نوشکی ءُ ھزدار ءَ پورسز ءِ سر ءَ اُرش، شال ءَ تیرگواری، نوشکی ءَ بنجل دستیگ

بلوچستان ءِ دمگ نوشکی احمد وال ءَ پوجی بنجل دستیگ ءُ ھزدار ءَ پوج ءِ سر ءَ اُرش ءُ ناکہ بندی ءُ شال ءَ تیرگواری-

بلوچ لبریشن آرمی ءَ نوشکی ءِ دمگ احمد وال ءَ پاکستانی لشکر ءِ کیمپ ءَ ھوار پوسٹ دستیگ کتگ انے۔ ایشی ءَ چہ پیسر بی ایل اے ءَ گلنگور ءِ دمگ ءَ یک بنجاھی بنجلے ءِ کنٹرول کتگ ات۔

چہ احمد وال نوشکی شھر ءَ 20 کلومیٹر دور اِنت ءُ 34 کلومیٹر دور گلنگور ءَ پاکستانی لشکر ءِ پوسٹ ھم کنٹرول کنگ بوتگ ءُ سرجمیں سلاہ ءُ جنگی سامان دستیگ کنگ بوتگ اَنت۔

دومی نیمگ ءَ مرچی پنچمی روچ انت کہ نوشکی شھر ءَ بلوچ لبریشن آرمی کنٹرول برجاہ دارگ ءَ انت۔ چہ فورسز ءِ بنجاھی کارگس ءَ تیرگواری ءُ تراکانی توار اشکنگ بوتگ بلے شھر ءَ انٹرنیٹ سروس بند بوھگ ءِ سبب ءَ ھال ءُ اھوال ءِ وھد ءِ سر ءَ رسگ ءَ نہ اِنت۔

زانگ بہ بیت بلوچ لبریشن آرمی ءَ شمبے ءِ بیگاہ ءَ بلوچستان ءِ 12 شھرانی سر ءَ یکیں وھد ءَ اُرش کتگ ءُ وتی ”آپریشن ھیروف“ (سیاہ توپان) ءِ جار جتگ اَت۔ اے آپریشن ءِ چیر دستی ءَ شال، نوشکی، دالبندین، خاران، مستونگ، قلات، خضدار، گوادر، پسنی، تربت، ءُ تمپ ءَ مزنیں کچے ءَ آپریشن کنگ بوتگ۔

مرچی پنچمی روچ انت بلوچستان ءِ بازیں دمگاں لس زندمان سانمند انت۔ انٹرنیٹ سروس، ٹرین سروس، ءُ مزنیں شھدگانی سر ءَ سر ءُ پرانی سر ءَ بندش جنگ بوتگ۔

ھمے وڑ ءَ ھزدار ءِ دمگ وڈھ ءُ اورناچ ءَ سلاہ بندیں مردمانی اُرش ءِ ھال بیتگ ءُ دمگی مردمانی رد ءَ تیرگواری ءُ تراکانی توار ترندیں رنگے ءَ گوشدارگ بیتگ انت ءُ بیرانی ءُ تاوانی راستیں ھال راست نہ بیتگ انت-

دمگی مردماں دی بلوچستان پوسٹ ءَ گوں گوشتگ کراڑو ءِ ھند ءَ پورسز ءِ بنجل سلاہ بندین مردماں نشانگ کتگ-

اھوالانی رد ءَ سلاہ بندانی نیمگ ءَ ناکہ بندی ھم کنگ بیتگ ءُ دگ بندی ءَ روانی مھتل بیتگ-

دومی نیمگ ءَ شال ءِ شھر ءَ بائی پاس ءِ نیمگ ءَ گوستگیں شپ ءَ ھم تیرگواری ءِ توار اشکنگ بیتگ انت- ءُ ھمے وڑ مھروار ءِ نیمگ ءَ ھم تیرانی توار بیتگ انت-