گوستگیں شپ ءَ آواران ءِ دمگ مشکے ءَ نامداریں اھوالکار ءُ روتاک انتخاب ءِ نمائندہ عبداللطیف ء جان مھمد ریاستی کارندھاں شپ ءِ ساھت سَے ءَ وپتگیں واب ءَ کھول ءِ دیم ءَ تیرگواری کتگ ءُ کشتگ-
بلوچ یکجھتی کمیٹی ءِ بنجاھی رھشون ءُ انسانی ھکانی جھدکار سمی دین بلوچ ءِ گْوشگ اِنت کہ ایشی ءَ پیش ھمے سال ءِ 28 فروری ءَ چہ عبداللطیف بلوچ ءِ لوگ ءَ ھمے کھول ءِ ھشت ورنا لشکر ءِ کیمپ ءَ برگ ءُ بندیگ کنگ بیتگ اَنت۔ اولی چار چہ آھاں پد ءَ چاریں رند ءَ کشگ بوتگ ءُ لاش چگل دیگ بیتگ انت کُشگ بوتگیں مردمانی تہ ءَ عبداللطیف ءِ کسان سالیں چک سیف بلوچ ھم ھوار بیتگ۔
آئی ءَ گْوشتگ بلوچستان ءِ تہ ءَ گیر انسانی ءُ سودمانی وئیلانی لڑ روچ پہ روچ گیش بوگ ءَ اِنت، بلے پاکستانی اھوالکار، انسانی ھکانی جھدکار ءُ ریاستی ادارگ اے سنگینیں جاورھال ءِ بے تواری ءِ تماشائی اَنت۔ اگاں شھری ءِ کُشگ جرم اِنت گڑا اے شھری بوتگ اَنت کہ آ وتی لوگاں کُشگ بوتگ اَنت، وھدے کہ آ واب بوتگ اَنت۔ تو اے گپ ءِ سر ءَ چپتے پرچا؟ تھنا ھمے ھاترا کہ آ گوں بلوچستان ءَ سیادی دار اَنت؟ یا پرچا کہ آ گوں زوراکیں ادارہ یا بااسریں ھانداناں ھمگرنچ نہ اَنت؟
وھدے ما اے زُلم ءُ زوراکیانی ھلاپ ءَ توار چست کن ایں گڑا مارا ”پراکسی“ ءُ ”ناشرکار“ ءِ وڑیں لیبل جنگ بیت۔ اگاں ما مدام ھرچ لس مردمانی کُشگ ءِ مذمت کتگ، چہ سرکاری ادارھاں بہ بیت یا گیر سرکاری کارکناں، بلے پرچا ھما کہ مئے زوراکی ءِ وئیلاں مذمت کنگ ءِ لوٹ کن اَنت، سرکاری ادارھانی نیمگ ءَ بوتگیں انسانی ھکانی لگتمالی ءِ سر ءَ بے توار اَنت؟ پرچا اے جرمانی بابت ءَ ریاستی نمائندگاں جست ءُ پرس نہ کن اَنت؟
سمی دین بلوچ ءَ گشتگ کہ ریاستی ادارھانی کنگ بوتگیں اے گیر انسانی سلکاریانی سر ءَ بے تواری ءِ مردم اسل ءَ کینگی انت۔ ایشانی صحافت انسانی ھکانی سر ءَ ایوک ءَ یک نیمگی انت۔ گیر ریاستی اداکارانی زلم ءُ زوراکی ءَ گند اَنت بلے ریاستی کارندھانی جرماں چماں بند کن اَنت۔
آئی ءَ گیش گوشت کہ بی وائی سی ءِ سر ءَ پروپیگنڈا ءُ گمراہ کنوکیں بیانیہ شنگ کنگ ءِ بدل ءَ پاکستانی مین اسٹریم میڈیا بلوچستان ءَ بیا اَنت ءُ زمینی راستیانی سر ءَ تچکیں رنگے ءَ رپورٹ بہ کن اَنت ءُُ بی وائی سی ءِ نیمگ ءَ کنگ بوھوکیں الزام راست ءُ راستی ءِ رد ءَ نہ اَنت۔ پد ءَ مارا اے گپ ءِ سر ءَ باور بوت کنت کہ تئی اھوالکاری ءُ سیاست بے رھبند اِنت۔ اگاں نہ گڑا چپ ءُ چاگرد ءَ را زلم ءِ ھمایت ءُ ھمایت لیکگ بیت۔