نبشتانک: کریمہ! بی ایس او ءِ پگری میراس
نبشتہ کار: جورین بلوچ
دی بلوچستان پوسٹ
بی ایس او ءِ پگری میراس ءِ تہ ءَ لھتیں انچیں کارست اَنت کہ آیاں بی ایس او ءِ پگر ءِ تہ ءَ بُرز ءُ بالادیں روایت ایر کتگ ءُ ھمے کارستانی آشوبی روایتاں بی ایس او گام پہ گام دیمروی دیاں کتگ ءُ ھمے رنگ ءَ مرچی ھم جتائیں آشوبی ورکر بی ایس او ءَ نوکتریں آشوبی لوٹاں گوں ھمدپ کنان ءَ جنزینان اِنت ھزاراں سال اِنت کہ بلوچ وتی زمین ءِ رکینگ ءَ سراں دیان ءَ جنگ کنگ ءَ اَنت بلے نودربر سیاست یا سرفیس سیاست ءِ روایت بلوچ ءِ کِرا کوھن نہ اَنت 1920 ءِ زمانگ ءَ بلوچ سیاست ءِ بنداتی وھد زانگ بیت کہ اولی رند ءَ بلوچ ءِ سیاسی گل دیم ءَ کاینت آیانی کار ءُ پروگرامانی ارزشت وتی جاہ ءَ بلے چوشیں مھکمیں سیاستے کنگ نہ بیت اے میان ءَ جتائیں جھلی ءُ بُرزیاں ابید بلوچ ءِ سیاست جنزاں بیت بلے 2000 ءَ پد ھاس 2009 داں 2015 ءَ بلوچ سیاست انچیں مھکمیں روایتے ایر کنت کہ اے روایت داں مرچی ءَ جنزگ ءَ اِنت ءُ اے روایت وتی اندر ءَ انچو مھکم اِنت کہ نو ایشی ءَ ھچ وڑیں تاکت پُروش دات نہ کنت اے میان ءَ بلوچ ءِ سیاسی ادارھانی سر ءَ زوراکیں استان کریک ڈاؤں بندات کنت، سدانی کچ ءَ سیاسی ورکر گار ءُ بیگواہ کنگ بنت، سدانی کچ ءَ سیاسی ورکرانی جون ماں گیاباناں دور دیگ بنت، اے ھما سر بنت کہ آشوب ءِ میان ءَ ایشاں گراؤنڈ یلہ کنگ ءُ جنز ءِ دگہ پھناتے ءَ کار کنگ ءِ موہ بیت بلے اے سرجمیں آ دگہ سرجمیں راہ ءُ دراں بند کن اَنت ءُ بلوچستان ءِ آجوئی، بلوچ ءِ سلاہ بندیں جنگ ءِ ھمایت ءُ لس بلوچ ءِ موبلائزیشن ءَ پہ گراؤنڈ ءَ اوشت اَنت ءُ سرفیس سیاست ءَ پہ وتی کربان کنگ ءِ نوکیں مسالے ایر کن اَنت، اے بامرد اگاں در بہ کپتین اَنت جوانیں رنگے ءَ جنگ اِش ھم کت کتگ اَت ءُ اے میان ءَ بازیں مردمے جنگ ءِ پیسلہ ءَ ھم کنت کہ آیانی پیسلہ ءِ ارزشت ءُ اھترام وتی جاہ ءَ بلے سرفیس سیاست ءِ رکینگ ءَ ھما سیاسی ورکر کہ وتی جاناں ندر کن اَنت، اے بلوچ وت واجھی ءِ جنز ءِ تہ ءَ نوکیں روایتے ایر کن انت ءُ بلوچ راجی جنز ءِ پگری وراست ءَ مھکم کن انت۔
کریمہ ھمے زمانگ ءِ کارستاں چہ یکے کہ بیھار، جیل، گار ءُ بیگواھی ءُ کُشت ءُ کوشانی میان ءَ چہ وتی سیاسی کاراں پُشت نہ کِنز اِیت بلکیں گوں وتی سیاسی شوربندیاں مُدام دیم ءَ آیاں کنت، کریمہ ءِ سینئر وائس چیئرمین ذاکر جان بیگواہ کنگ بیت، کریمہ تھنا اے درد ءَ اوپار نہ کنت بلکیں پہ یک ساھتے ھم ذاکر جان ءِ کاراں اوشتاگ ءَ نیل اِیت، سنگت ءِ سرجمیں وتی زمہ واریاں وتی کوپگاں کنت، آئی ءِ ورنیائیں بنجاھی کمیٹی ءِ باسک کمبر چاکر ءُ کامریڈ قیوم ءِ جون گوں ازیت ءِ نشاناں دور دیگ بنت بلے کریمہ جنزگ ءَ اِنت، استان دُژمنے آئی ءِ دُژمنی وتی جاہ ءَ 2011 ءَ بی ایس او ءِ تہ ءَ ٹولی یے پاد کیت کہ کریمہ، کماش زاھد جان ءُ رزا جان ءِ سر ءَ ھمے بھتام ءَ جنت کہ آیاں بی ایس او ءِ آزاتی پادمال کتگ ءُ بی ایس او ءَ دگہ ادارھانی چیردستی ءَ جنزینگ ءَ اِنت، ھمے بیانیہ ءَ گوں اے ٹولی بی ایس او ءِ لیڈرشپ ءِ ھلاپ ءَ جتائیں وتگڑیں جواز جوڑ کناں بیت ءُ بی ایس او ءِ ورکراں ءُ ھنکیناں چہ بنجاہ ءَ گستا کنگ ءِ پندل ءَ سازاں بیت بلے کریمہ اوشتاتگ، سنگتاں گندگ ءَ اِنت، چہ دُژمن ءِ ترس ءَ آیاں رکینگ ءَ اِنت، چہ وتیانی پندل ءُ پروپگنڈہ ءُ مناپکی ءَ رکینگ ءَ اِنت اِش ھمے میان ءَ 2014 ءَ گل ءِ کارگشاد رزا جھانگیر کیچ ءَ بی این ایم ءِ سنگت امداد بجار ءِ ھواری ءَ شھید کنگ بیت پد ءَ کریمہ ءِ چمانی کل ءَ گل ءِ کماش زاھد جان زورانسری چست کنگ ءُ گار ءُ بیگواہ کنگ بیت گڑا گل ءِ سرجمیں زمہ واری کریمہ ءِ سر ءَ کاینت بلے کریمہ نہ پُرشتگ نا دُژمن ءِ ترس ءَ پُروشتگ نا وتی سنگتانی جتائی ءِ گم ءَ ءُ نا وتی مردمانی بھتام ءُ پروپگنڈھاں ناں کہ گل ءِ زمہ داریاں، کریمہ انگت گیش مھکم بیت ءُ زاھد جان ءِ آجوئی ءَ پہ کراچی پریس کلب ءِ دیم ءَ 48 روچی شُد اڑتالی کیمپے جُنزین اِیت، کریمہ ءِ درد ءُ زمہ واریانی کسہ اد ءَ آسر نہ اِنت، اے شُد اڑتالی کیمپ ءِ تہ ءَ آئی ءِ چمانی دیم ءَ آئی ءِ بنجای کمیٹی ءِ باسک لطیف جوھر روچ پہ روچ نزور بوان اِنت ءُ مرگ ءِ نیمگ ءَ روگ ءَ اِنت بلے کریمہ اوشتاتگ داں 2015 ءَ گل ءِ سیشن ءَ لوٹارین اِیت ءُ کماش گچین کنگ بیت۔
پہ ترسگ، مایوس بوگ، ھاٹیگ ءِ یلہ کنگ، پرشگ ءُ راہ ءِ مٹ کنگ ءَ چہ اے ویلاں یکے بس اِنت، بلے جُنز ءِ نیام ءَ اے جیڑہ ءُ جنجال ابرمی شے اَنت وھدے کمتر ءُ وھدے گیشتر بلے الّم وجود دار اَنت پمیشکا نزوریں مردم وتی پاداں داشت نہ کن اَنت، چوشیں جُنزے ءِ بھر بوگ ءَ پہ وتی اندر ءَ چہ پیسلہ کنگی اِنت چو کہ بُرز کوھی جاھے ءَ نبشتہ کنت کہ “مزاحمت کیا ہے۔ لفظوں کا شور نہیں۔ بلند آواز والے نعروں کا تیز ہجوم نہیں۔ مزاحمت وہ جگہ ہے جہاں انسان اپنی شکست کے امکان کو پہچان کر بھی پیچھے نہیں ہٹتا۔ یہ وہ اندرونی فیصلہ ہے جس کی خبر باہر کسی کو نہیں ہوتا” ( گھگیری چے یے! گالانی جاک ناں، برزیں اوگامانی تیزیں چلانزگ ناں، گھگیری ھما جاہ اِنت کہ اود ءَ مردم وتی شکست ءِ امکان ءَ گند اِیت ھم پُشت ءَ نہ کِنز اِیت، اے اندر ءِ ھما پیسلہ اِنت کہ ڈن ءَ کس ءَ ایشی ءِ سما نہ بیت) کریمہ وتی اندر ءَ چہ ھمے پیسلہ کتگ اَت پمیشکا آئی ءَ ھچ چیز ءَ شکست دات نہ کت، کریمہ گوں وتی اے بھادری، جرئت، کمٹمنٹ ءَ بی ایس او ءِ واستا اوشتگ ءُ بی ایس او ءَ دیم ءَ برگ ءِ نوکتریں روایتے ایر کت ءُ بی ایس او ءِ پگری بنھشت گیش مھکم کت، مرچی ھمے اے نازرکیں جاورھالانی نیام ءَ کہ سنگت پہ بی ایس او ءَ اوشتاتگ اَنت، آئی ءَ روچ پہ روچ دیمروی دیگ ءَ اَنت گڑا اے پگری وراستے کہ بی ایس او ءِ سنگتاں مرچی گون اِنت ءُ اے پگری وراست ءِ تہ ءَ کریمہ ءِ وپاداری، جرئت، بھادری ءُ ھرچ وڑیں مُشکل ءُ جنجال ءَ ابید گوں بی ایس او ءِ پگر ءَ اوشتگ ءِ مزنیں کردارے، مرچیگیں ورنا کریمہ ءَ گالانی نیام ءَ تھنا یات مہ کن اَنت بلکیں آئی ءِ کردار ءَ وتی تہ ءَ جاہ دیگ ءِ جھد ءَ بہ کن اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-