بلوچستان ءَ زورانسری بیگواھیانی ھلاپ ءَ زھرشانی زرمبشت ءِ سروکی کنوک کماش ماما قدیر ، یک رندے پد ءَ ناجوڑی ءِ دیمپان ، ایشی ءَ پد آ کراچی ءَ ناگیگی ءِ جاوراں کراچی ءَ برگ بیتگ-
وائس فار بلوچ مسنگ پرسنز ءِ وائس چیئرمین ماما قدیر بلوچ پیسر ءَ جناح ہسپتال ءِ آئی سی یو ءَ برگ بیتگ، بلے آئی ءِ نگیگیں جاورانی سبب ءَ مرچی آغا خان ھسپتال ءَ سر کنگ بوتگ کہ اودا آئی ءِ الاج بوھگ ءَ انت۔
زانگ بہ بیت کہ ماما قدیر بلوچ گوستگیں 16 سالاں بلوچستان ءَ زورانسری بیگواھی، درکانودی دزگیر کنگ ءُ کشت ءُ کوش ءِ ھلاپ ءَ پرکار اِنت۔
آئی ءَ شال ءُ کراچی ءَ زھرشانی کیمپانی سروکی کتگ ءُ 2013 ءَ چہ شال ءَ کراچی ءُ پد ءَ چہ کراچی ءَ اسلام آباد ءَ راجدپتری دراجیں راہ ءِ سروکی کتگ کہ ایشی ءَ بلوچستان ءَ ریاستی لشکر ءِ نیمگ ءَ زورانسری ءَ بیگواہ کنگ ءِ جیڑہ ءَ را جھان ءِ پتر ءَ آشکار کتگ۔
ماما قدیر بلوچ ءَ بازیں میان استمانی کانفرنسانی تہ ءَ بھر زرتگ، بلوچستان ءَ انسانی ھکانی لگتمالی ءِ سر ءَ وتی توار چست کتگ ءُ میان اُستمانی تک ءَ ھمے زلم ءُ زوراکیانی بابت ءَ سرپدی داتگ۔
ماما قدیر ءِ سروکی ءَ بندات بوتگیں شد ھڑتال ءِ زھرشانی کیمپ انگت شال پریس کلب ءِ دیم ءَ برجاہ اِنت کہ پاکستان ءُ سرجمیں دگنیا ءَ انسانی ھکانی ھاترا یک بے مٹیں چیدگے جوڑ بوتگ۔
وائس فار بلوچ مسنگ پرسنز ءَ چہ بلوچ راج ءُ انسانی ھکانی جھدکاراں دزبندی کتگ کہ ماما قدیر بلوچ ءِ زوتیں جان سلامتی ءِ ھاترا دوا بہ کن اَنت ءُ کھول کتگ کہ آ وتی مشن ءَ برجاہ دار ایت، تھریک ءَ گیشتر مھین کنت ءُ دیم ءَ بارت۔