بلوچستان ءِ دمگ کیچ ءَ پاکستانی لشکر ءَ مرچی سھب ءَ چہ آپریشن کنگ ءَ اِنت کہ ایشی ءِ تہ ءَ گن شپ ھیلی کاپٹر بھر زورگ ءَ اَنت۔
زامران ءِ درپگان، مومیچ، جالگی ءُ کش ءُ گوری دمگاں آپریشن ءِ زد ءَ انت۔ دمگی مردمانی رد ءَ گن شپ ءِ ھیلی کاپٹرانی رھادگ بوگ برجاہ اِنت ءُ جتا جتائیں جاھاں شیلنگ ءِ ھال شنگ بوتگ۔
گوستگیں روچ ءَ ساہیجی ءُ کوھاڈ ءِ جتا جتائیں دمگ فوجی آپریشن ءِ زد ءَ بوتگ اَنت کہ اود ءَ زمینی لشکر ءِ ھمراھی ءَ گن شپ ھیلی کاپٹر گندگ بوتگ اَنت۔
چہ ایشی ءَ ابید ائید ءِ اولی روچ ءَ پاکستانی لشکر ءَ مستونگ ءِ دمگ اسپلنجی ءِ آبادیانی سر ءَ مارٹر ءِ تیرگواری کتگ کہ ایشی ءِ آسر ءَ یک باگے ءَ چار مردم ٹپیگ بوھگ ءِ پدر کنگ بوتگ۔ دمگ ءِ مردمانی گشگ ءِ رد ءَ مارٹر لوگانی سر ءَ ھم کپتگ اَنت بلے انگت ءَ ھچ وڑیں تاوان ءِ پدر کنگ نہ بوتگ۔