بلوچستان ءُ کراچی ءَ پاکستانی پوج ءَ چار مردم آوار جتگ وھدے کہ دو بیگواھیں مردم یل کنگ بیتگ اَنت-
گیشیں ھالانی رِد ءَ ھزدار ءِ دمگ چہ زھری ءَ پاکستانی پوج ءِ آپریشن ، لوگانی سر ءَ بیڑ ءُ شھدگانی سر ءَ ناکہ بندی جتگ دمگی آبادی ءِ نیمگ ءَ رؤکیں دگ پہ گاڑیانی واستا بند کنگ ءِ ھال اِنت-
ھالانی رِد ءَ پاکستانی پوج ءَ سردار نصیر موسیانی آئی ءِ چُک زھری خان زورانسری بیگواہ کتگ وھدے کہ آئی ءِ یک چُکے ٹپی بیتگ-
دومی نیمگ ءَ وئیل ءِ ھلاپ ءَ بلبل ءِ ھند سر ءَ زالبولانی زھرشانی برجاہ-
اِھوالکار ءِ رِد ءَ پوج ءِ گیش کارندہ ءَ دمگ ءَ سر بیتگ اَنت وھدے کہ ھیلی کاپٹرانی ھم روگ ءُ آیگ برجاہ-
بی این پی ءَ گوشتگ کہ سیاسی سروک ءُ کارکنانی ھلاپ ءَ تاکت ءِ کارمرز ءُ آسری کاروائی ءِ دْرچ ءَ زوت بند بکنت- سردار نصیر احمد موسیانی، آئی ءِ چُک ءُ دگہ ھمراھانی دزگیری کابل ایرجنی ءُ کابل منّگ نہ بیت- اگاں ناں راجی رد ءُ بند ءَ بؤکیں جاورھالانی زمہ وار ھکومت ءُ ھمگرنچیں ادارھانی سر ءَ بیت- بلوچستان ءِ راج وتی سیاسی ، آئینی ءُ جمھوری ھکانی سر ءَ ھچ وڑیں ریارو ءَ نہ منّ ایں-
ھمے وڑ کیچ ءِ جھمنندے ھب چوکی ءِ دمگ دارو ھوٹل ءَ کار ءَ بار کنوکیں 37 سالی ئیں محمد حنیف ء سلیمان دوازدہ فروری 2026 ءِ شپ ءِ کساس دو ءَ سی ٹی ڈی کارندھاں چہ دارو ھوٹل، ھب چوکی ءَ آوار جتگ ءُ آئی ءِ درگت ءَ ھچ وڑیں گپ دیم ءَ نیتکگ-
ھمے وڑ کراچی ءِ دمگ چہ ملیر ءَ 45 سالی ئیں غلام قادر ء عبدالکریم سی ءُ یک مئی 2026 ءِ شپ ءِ کساس یک ءَ آئی ءِ لوگ ءَ چہ آئی ایس آئی، ایم آئی ءُ رینجرز کارندھاں آوار جتگ ءُ بیگواہ کتگ-
دومی نیمگ ءَ بلوچ اسٹوڈنٹس کونسل ملتان ءِ گوستگیں چیئرمین شعیب بنلگزئی 385 روچ ءَ تاں بیگواہ بیگ ءَ پد پہ سلامتی یل کنگ بیتگ- اِھوالکار ءِ رد ءَ آ گوستگیں سال ءَ کراچی ءِ دمگ. چہ گلشن اقبال ءَ آوار جنگ ءَ پد بیگواہ کتگ-
ھمے وڑ نوشکی ءِ دمگ کلی جمالدینی ءِ جھمنند عمیر احمد سمالانی ء میر احمد سمالانی ھم کساس چار ماہ ءَ بیگواھی ءَ پد پہ سلامتی وتی لوگ ءَ سر بیتگ آئی ءِ یل بیگ ءِ گپ کھول ءَ راست کتگ-