بلوچستان ءَ 78 ھزار آئی بی اوز-ٹی بی پی شونگال

بلوچستان ءَ 78 ھزار آئی بی اوز

ٹی بی پی شونگال

چاردہ دسمبر ءَ سنٹرل پولیس کارگس شال ءَ بلوچستان ءِ ایڈیشنل چیف سیکرٹری داخلہ ءُ ٹکی رھشون ھمزہ شفقات ءُ ڈی آئی جی کاونٹر ٹیررازم ڈیپارٹمنٹ ءِ اعتزاز احمد گواریہ ءَ پریس ءَ تران کتگ ءُ گوشتگ سال دوھزار ءُ بیست ءُ پنچ ءَ سرجمیں بلوچستان ءَ 78 ھزار انٹیلی جنس بیسڈ پوجی آپریشن کتگ انت – آئی ءَ گوشتگ بلوچ لبریشن آرمی ءُ مجید بریگیڈ ءَ را امریکہ ءِ اسٹیٹ ڈیپارٹمنٹ ءِ نیمگ ءَ ناشرکار گوشگ ءُ نامینگ ءَ پاکستان ءِ سرکار ءِ واستا یک مزنیں سوبمندی ءِ گوشتگ، چوشکہ سیکیورٹی پالیسی ءِ سرجمی ءِ پدراھی ءَ کنت-

ھمزہ شفقات ءُ اعتزار احمد گواریہ ءَ ھمے درچ ءَ درشان گوشتگ ءُ ٹاہ داتگ کہ سیکیورٹی لشکر ءُ دگہ کانون ساز کار کنوکیں ادارھانی جوانتریں گچینی گامگیجانی سبب ءَ ھمے گوزوکیں سال ءَ آجوئی دوستیں سلاہ بندیں گلانی اُرشانی توک ءَ کمی اتکگ – بلے اے ٹاہ ءِ دومی روچ ءَ بلوچ لبریشن آرمی ءِ سَد ءَ گیش سلاہ بندیں گھگیراں پنجگور ءِ شھر ءِ سر ءَ کنٹرول کتگ ءُ وتی نشانگ سرجم کتگ، چریشی ءَ تچک بیت انت کہ سرکاری درشان بلوچستان ءِ زمینی جاوراں دور انت ءُ ریاست ءِ درشاناں بس دیم ءَ برگ ءَ انت-

سال دو ھزار ءُ بیست ءُ پنچ ءِ وھد ءَ بلوچ سلاہ بندیں گلاں پاکستان ءِ زرکاری ءُ لشکری جاھانی سر ءَ مزن ءُ ھترناکیں اُرش کنگ بیتگ انت- جنوری ءَ تربت ءِ نزیک ءَ پاکستانی پوج ءِ بسانی سر ءَ مجید بریگیڈ ءِ پدائی اُرش بیتگ ، ھمے وڑ فروری ءَ بلوچ لبریشن آرمی ءَ زھری ءِ شھر کنٹرول کتگ ءُ لیویز تھانہ، بینک ءُ نادرا آفس سوتکگ انت- مارچ ءَ جعفر ایکسپریس ءِ ھائی جیک کنگ یک نوکیں ویلے بیتگ، چریشی ءَ پاکستانی پوج ءَ جانی تاوانانی ھواری ءَ لشکری تَک ءَ گوستانکی پروشی ءِ چِست کنگ کپتگ-

ھمے ماہ ءَ نوشکی ءُ ھمے وڑ ستمبر ءَ دشت ءِ دمگ ءَ پاکستانی پوج ءِ کاروانانی سر ءَ مجید بریگیڈ ءِ پدائیناں ھونریچیں اُرش کتگ انت- مئی ءَ بلوچ لبریشن آرمی ءَ سوراب ءِ شھر کنٹرول کتگ ءُ پولیس ءِ سِلاہ دستیگ کتگ ءُ وتی تاکت برجاہ کتگ ءُ اے شھر بازیں اداراں داں وتی جاڑیگی برجاہ داشتگ، چوشکہ ریاستی رٹ ءِ واستا سنجیدگی ءِ سر ءَ جُستے ءِ چیدگ انت-

اگست ءَ زھری ءِ تھسیل بازیں روچاں داں بلوچ راجی آجوئی سنگر ءِ گھگیرانی کنٹرول ءَ بیتگ، ھمے وڑ سرجمیں بلوچستان ءَ بلوچ راجی آجوئی سنگر ءَ پاکستانی پوج ءِ سر ءَ یک سد ءُ پنجاہ ءَ گیش اُرش کتگ انت- سال ءِ گڈی ماہ ءَ بلوچ لبریشن فرنٹ ءِ سدو آپریشن بٹالین ءَ نوکنڈی ءَ فرنٹئر کور ءَ بریگیڈ ھیڈ کوارٹر ءِ سر ءَ اُرش کتگ، چریشی ءَ سیندک ءُ ریکوڈک ءَ بندوکیں درملکی انجینئر نشانگ کتگ انت-

سرجمیں سال ءَ پاکستان ءِ پوج ءِ سر ءَ بیوکیں ھترناکیں اُرش سرکاری ٹاھاں بے بُن کن انت ءُ بلوچ سلاہ بندیں گلانی گیش بوتگیں آپریشنل زوراں پدر کنت- پاکستانی میڈیا ءَ بلوچستان ءِ اکس ءَ پیش کنت آ زمینی راستیاں ھمدپ نہ بیت انت، ھمے وڑ بلوچ گھگیرانی کاروائی نا ایوک ءَ ترندیاں گیشی بیتگ بلکیں نشانگ ءِ گچین کنگ ءُ ھمکت املیانی تچکیں ترندی گندگ ءَ کاینت –