شھناز! کوھانی شیرزال
نبشتہ کار: رُژن بلوچ
دی بلوچستان پوسٹ
بلوچستان ھما دیار اِنت کہ آئی ءِ ماتاں وتی بچ لیلوھانی جاہ ءَ گِھگیری ءِ سوج داتگ اَنت ءُ آشوبی نازینکاں گوں واب گیتکگ اَنت۔ ھود ءِ جنکاں وتی منگلیکاں چہ گیش وتی ننگ ءُ ناموس، وپاداری ءُ آجوئی دوست داشتگ اَنت۔ آئی ءِ کوہ کرناں چہ بے توار اُوشتاتگ اَنت ءُ ھمے بے تواریں کوھانی سینگ ءَ یاگی اِیں جنگولانی ھزاراں کسہ کلّ اَنت۔ ھمے رِیکستگ ءُ اَبیتکیں کوھانی نیام ءَ یک توارے راج ءِ گوشاں کپت ءُ یک نوکیں نامے راجدپتر ءِ تاکانی سر ءَ نبشتہ کنگ بوت۔۔۔ آ نام اَت شھناز بلوچ۔
شھناز تھنا یک نامے نہ اِنت، بلکیں بلوچ سرڈگار ءِ ھما شیرزال اِنت کہ آئی ءَ تُرس ءِ سانکل سستگ اَنت ءُ گُلامی ءِ تھاریں شپاں آجوئی ءِ کندیل بلینتگ اَنت۔ آ ھما شیرزالانی وارس اِنت کہ آیاں زوراکی ءِ دیم ءَ سر جھل نہ کُتگ۔ شاری ءِ ھمّت، سمیہ ءِ وپاداری، ماھل ءِ دیمھونی، بانک کریمہ ءِ سما، زرینہ، یسمہ، ھوا، مریم، ھتم ناز ءِ کرد شھناز ءِ تھانگ ءَ ساہ زورگ ءَ اَنت۔
وھدے یک راجے گُلامی ءِ سانکلاں گوں بندوک بہ بیت گُڑا ھما سامراجی تاکت زالبولاں نزور، بے واک ءُ چاگردی چِست ءُ اِیراں چہ دُور دارگ ءِ کوشست ءَ کنت۔ نیکراہ، دودمان ءُ ننگ ءُ ناموس ءِ نام ءَ زالبولاں راجمانی سما ءَ چہ اَنچو زبھر کنت، کہ آ زوراکی ءِ بِگیر ءَ توار چست کُت مہ کن انت۔
بلوچستان ءِ ساچ ءَ وھدے گوکرت ءُ شوروھانی بوہ ءُ باس شنگ ءُ تالان بوت، وھدے بلوچ مات وتی زھگانی ودار ءَ زمین ءِ میار بوھان بوت اَنت۔۔۔ وھدے ھر گس ءِ دروازگانی دپ ءَ تُرس چو سپاھیگ ءَ میلانک بوت گُڑا شھناز ءَ بے توار بوھگ ءِ جاہ ءَ گھگیری ءِ نمیرانیں کِشک گچین کُت۔ آ وتی براتانی ھمکوپگی ءَ اُوشتات ءُ ھمے پیشداشت کہ بلوچ زالبول تھنا درد سگگ ءِ ھاتر ءَ ودی نہ بوتگ اَنت بلکیں آ زُلم ءُ زوراکیانی بگیر ءَ اُوشتگ ءُ جنگ کنگ ھم زان انت۔
آ کوھانی شیریں جنک اِنت، پمیشکا آئی ءِ ھوسلہ چو سیاھیجی مُھکمیں کوہ ءَ بُرز اِنت۔ آئی ءِ چمّانی تہ ءَ آجوئی ءِ واب ءُ گالوار ءَ آشوب ءِ توار جکسگ ءَ اِنت۔
شھناز ءَ زانتگ اَت، اگاں گُلامیں راجانی جنک سما ءُ زانشتی ھساب ءَ پاد بیاھنت گُڑا سامراج ءِ ایوان لرز اَنت۔ ھمے سوب اِنت آئی ءَ کتاباں چہ سما در بُرت ءُ توپک گچین کُت۔ آئی ءَ بلوچ جنک تُرس ءِ ساھگ ءَ چہ کش اِتنت ءُ ھوسلہ ءُ ھاٹیگ دات انت۔
گش انت لَھتیں کارست راجدپتر نہ وان انت، بلکیں وت راجدپتر جوڑ بنت۔ شھناز ھمے کارستاں چہ یک کارستے۔ آ ھما درستیں بلوچ شیرزالانی چیدگ اِنت کہ آیاں زُلم، جبر ءُ نہ انساپی ءِ بگیر ءَ مھکمی ءَ اُوشتاتگ اَنت۔
شیرزالیں شھناز ءِ کرد تھنا یک جنگولے ءِ نہ اِنت، بلکیں آ یک سرجمیں زرمبشت ئے، یک زندگیں چیدگے ءُ آ ھما رھشونیں کہ وتی مکسد ءِ سرجم کنگ ءَ ھر وڑیں سکّیانی دیم ءَ گوں ھمت ءُ دلیری ءَ اُوشتیت ءُ ھر وڑیں دیمھونی دیگ ءَ جاڑیگ بیت۔ آ وتی اَھد ءِ ھما چراگ اِنت کہ آھوکیں پدریچ ءَ نوکیں راھانی ڈس ءَ دنت۔
لبزانکی دُنیا ءِ تہ ءَ بازیں کارست وتی گواچن ءَ چہ گیش چیدگی دروشم ءَ زندگ ماننت۔ شھناز بلوچ راجی زرمبشت ءِ ھما کتاب اِنت کہ انگت نہ سرجم اِنت۔ آئی ءِ تاکدیم نوک نبشتہ بوھگ ءَ اَنت۔ اِشی ءِ گالانی معنا گوستانک ءِ دست ءَ اِنت۔ باند ءَ اِشی ءَ راجدپتر وت پدّر کنت کہ آھوکیں پدریچ شھناز ءَ کُجام سرنام ءَ دنت۔ بلے ما اِینچو زانیں کہ بلوچستان ءِ راجدپتر ءُ راجمانی باوست ءِ تہ ءَ آ یک جوانیں درورے جوڑ بوتگ۔
شھناز ءِ کسہ تھنا یک مردمے ءِ کسہ نہ اِنت، بلکیں یک زورگپتگیں دیارے ئے، یک پدریچے ئے ءُ یک زرمبشتے ئے کسہ اِنت۔ ھردیں تیاب ءَ چہ چِست بیتگیں گوات کوھاں امباز کن انت گُڑا بلوچ ءِ جنگ بے توار نہ بیت ءُ داں آجوئی یکشل ءَ ھمے داب ءَ روان کنت۔
شھناز دابیں کارست مارا ھمے درس ءَ دینت کہ آجوئی ءِ جنگ تھنا مردیں آدمانی جنگ نہ اِنت بلکیں ھما مُچ بلوچ شیرزالانی ھم جنگ اِنت کہ آ گُلامی ءَ کبول کنگ ءَ جاڑیگ نہ اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-