بلوچستان ءِ تیاب دپی شھر چہ پسنی ءَ سرتاج ء صالح محمد عید ءِ شپ ءَ پاکستانی پوج ءَ بیگواہ کتگ-
کھول ءِ رِد ءَ سرتاج آئی ءِ بُنکی ھنکین چہ پسنی ءَ ناشناسیں مردماں وتی ھمراھی ءَ برتگ کہ سے روچ ءِ گوزگ ءَ ابید آئی ءِ درگت ءَ ھچ وڑیں ھال نیست-
کھول ءِ گوشگ اِنت کہ سرتاج ء صالح محمد اشی ءَ ساری مئی 2025 ءَ بیگواہ کنگ بیتگ چیزے روچ ءَ پد یل کنگ بیتگ لوگ ءَ سر بیتگ-
کھول ءِ رِد ءَ سرتاج ء صالح محمد اولی رند ءَ 28 جولائی 2015 ءَ وتی مستریں برات مراد بخش ء صالح محمد ءِ ھمراھی ءَ بیگواہ کنگ بیتگ- دوئیں برات چہ پسنی ءَ زورانسری بیگواہ کنگ بیتگ اَنت- پد ءَ کساس یک سالے ءَ پد سرتاج یل بیتگ ءُ وتی لوگ ءَ سر بیتگ، بلے آئی ءِ مستریں برات مراد بخش ء صالح محمد انگت بیگواہ ءَ اِنت بازیں سالانی گوزگ ءَ اَبید آئی ءِ درگت ءَ ھچ وڑیں ھال نیست-
کھول ءِ رِد ءَ مراد بخش آوار جنی ءِ پد لوگ ءِ زمہ وار سرتاج ء صالح محمد ءِ کوپگاں بیتگ – آئی ءِ زورانسری آوار جنی ءَ پد کھول سک مالی دلسیاھی ءُ زھنی گم ءِ دیمپان اِنت-
کھول ءِ گوشگ اِنت کہ لوگ مردم یکشل ءَ تُرس، ناگیگی ءُ بے دلجمی جاوراں زند گوازینگ ءَ لاچار اَنت-
سانمندیں کھول ءَ انسانی ھکانی گل ءُ واکدار ءَ چہ دزبندی کتگ کہ سرتاج ء صالح محمد ءُ مراد بخش ء صالح محمد ءَ زوت یل بکن اِت ءُ کھول ءِ دراجیں مدتے ءَ برجاہ دلسیاھی ءَ ھلاس بہ کن اِت-
کھول ءِ گوشگ اِنت کہ زورانسری آوار جنی یکشل ءَ وئیلاں آیانی زند سک سانمند کتگ ءُ انساپ ءُ وتی دوستناکانی پہ سلامتی واتری ءِ ودار ءَ اَنت-