بلوچستان ءَ جتاجتائیں دمگاں بیتگیں اُرشانی زمہ واری بی ایل ایف، بی آر اے ءُ بی آر جی ءَ منّ اِتگ اَنت

بلوچستان ءِ جتاجتائیں دمگاں ریاستی چاریگانی کوش ، پُلپانچیں شرکت ءِ کاردار ءُ گیس پائپ لائن سر ءَ بیتگیں اُرشانی زمہ واری بی ایل ایف، بی آر جی، بی آر اے ءَ منّ اِتگ اَنت-

بلوچستان لبریشن فرنٹ ءِ جارکش میجر گوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں 18 جولائی 2026 ءِ شپ ءَ ھاران ءِ دمگ کُلان ءَ زورگریں ریاست ءِ جوڑ کتگیں کُشندہ ٹولی ءِ ھلاپ ءَ مزنیں آپریشنے کنان ءَ زورگریں دُژمن ءِ ھاسیں کارندہ حافظ کبیر ءِ اوتاک انگیر ءَ کتگ- اے میان ءَ ھاپز کبیر ءِ چُک عبدالحکیم ءَ گھگیری ءِ جُھد کتگ چریشی ءَ سرمچاراں پسھی کاروائی کنان ءَ جاہ پہ جاھی مرتگ- اے آپریشن ءَ مئے سرمچاراں زورگریں ریاست ءِ ھاسیں کارندہ حافظ کبیر آئی ءِ چُک حافظ نوید ءَ ھوار آوار جتگ پٹ ءُ پول ءَ پد بلوچ راجی آمیدگس ءَ پیش کنگ بیت-

جارکش ءَ گْوشتگ کہ دگہ یک کاروائی ءَ مئے سرمچاراں 18 جولائی 2026 ءِ شپ ھاران ءِ دمگ گواش ءَ ریاستی کارندہ سوپی ممتاز ءِ نزیکیں سنگت راجی میاربار غمی ساسولی تیرگواری کتگ ءُ کُشتگ- اے میاربار سال 2025 ءَ احمد نواز ساسولی ءِ ھمراھی ءَ دُژمن ءِ دیم ءَ سر جھل کتگ – لگورے ءَ پد گمی ساسولی اھمد نواز ءِ چیردستی ءَ بلوچ راجی جُھد ءِ ھلاپ ءَ پُرکار بیتگ- احمد نواز ءِ کوش ءَ پد آ راجی جُھد آجوئی ءِ ھلاپ سوپی ممتاز ءِ نیٹورک ءَ چہ ھمگرنچ بیتگ دمگ ءَ بلوچ ورنایانی زورانسری آوار جنی ، درکانودی کوش ءَ ھوار دُزی ءُ ڈُنگی ءِ سلّکاریاں تچکی ءَ ھوار بیتگ-

جارکش ءَ گْوشتگ کہ بی ایل ایف ءَ حافظ کبیر ءُ آئی ءِ چُک حافظ نوید ءَ آوار جنگ ، راجی میاربار عبدالحکیم ءُ غمی ساسولی ءَ گُڈی آسر ءَ سر کنگ ءِ زمہ واری ءَ منّ ایں- حافظ کبیر ءُ حافظ نوید بھت ءِ پیسلہ سرجمیں جُست ءُ پرس ءَ پد بلوچ راجی آمیدگس ءَ کنگ بیتگ-

بلوچ ریپبلکن آرمی ءِ جارکش سرباز بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں شمبے ءِ روچ ءِ ڈیرہ بگٹی ءِ تھسیل سوئی ءِ نزیک ءَ عنایت شاہ دربار ءِ ھند سر ءَ پُلپانچیں شرکت ماری انرجیز لمیٹڈ ءِ سوئی ءَ رؤکیں کاروان ءِ سر ءَ سنگر گپتگ ءُ اُرش کتگ – اے اُرش ءِ آسر ءَ شرکت ءِ پھازوکی ءَ ساڑی چار کارندہ مرتگ ،وھدے کہ کارداراں ھوار ھشت مردم ٹپی بوتگ اَنت- اُرش ءِ میان ءَ کاروان ءَ ھوست بازیں گاڑی ءَ تاوان ھم رس اِتگ-

جارکش ءَ گوشتگ بلوچ ریپبلکن آرمی اے اُرش ءِ زمہ واری ءَ منّ اِیت ءُ یکرندے پد ءَ تچک کنگ لوٹ اِیت کہ آ بلوچ سرڈگار ءِ مڈیانی لُٹ ءُ پُل ءِ ھلاپ ءَ وتی جُھد ءَ برجاہ بدار اَنت- گل ءِ رِد ءَ، آ بلوچ راجی مڈیانی پھازداری ءِ ھاتر ءَ ھرچ وڑیں گام چست کن ایں ءُ اے وڑیں کجام ھما منسوبہ ءِ بگیری ءَ کن ایں کہ اود ءَ بلوچ راج ءِ رزامندی گون مہ بیت-

بلوچ ریپلکن گارڈز ءِ جارکش دوستین بلوچ ءَ وتی درشانے ءَ گوشتگ کہ دوشی بی آر جی ءِ سرمچاراں سندھ ءِ ھند چہ کشمور ءَ کراچی ءَ روکیں 36 انچ ءِ پائپ لائن گوں تراکناکیں شورھاں تباہ کتگ۔

دوستین بلوچ ءَ اُرش ءِ زمہ واری من اتگ ءُ گوشتگ کہ مئے اے وڑیں کاروائی داں بلوچستان ءِ سرجمیں آجوئی ءَ برجاہ بنت۔