوتگیں باسک میر خلیل احمد موسیانی بیران بوتگ ءُ بازیں مردمانی دزگیر کنگ ءِ ھال دیم ءَ اتکگ انت۔
دمگی ءُ کھول ءِ مردمانی رد ءَ سھب ءَ دمگ ءِ سر ءَ ھیلی کاپٹر بال کنگ ءَ گندگ بوتگ اَنت ءُ پد ءَ پاکستانی لشکر ءِ ٹوھیں لشکرے کہ بکتر بندیں گاڑیانی ھواری ءَ بلبل زہری ءِ تہ ءَ اتکگ انت۔ دمگ ءَ تیرگواری ءُ پٹ ءُ پول ءِ کارروائی بازیں کلاکاں برجاہ بوتگ۔
دمگی مردمانی رد ءَ آپریشن ءِ وھد ءَ ھزدار ءِ پیسریگیں ڈسٹرکٹ ناظم موسیانی سردار نصیر احمد موسیانی ءِ لوگ ءَ ھم چھاپہ جنگ بوتگ کہ اود ءَ میر خلیل احمد موسیانی تیرگواری ءَ چہ بیران بوتگ۔ ھاندان ءِ گشگ اِنت کہ آ ٹپیگیں جاوراں گوں وت برگ بوتگ ءُ رند ءَ آئی ءِ بیرانی ءِ ھال شنگ بوتگ۔
بلوچستان نیشنل پارٹی ءَ وتی دمگی سروک میر خلیل احمد موسیانی ءِ ھزدار ءِ دمگ بلبل زہری ءَ کوش ءُ آئی ءِ لاش آئی ءِ لوگ ءِ مردماں نہ دیگ ءِ سکا ایرجنی کتگ۔ بیان ءِ تہ ءَ گیش گشگ بوتگ کہ آپریشن ءِ وھد ءَ بی این پی ءِ مرکزی ایگزیکٹو کمیٹی ءِ باسک ءُ پیسریگیں ڈسٹرکٹ ناظم خضدار سردار نصیر احمد موسیانی لٹ ءُ کٹ کنگ بوتگ وھدیکہ آئی ءِ کھول ءُ نزیکیں سیاداں ھوار بازیں مردم دزگیر کنگ بوتگ اَنت۔