زورگریں پاکستانی پوج ءِ نھ کارمَنْد کشتگ انت ، سنگت سھیب نمیران بوتگ ۔ بی ایل اے

بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ سرمچاراں کلات ءَ زورگریں پاکستانی پوج ءِ سر ءَ ٹوھیں اُرشے کتگ ءُ سک باز تاوان داتگ ءُ اے میڑ ءَ سنگت سھیب بلوچ پنام ءِ امیر بخش نمیران بوتگ۔

جارکش جیئند بلوچ ءَ سرجمیں ھال داتگ ءُ گوشتگ کہ مروچی بزاں 25 جولائی ءَ کلات ءِ دمگ کوھک ءَ زورگریں پوج ءَ سھب کساس ادار نھ ءِ نزیک ءَ پہ زوراکی کنگ ءِ ھاتر ءَ دیم ءَ آیگ ءِ جھد کتگ کہ سرمچاراں پیسر ءَ آئی ءِ سر بستگ ءُ اُرش کتگ ۔ اے اُرش چل دمان ءَ گیش برجاہ بوتگ ءُ اُرش ءَ زورگریں پوج ءِ نھ کارمَنْد ھما جاہ ءَ مرتگ ءُ بازینے زدگ بوتگ ءُ تتکگ انت ۔

جارکش ءَ گوشتگ کہ زورگریں پوج ءَ گْوَستگیں پنچ روچاں کہ کوھک ءُ کش ءُ گوری ھند ءُ دمگاں پہ زوراکی کنگ ءِ جھد ءَ انت بلے پد ءَ ھم بلوچ لبریشن آرمی ءِ سرمچاراں گوں جْوانیں رپک ءُ ھنراں یکشل ءَ تاوان بار کتگ ءُ میڑاں سنگت سھبیب بلوچ پنام ءِ امیر بخش نمیران بوتگ۔

جارکش ءَ گوشتگ کہ نمیرانیں سنگت سھیب بلوچ پنام ءِ امیر بخش ءِ محمد دین بنکی ءَ قلات ءِ دمگ منگچر نندوک بوتگ انو کلی اسماعیل، شال ءَ جھمنند بوتگ۔ آ سالے ءَ ساری بی ایل اے ءَ اتکگ ءُ راجی آجوئی ءں جھد ءَ کلات ءِ کوھاں وتی کرد ءَ پیلو کنگ ءَ بوتگ ۔

جارکش ءَ گوشتگ کہ نمیرانیں سھیب بلوچ دلیر ءُ تمرد ءُ رھبندی سنگتے بوتگ آئی ءَ اے کمیں بلے پرازم آشوبی زند ءَ بازیں جْوانیں کارے کتگ آ ایوک ءَ دلیریں سپاھی یے نہ بوتگ بلکیں یہ زانتکاریں آشوبی باسکے بوتگ کہ آئی ءِ ھمراہ داری زرمبش ءِ لیکہ ءَ برزشان بوتگ۔

آئی ءَ دیمتر ءَ گوشتگ کہ آ گڈی جنگ ءَ ھم دیم ءِ لین ءَ بوتگ ءُ زورگریں لشکر سرین پروشے کتگ ءُ سک باز تاوانے داتگ ۔ آئی ءِ دلیری ءُ دیمھونی ایوک ءَ کلات ءِ کوہ ءَ ناں بلکیں سرجمیں راجی زرمبش ءِ ھاتر ءَ رژناھیں درورے-

درشان ءِ گڈسر ءَ جارکش ءَ گشتگ کہ نمیرانیں سھیب ءِ دیمھونی بلوچ راجی دپتر ءِ یک تابناکیں درے کہ نسل در نسل آجوئی ءِ لوٹوکاں جھدے ھوسلگ ءِ راہ ءَ باور کنائین ایت۔