بلوچ یکجھتی کمیٹی ءَ گوشتگ کہ بلوچستان ءِ دمگ مشکے ءَ گوستگیں شش روچ ءَ چہ برجاہ کرفیو ءَ راجی زند سک سانمند کتگ- اے جاورھالاں ھمکروچی زند جنجال کتگ مردم لوگانی تہ ءَ نندگ ءَ لاچار کتگ اَنت- شھریانی بُنکی سُر ءُ پُر ءِ آزاتی ءَ چہ ھم زبھر کنگ بیگ ءَ اِنت، چریشی ءِ سوب ءَ راج سک اڑ ءُ جنجالانی دیمپان اِنت-
جارکش ءَ گوشتگ کہ عید ءِ روچ ءَ ھم مشکے ءِ مھلوک کربانی ءِ جناور ءِ زیرگ ءِ اجازت ھم دیگ نہ بیتگ، کہ مردمانی ھمکروچی زند ءِ ھمراھی ءَ مزھبی ءُ چاگردی پُرکاری ھم پاپند کنگ بوگ ءَ اِنت – اے وڑیں گامگیج راج ءَ یکشل ءَ تُرس ءُ بے اوستی ءِ تہ ءَ دور دنت-
جارکش ءَ گْوشتگ کہ وانگجاھانی بندی سوب ءَ نودربرانی زانشت سانمند بیگ ءَ اِنت- اے وڑ نادُراھجاھاں نادُراھاں ءُ آیانی کھول پوج ءِ نیمگ چہ یکو تُرسینگ ءُ دلسیاھی ءِ دیمپانی کنگ کپگ ءَ اِنت، چریشی ءِ آسر ءَ نادُراہ جسمانی آزار ءِ ھمراھی ءَ زھنی زور ءِ ھم نشانگ ءَ اَنت- جانسلامتی ءُ زانشت ءِ بُنکی آسراتیاں تاں رسگ ءَ اڑان ریاستی زوراکی ءُ انسانی سنگین ھلاپ ورزی ءِ بدتریں منانک اِنت-
بلوچ یکجھتی کمیٹی انسانی ھکانی گلاں چہ دزبندی کن ایں کہ آ مشکے ءُ بلوچستان ءِ دگہ دمگاں برجاھیں کرفیو زوت گامگیج بزور اِیت، راج ءِ بُنکی انسانی ھکانی پھاز ءِ ھاتر ءَ توار چست بکن اَنت ءُ اے وڑیں گامگیج ءِ ھلاپ ءَ جوانیں کرد پیلو بہ کن اَنت-