شپ ءِ نیم ءَ پاکستانی لشکر ءَ حب ءِ یک لوگے ءَ چھاپہ جتگ ءُ یک ورنایے زورانسری بیگواہ کتگ۔
چہ حب ءَ رس اتگیں ھالانی رد ءَ رینجرز ءُ دگہ پاکستانی لشکر ءِ کارندھاں شپ ءَ الہ آباد ٹاؤن ءِ یک لوگے ءَ بیڑ برتگ ءُ اود ءَ خضدار زہری ءِ نندوکیں حلیم زہری ء عبدلقادر آوار جتگ ءُ گوں وت برتگ۔
حلیم زھری ءِ بابت ءَ ھمے ھال بیتگ کہ یک ھپتگے پیسر پاکستانی لشکر ءَ آ پسنی ءِ نزیک ءَ دزگیر کتگ ءُ گوں وت برتگ بلے رند ءَ آ یلہ کنگ بوتگ۔
اھوالانی رد ءَ رینجرز ءَ یک رندے پد ءَ آ دزگیر کتگ ءُ بیگواہ کتگ۔
حلیم زهری بیگواھیں بلوچ سیاسی جھدکار راشدھسین ءِ ناکوزتک اِنت ءُ ایران ءِ سیمسر ءَ مزدور ءِ بستار ءَ کار ءَ بوتگ ۔ ایشی ءَ چہ پیسر آئی ءِ برات منان زہری ھم پاکستانی لشکر ءَ زھری ءَ آپریشن ءِ وھد ءَ زورانسری بیگواہ کتگ۔