بیگواھیں صغیر احمد ءِ گھار ءَ شال ءَ وائس فار بلوچ مسنگ پرسنز ءِ شدھرتالی بنجل ءَ پریس کانفرنسے کنان ءَ گشتگ کہ مرچی دومی رند اِنت کہ من اے پریس کلب ءَ شمئے دیم ءَ اوشتاتگ آں ۔ منی مول ءُ مراد پدّر ءُ تچک اِنت: منی برات سگیر احمد ءُ ناکو زتک اقرار بلوچ ءِ سلامتی ءَ یل کنگ ءِ لوٹ انت۔
آئی ءَ گْوشتگ کہ 11 جون 2025 ءِ شپ ءَ منی برات ءُ کزن پاکستانی سیکورٹی کارندھاں اورماڑہ چیک پوسٹ ءَ دزگیر کتگ ءُ زورانسری ءَ بیگواہ کتگ۔ مرچی ایشانی بیگواھی ءَ شست ءُ یک (۶۱) روچ ءَ گیش بیت۔ اے دراجیں وھد ءِ تہ ءَ ھچ تھانہ ءَ رپورٹ نبشتہ نہ بوتگ ءُ ھچ آمیدگس ءَ پیش نہ بوتگ ءُ ھچ سرکاری ادارہ ءَ مارا ھال نہ داتگ۔
آئی ءَ گیش گوشتگ کہ اے اولی رند نہ اِنت۔ منی برات ھم 20 نومبر 2017 ءَ کراچی یونیورسٹی ءَ چکاس ءِ واستا پیش بوھگ ءَ پد بیگواہ کنگ بوتگ ءُ نزیک ءَ یک سالے ءَ ناشناسیں بندی جاھاں گیر انسانی سلوک ءُ لٹ شاپ کنگ بوتگ۔ اے ٹپ تاں روچ ء مرچی مئے ھاندان ءِ دل ءُ دماگاں تازگ اِنت۔
آئی ءَ گوشتگ کہ صغیر احمد وانندھیں ورنایے۔ کراچی یونیورسٹی ءُ سرگودھا یونیورسٹی ءَ چہ وتی ہائیر ایجوکیشن ءِ وانگ ءَ پد وتی راج ءِ ھزمت کنگ ءِ ھاترا وتی دمگ آواران ءَ واتر بوتگ۔ بلے وھدے کہ روزگار ءِ دست نہ کپت گڑا آ تربت ءَ شُتگ ءُ گوں وتی ناکوزتک اقرار بلوچ ءَ مزدوری ءِ کار ءَ بنداتے کتگ۔ آئی ءِ تھنا ”جرم“ اے بیتگ کہ آ چہ مھنت ءُ بلوچ بوگ ءَ وتی گُزارنی ءِ شوھازگ ءَ بیتگ۔
آئی ءَ گوشتگ کہ اقرار بلوچ گردہ ءِ نادراہ اِنت زوتیں علاج ءِ زلورت اِنت۔ آیاں جمھوری ریاست ءِ تہ ءَ نادراہ ءُ بے گناھیں مردمانی اے وڑیں سلوک منّگ بیت؟ پاکستان ءِ دستور ھمک شھری ءَ برابر ھک دنت، بلے منی جست ایش انت کہ بلوچ ھم ھمے دستور ءِ بھر انت؟ اگاں ھست گُڑا مئے ورنا پرچا آمیدگس ءَ پیش کنگ ءَ ابید بیگواہ کنگ بوگ ءَ اَنت؟
آئی ءَ گوشتگ کہ ما ھرچ وڑیں ناجائزیں کارروائی ءِ ھم ھمایت نہ کناں۔ اگاں صغیر احمد یا اقرار بلوچ ءِ سر ءَ ھرچ وڑیں بھتامے ھست گڑا آ زوت آمید گس ءَ آرگ بہ بنت، وکیل دارگ بہ بیت ءُ تچکیں کانود ءِ چیر دستی ءَ آھانی سر ءَ ارزی کنگ بہ بیت۔ اے آئین ءِ لوٹ اِنت، اے انسانی ھکانی اسل اِنت ءُ اے اقوام متحدہ ءِ زورانسری ءَ بیگواہ کنگ ءِ کنونشن ءِ لوٹ اِنت۔
آئی ءَ گوشتگ کہ وھدے آمید گس بے توار بنت، ایوان بے پرواہ بیت ءُ میڈیا دگہ دگرانی دست ءِ تہ ءَ بنت گڑا یک مزلومیں گھار کجا روت؟ وھدے کہ ریاست وت پہ وتی شھریاں یک ھترہ یے جوڑ بیت گڑا ما کئے ءِ دروازگ ءَ ٹُکّیں؟ بے تواری جرمے ءُ ما اے جرم ءِ تہ ءَ شریک بوت نہ کنیں۔
من چہ سپریم کورٹ، انسانی ھکانی گل، سول سوسائٹی ءُ رسانکدر ءَ دزبندی کن ایں کہ مئے برات ءُ کزن ءِ زوت ءُ ایمنیں جان سلامتی ءِ ھاترا املی گامگیج بہ زور اَنت۔ بلوچ ورناہ پہ گار ءُ بیگواھی ءَ ودی نہ بوتگ اَنت — ما لوٹیں کہ زندگ بہ بئیں، وانگ ءُ زانگ بہ زوریں، شرپداریں زند گوازینگ لوٹیں، ءُ امن ءُ ایمنی ءِ زند گوازینگ لوٹ ایں.
اگاں مارا صغیر احمد ءُ اقرار بلوچ ءِ بابت ءَ سرپدی دئیگ نہ بوت گڑا ما وتی زھرشانی ءَ گیش ءُ گیوار کن ایں ۔ اولی بھر ءَ ما شال پریس کلب ءِ دیم ءَ زھرشانی کن ایں ءُ دومی بھر ءَ ڈی سی آفس آواران ءِ دیم ءَ دھرنا کن ایں ۔ اگاں مارا انگت انساپ نہ رس ایت گڑا ما ھوشاب ءَ راہ بند کن ایں ءُ سرجمی ءَ زھرشانی ءَ ریکارڈ کن ایں۔