بلوچستان ءِ تیابدپی شھر گوادر ءِ ھند پسنی نلینٹ ءَ دو مردمانی لاش دزکپتگ انت۔ دوئیں لاشانی پجار اجمل ءُ سید شاھو ءِ نام ءَ بوتگ انت کہ یک سالے پیسر پہ زور بیگواہ کنگ بوتگ اَنت۔
پولیس ءِ بنشون ءِ رد ءَ دوئیں لاشانی سر ءَ تیرانی نشان پِر انت ۔
اھوالانی رد ءَ یک لاشے ءِ پجار تربت ءِ نندوکیں اجمل ء یاسین ءِ نام ءَ زانگ بیتگ کہ گوستگیں سال ءِ اگست ءَ پاکستانی لشکر ءَ چہ گوادر ءَ زورانسری ءَ بیگواہ کتگ۔ وھدے کہ دومی لاش ءِ پجار جیونی پانوان ءِ نندوکی سیدی ء شاھو ءِ نام ءَ بوتگ کہ آ سئے رند ءَ زورانسری بیگواھی ءِ آماچ بوتگ۔ آ گڈی رند ءَ گوستگیں سال ءِ ستمبر ءَ بیگواہ کنگ بوتگ۔
بلوچستان ءِ انسانی ھکانی گل بازیں وھدے ءَ زورانسری ءَ بیگواہ کنگ ءُ درکانودی کوشانی بابت ءَ زھر ءِ درشان ءَ کنگ ءَ انت۔ انسانی ھکانی گلانی رِد ءَ ھر سال چہ بلوچستان ءَ سداں مردمانی بیگواہ کنگ ءِ ھال دیم ءَ آیگ ءَ انت۔