بلوچ آجوئی لوٹوکیں سلاہ سلاہ بندیں گل بلوچستان لبریشن فرنٹ ءِ سپریم کماندار ڈاکٹر اللہ نزر بلوچ ءَ وتی شنگ کرتگیں درشان ءِ تہ ءَ گوشتگ کہ سرفراز بگٹی ءُ آئی ءِ ٹک ءِ مردم چہ بنگلہ دیشی چانیگ واراں سبک بہ زیر انت ۔ سرفراز بگٹی ءِ وڑیں چانیگ وار سرجمیں جھان ءِ زوراکاں چکاس اتگ انت ۔ اے ادارکی پہ زوراکاں شر بوت کن انت، بلے وتی راج ءُ چاگرد تہ ءَ اے وڑیں کارستانی نام ءَ بس رزوائی لک اتگ ۔ آیانی لس مھلوک ءِ نمائندگی ٹاہ زورگیریں پوج ءِ لٹ ءِ سھارگ ءَ اوشتوک انت ءُ آ وھد دُور نہ ایں کہ اے لٹ بلوچ راجی تاکت ءِ دیم ءَ ٹکر ٹکر بنت ۔
آئی ءَ گوشتگ کہ سرفراز بگٹی ءِ بلوچ پولکار ، ماسٹر ، پروفیسر ءُ شائرانی درگت ءَ داتگیں درشان پاکستانی پوج ءُ ریاست ءِ مولانی نمائندگی ءَ کن انت ۔ اے ھما مول انت کہ پاکستان ءَ 1971 ءَ بنگلہ دیش ءِ آجوئی جنگ ءِ میان ءَ اشانی سر ءَ امل کتگ ۔ پاکستانی پوج ءَ سدانی کچ ءَ بنگلہ دیشی دانشور ، پولکار ءُ استاد کشتگ ات بلے اشی ءَ ابید ھم بنگلہ دیش ءَ آجوئی گپت ۔ بنگلہ دیش ءِ راج ءُ استادانی بدولت ءَ مروچی بنگلہ دیش آجوئیں راجانی لین ءَ اوشتوک انت ءُ بنگالیانی اے ھون روچ مروچی پنجاپی ھاکمانی گردن ءَ وام انت ۔
ڈاکٹر ءَ گوشتگ کہ بلوچ دانشور ،پی ایچ ڈی اسکالر ، پروفیسر ءُ شائراں پہ ریاست ءَ ترسے ءِ زانگ اے گپ ءِ شاھدی ءَ دنت بلوچ چاگرد ءِ تہ ءَ راجی زانشت ءُ راجکاری دیم ءَ روگ ءَ انت چریشی ءَ بلوچ راج ءِ گوں آجوئی زرمبشت ءَ ھمپنتی مھکم ءَ چہ مھکمتر بوان انت ، ءُ بلوچ راج ءِ ریاست ءِ درشاندابی دوری پیداک بوگ ءَ انت ۔ بلوچ راج چہ راجی زانشت ءَ آجوئی جھد ءِ بھر بوگ ءَ انت چریشی ءَ چہ ریاست سک باز ترس ءِ آماچ انت.
یک زانشتی ایں راجے ءَ اے بودشت ھست کہ وتی باندات ءِ ھاتر ءَ جوانیں پیسلہ بہ کنت ۔ ھمے زانشت ءَ چہ ریاست ءُ آئی چانیگ واریں نمائندگ ترس ءِ آماچ انت ءُ بلوچ راج ءِ زانوگراں نشانگ کنگ ءُ ریاست ءِ ھاتر ءَ ارزانی پیداک کنگ ءِ جھد ءَ کنگ ءَ انت ۔ بلے وھدیکہ گھگیری چاگرد ءِ درسیں تکاں مانپوش ایت گڑا چانیگوار بس بُت جوڑ بنت ءُ مروچی بلوچستان ءِ تہ ءَ ھمے وڑ انت ۔
بی ایل ایف ءِ سپریم کمان ءَ گوشتگ کہ ھمے زوتاں بوتگیں وئیل کہ آیانی تہ ءَ نامداریں ندکار ، شائر ، پروفیسر غمخوار حیات بلوچ ءِ کوش ، بلوچ زالبول حبیبہ پیرجان ءِ زورانسری آوار جنی ھمے گپ ءِ نیمگ ءَ اشارہ کنت کہ زورگیریں ریاست مھکمیں دابے ءَ بلوچستان ءِ تہ ءَ پگری ءُ لبزانکی توارانی ایرموش کنگ ءِ کوشست تیز کتگ انت ءُ دیمتر ءَ ھم بلوچ راجدوستانی نشانگ کنگ ءِ اے امل برجاہ بیت انت ۔
ڈاکٹر اللہ نزر ءَ گڈسر ءَ گوشتگ کہ سرفراز بگٹی ءُ ایندگہ سرکاری نمائندگانی درشان ھما ریاستی فاشسٹ پالیسی ءِ بھر انت کہ بلوچستان ءَ گھگیری ءِ توار ، بگیرداری ، زانت ءُ زانشت ، پگری آجوئی ءُ راجکاری زانشت ءِ لگتمال کنگ بوگ ءَ انت بلے پد ءَ ھم اے پالیسی بلوچ راج ءِ دلیری ءُ زانشت ءَ نزور کنگ ءِ بدل ءَ گیشتر مھکم کنگ انت ءُ زرمبشت ءِ تیل دیگ ءِ سوب جوڑ بنت ، ءُ بلوچ راج دوست ءُ وتن دوستانی پگری رھشونی مئے راجی آجوئی زرمبشت ءَ ھمے وڑ مھکم کنان کن انت ۔