گوادر : پاکستانی پوج دست ءَ آوار جنگ بیتگیں مردمے کُشگ بیتگ

بلوچستان ءِ تیاب دپی شھر گوادر ءَ پاکستانی پوج ءَ پیسر ءَ چہ گپتگیں مردمے کُشتگ- کُشگ بیتگیں مردم ءِ پجّار سلام ء حیدر نام ءَ چہ بیتگ کہ دشت کمبیل جھمنند اِنت ، آ دو روچ ءَ ساری گوادر ءِ دمگ گھاٹی ڈور ءَ برجاھیں آئی ءِ لوگ ءَ چہ پاکستانی پوج ءُ چیریں ادارھانی آوار جتگ ءُ بیگواہ کتگ-

دمگی اِھوالکار رِد ءَ مروچی پاکستانی پوج ءَ کُشگ بیتگیں سلام ءِ لاش آئی ءِ کھول دست ءَ داتگ- بلے پوجی کارندہ تنی وھدے آئی ءِ لوگ ڈن ءَ اوشتاتگ اَنت ءُ کجول سر ءَ زور دیگ ءَ اَنت کہ آ پیتے ءَ پچ مہ کن اَنت ءُ زوت کل ءُ کسارت بہ کن اَنت-

سلام کھول ءَ گْوشتگ کہ آیانی سر ءَ سک زور دیگ بیگ ءَ اِنت کہ آ بے توار بہ بنت ءُ لاش ءِ جاور ءَ راج یا رسانکدر دیم ءَ پدر مکن اَنت-

کھول ءَ گوادر ءِ راج ءَ چہ دزبندی کتگ کہ آ آیانی گوم ءَ یکجاھی درشان بہ کن اَنت دانکہ کُشگ بیتگیں سلام بلوچ ءِ واستا انساپ لوٹ بہ کن اَنت-

زانگ بہ بیت ھمے سال ءَ بلوچستان ءَ بندیگیں مردمانی کُشگ تہ ءَ گیشی گندگ اتکگ-