نوشکی: فوجی کاروان ءِ سر ءَ اُرش، شھدگ ءِ پھل تباہ ، آر سی ڈی شھدگ ءِ سر یَ کنٹرول، ریل سوچگ بوتگ

بلوچستان ءِ نوشکی ءَ جتاجتائیں جاھاں پاکستانی فوج ءِ کاروان نشانگ جوڑ کنگ ءُ گچینی جاھانی نشانگ کنگ ءِ اھوال دیم ءَ آیگ ءَ انت۔

گیشیں ھالانی رد ءَ نوشکی ءِ دمگ گلنگور ءَ سلاہ بندیں مردماں پاکستانی لشکر ءِ کاروانانی سر بستگ ءُ اُرش کتگ۔ بنشون ءِ رد ءَ اے اُرشانی تہ ءَ فوج ءِ دو گاڑی تباہ بوتگ اَنت وھدے کہ نا پدریں ھال دیم ءَ اتکگ اَنت کہ 15 ءَ چہ گیش کارندہ بیران بوتگ اَنت۔ البت اے کچ ءُ کساس انگت ءَ سرکاری تک ءَ پدر نہ بوتگ اَنت۔

دومی نیمگ ءَ نوشکی ءِ دمگ گلنگور ءَ آر سی ڈی شھدگ ءِ سر ءَ مستریں پُھل تراکناکیں چیزاں گوں تباہ کنگ بوتگ ایشی ءِ سبب ءَ شال ءُ تپان ءِ نیام ءَ زمینی روانی مھتل بوتگ۔

دمگی بنشون ءِ رد ءَ کشنگی ءَ بگر داں کردگاپ ءَ آر سی ڈی ءِ مستریں شھدگ ءِ سر ءَ بلوچ لبریشن آرمی کنٹرول برجاہ انت۔

دومی نیمگ ءَ نوشکی ءِ دمگ احمد وال ءَ ھم کاروائیانی ھال رس اِتگ کہ اود یَ بلوچ لبریشن آرمی ءِ کارندہاں ریلے داشتگ ءُ سوتکگ۔