بلوچستان ءِ دمگ کلات ءِ ھند منگچر ءُ کیچ ءِ ھند کولواہ ءَ پاکستانی پورسز ءِ کاروانانی سَے بمب تراک کتگ۔
اے تراک پاکستانی لشکر ءِ کاروان ءِ روگ ءِ وھد ءَ سئے جتا جتائیں جاھاں بوتگ اَنت۔
اھوالدار ءِ رد ءَ تراک ءِ آسر ءَ بیرانیانی ھال بوتگ بلے انگت ءَ واکداراں بیرانی ءُ ٹپیانی ھال ءِ پدر نہ کتگ انت۔
پورسز ءَ تراکاں دمگ انگیر کتگ ءُ پٹ ءُ پول بندات کتگ انت
انگت ءَ اے اُرشانی زمہ واری کس ءَ نہ زرتگ انت۔ بلوچ آجوئی لوٹوکیں سلاھ بندیں گل اے دمگاں پرکار انت کہ پاکستانی لشکر ءَ نشانگ کنگ ءَ انت-
برطانیہ ءِ گیر سرکاری گل ایکشن آن آرمڈ وائلنس ءِ نیمگ ءَ پنچ شمبے ءِ روچ ءَ شنگ بوتگیں رپورٹ ءِ رد ءَ 2024 ءَ پاکستان ھما ملکانی تہ ءَ ھپتمی نمبر ءَ اِنت کہ اودا تراکناکیں سلاھانی سبب ءَ شھریاں گیشتر تاوان رس اتگ۔
رپورٹ ءِ رد ءَ پاکستان ءِ تہ ءَ سرجمیں وت کُش اُرش گیر ریاستی کارکنانی نیمگ ءَ کنگ بوتگ اَنت کہ ایشی ءِ تہ ءَ بلوچ لبریشن آرمی ءِ نام دیم ءَ اتکگ کہ 2024 ءَ بوتگیں 9 وت کُش اُرشانی تہ ءَ ایوک ءَ 2 درسد ءِ زمہ وار بوتگ بلے 2024 ءَ اے زدگیں اُرشانی تہ ءَ 89 درسد (92) بی ایل اے ءِ زمہ وار بوتگ۔