گدار آرپ کسہ کنت ءِ سر ءَ چمشانکے
نبشتہ کار: بیبرگ بلوچ
دی بلوچستان پوسٹ
اے گدار ءِ نام آرپ کسہ کنت اِنت ءُ ایشی ءِ نبشتہ کار آرپ وپا بلوچ اِنت، آرپ وپا ءِ پجار زانگ نہ بیت پرچاکہ ھچ جاگہ ءَ ایشی ءِ بابت شون دست نہ کپ اِیت ھیر نبشتہ کار ءِ پجار ءُ نام مانا نہ دار اِیت بلکیں آئی ءِ ساچشت مانا دار اِیت۔ اے گدار ءِ تہ ءَ جاھے بنکی کارست ءُ جاھے لس کارست وتی کسہ ءَ درشان کنگ ءَ اِنت بلے کسہ ءِ تہ ءَ گیشتر لس کارست ANTAGONIST گندگ ءَ کیت-
اے گدار ءِ تہ ءَ یک بل نِگور ءِ جھمنندے ءَ گُلامی نامیں مردے ءَ وتی میتگ ءِ جاور ھال ءِ بابت ءَ جُست کنت کہ میتگ ءِ جاور ھال چون اَنت، گڑا آئی ءَ پسہ دات کہ میتگ ءِ جاور سک نگیگ اَنت اے میتگ ءِ تہ ءَ رستر چُک ، زالبول ، کماش ھچ نہ چار اَنت، آئی ءَ کسہ کت کہ یکروچے لاپ پُریں جنینے رستراں وتی چیک پوسٹ ءِ کر ءَ داشتگ اَت ءُ سھتے ءَ رند لاپ پُریں جنین گوں وتی چُک ءَ بیران بوت۔ آئی ءَ کسہ کت کہ یکروچے اے رستر مئے ھمساھگ ءِ لوگ ءَ پُتر اَنت ءُ لوگ ءِ مردماں گوش اَنت کہ وتی جنین چُک ءَ مارا بدے اِت کہ ما وتی کیمپ ءَ برین ئِے، ھمے جنین ءِ پت بیران بوتگ ءُ برات کسان اَت، ایشی ءِ ناکو ءَ گوشت کہ اگاں ترا جُستے ھست ما وت تئی کیمپ ءَ کارین ئِے، اے شومیں رستر ءَ ھمے ناکو بیھار دات کہ ھرچ وڑ کن ئے اے جنک ءَ بیار، اگاں نیار ئِے ئےگڑا ایشی ءَ گوں من سور بدے یا ایشی ءَ بگوش کہ گوں من پیکچ بہ بو، اگاں اے دوئیں کاراں چہ یک کارے بکن اگاں نکن ئے گڑا شمارا زندگی نیست۔ آئی ءِ مات ءَ گوشت ما بلوچ ایں تو مارا توری ٹکر ٹکر بکن بلے ما چوش ھچبر کت نکن ایں، آئی ءَ گوشت کہ اے ھیرامنڈی ءَ ودی بوتگیں ھرامذادگ نہ زان اَنت کہ مات ءُ گوھار چی اَنت ءُ ایشاں ھُدا ، دین ، ایمان ھچ نیست اے تھنا تُپنگ ءِ زبان ءَ ھبر کن اَنت۔ آئی ءَ گوشت اگاں ما وتی یکجاھی پیش بہ داشتیں گڑا اے لونڈواں ھچبر مئے چُک لوگانی تہ ءَ چہ نہ بُرتگ اَت اَنت۔
آئی ءَ کسہ کت کہ یکروچے کسان سالیں گونڈو ءِ ھوار جنگ ءَ چہ پد آئی ءِ بزگیں مات ءَ کرآن رسترانی کیمپ ءِ سر ءَ بُرت کہ بلکیں ایشاں ھُدا ءِ تُرسے بہ بیت۔ مات ءَ کیمپ ءِ رسترانی گوما پریات کت کہ منی چُک ءَ یل بدے اِت ما ھچ گناھے نہ کتگ اے اللہ ءِ پاکیں کرآن ءَ بچار اِت من یک ماتے آں شمارا ھم مات ھست اشکنگ ءَ بزگیں مات ءِ کُرآن رستراں وتی بوٹاں گوں شاٹ جتگ۔
گلامی ءَ گوشت ما ھم انچوش نہ رک ایں کدی تئی باریگ کیت ءُ کدی منی باریگ اے رستر دُرستاں انچوش ھوار جنت۔ اے کس ءَ نہ بکش اِیت ءُ گوانزگیں تپلاں ھم پھل نہ کنت شرتر ھمیش اِنت کہ ھر روچیگیں مرگ ءَ چہ یکروچے ءِ مرگ گھتر اِنت۔ آئی ءَ پسہ دات کہ تو منی دل ءِ گپ جت ھو اے بار تھنا سرمچارانی کوپگ ءَ مہ بیت بلکیں راج ءِ ھمک پرزند وتی راجی زمہ واری ءَ بہ زانت۔
بل نگور ءِ جھمنند ءَ گوشت کہ منی یک سنگتے ءَ گوں من کسہ کت کہ مرچی باندا ھرچ ماتے وتی چُکاں دراں ڈیھ کنگ ءَ اِنت ءُ وتی سیاداں ھزار منت کنگ ءَ اِنت کہ منی چُک ءَ اے ملک ءَ چہ در بکن ءُ بھرن ءِ پوج ءَ راہ بدے اِت بلے وتی ملک ءِ واستا نمیران مہ بنت۔ آئی ءَ گوشت باید ھمیش اِنت اے ماتاں وتی چُک دست ءَ بہ گپتین ءُ بہ گوشتین اَنت شمئے تُپنگ اِنت برو اِت کوہ ءَ سنگراں بہ اِت۔
بارگ ءُ مامو ھم اے کسہ ءِ کارست اَنت کہ آ ھردوئیں کوہ ءَ اَنت، یکروچے واجہ بارگ ءَ گوں مامو ءَ جُست کت کہ تو وتی لوگ ءِ ھالاں بدے، مامو ءَ وتی ھبر چیر دات ءُ گوشت کہ لوگ ءَ ھیر اِنت۔ بارگ ءَ گوشت کہ مامو مارا چہ ھچ چیز چیر مدے ءُ وتی درداں گوں ما بھر بکن ءُ بگوش کہ مات چون اِنت۔ آئی ءَ پسہ دات کہ من ءَ پھل کن دیر اِنت کہ من لوگ ءَ ھمے کلوہ دیم داتگ کہ من جنگ ءَ شھید بوتگاں من زاناں کہ من رد کتگ بلے اے منی وتی جند ءِ پیسلہ بوتگ کہ لوگ ءُ جنگ نہ بیت ءُ ھر روچ چُکانی نیمگ ءَ چہ ھمے کلوہ کیت کہ لوگ ءِ راشن ھلاس بوتگ اَنت ءُ ھچ نیست ءُ من ھمے مار اتگ کہ لوگ ءِ گم پاھو دیگی اِنت وھدیکہ من لوگ ءِ بابت ءَ جیڑاں گڑا منی جنگ ءِ سر ءَ سان کپ اِیت۔ مامو ءَ گوشت کہ یک جنگولے ءِ مستریں جیڑہ لوگ اِنت، اے تیر ءُ ٹوپ اینکس پریشان نکن اَنت۔ اگاں راست بہ گوشاں منی کر ءَ ابید ءِ تُپنگ ءَ ھچ راہ نیست ءُ من تُپنگ ءَ دور دات نہ کناں، سنگتاں یل دات نکناں ءُ وتی شھیداں دروہ اِت نکناں۔ اگاں راست بہ گوشاں مات سے ماہ پیسر بیران بوتگ۔
ترانگ ھم اے کسہ ءِ کارست اِنت کہ آ زندان ءَ چہ رند آجوئی ءِ جنگ ءَ کوہ شُتگ ،یک سنگتے ءِ جست کنگ ءَ چہ پد آئی ءَ وتی کسہ آؤرت کہ من ءَ دژمن ءَ آوار جتگ کہ تو سرمچاراناں راشن ءُ وردن ءُ وراک دے، ایشاں من ءَ ٹارچر سیل ءِ تہ ءَ بند کت ءُ وڑ وڑیں اذیت دات ءُ اے رستراں منی پاداں سانکل مان کت ءُ درتک ءُ چو پٹبال ءَ من ءَ جت۔ وھدیکہ من ھوش کت گڑا منی چپ ءُ چاگرد ءَ ھون در آیگ ءَ اِت اَنت، ایشاں من ءَ زاہ دات ءُ گوشت کہ بہ من اگاں نہ منّ ئے گڑا تئی جن ءَ کار ایں ءُ تئی دیم ءَ برھنگ کن ایں، ایشاں من ءَ سردیں آپانی تہ ءَ دور دات ءُ منی بدن ھُشک بیت تھنا ساہ روگ ءُ آیگ ءَ اَت۔ ترانگ ءَ دیمتر ءَ گوشت کہ منی کش ءِ کوٹی ءَ چہ رسترانی توار آیگ ءَ اَت کہ بگوش پاکستان زندہ باد پد ءَ دومی نیمگ ءَ چہ ھمے توار پیداک اَت کہ بلوچستان زندہ باد، اے وھد ءَ من ءَ انچوش سما بوگ ءَ اَت کہ گوش ئے منی مرتگیں بالاد ءَ ساھے مان بیت ءُ سھتے ءَ رند تیرانی توار منی گوشاں کپت ءُ لھتیں سپاھی منی کوٹی ءَ اتک اَنت ءُ من ءَ دومی کوٹی ءَ بُرت اِش ءُ من ءَ ھمے شھید بوتگیں سنگت ءِ سر ءَ دور اِش دات ءُ رستراں من ءَ گوشت کہ بچار ما گوں نہ منوکاں چے کت کن ایں ایشی ءَ من ھمینچو تیر جتگ کہ ایشی ءِ مات ھم پجا نیار اِیت ئِے، آئی ءَ گوشت کہ اے کوٹی ھون ءَ چہ سُھر سُھر اَت ءُ شھید بوتگیں سنگت ءِ ھوناں چہ وشبو پیداک اَت، پد ءَ رستراں گْوشت کہ منّ ئے شر نہ من ئے شر تئی ھال ھم انچوش بیت ءُ آجوئی ءِ لوٹ ئے ھمیش اِنت آجوئی-
ترانگ ءَ گْوشت کہ شش ماھی اذیتاں چہ رند گڈسر ءَ من سوبین بوت آں ءُ ایشاں من ءَ گاڑی ءَ دور دات ءُ گْوشت کہ نوں تیار بی ما ترا کُشگ ءَ برگ ءَ ایں، من گْوشت شر اِنت بدن چہ ازاباں یکپارگی آجو بیت، رند ءَ ایشاں من ءَ یل کت ءُ گوشت کہ پُشت ءَ چک مہ جن اگاں جت گڑا تیر ءِ ورگ ءَ تیار بو۔ من داں دیراں دیم ءَ شُت آں ءُ من زانت کہ من نوں آجو بوتگ آں ءُ باج بُرت۔ ترانگ ءَ گڈسر ءَ گوشت کہ نوں ھمیش اِنت تئی دیم ءَ گوں دژمن ءَ جنگ ءَ آں ءُ نوں من ءَ تھنا دژمن ءِ تیرانی ودار اِنت-
اے گدار ءِ وانگ ءَ چہ پد من ءَ انچو سما بوت کہ من ھم اے کارستانی ھمراہ آں ءُ گام پہ گام کسہ گوشدارگ ءَ آں۔ اے گدار ءِ تہ ءَ بلوچ ءِ بزگی، بے وسی، نگیگی جاور، رسترانی زُلم ءُ زوراکی، بلوچانی آوار جنگ ءُ زندان ءَ اذیت دیگ ءُ سرمچارانی جھد ءِ تہ ءَ بزگی ءُ بے آسراتیانی اکس شریں رنگے ءَ درشان کنگ بوتگ اَنت، منی نز ءَ بلوچی لبزانک ءِ بد بھتی اِنت کہ اے وڑیں گدار نہ بوگ ءِ ھساب ءَ اَنت، باید ھمیش اِنت کہ مئے نبشتہ کار ءُ ندکار بے سریں بُنگپانی نبشتہ کنگ ءَ یل بدے اَنت ءُ بلوچ ءِ جھد ءَ وتی بہ لیک اَنت ءُ لبزانکی ھساب ءَ بلوچ ءِ بزگی، بے وسی، درتہ پُچی، گُلامی، گار ءُ بیگواھی، رسترانی زُلم ءُ زوراکی ءَ درشان بکن اَنت وتی کرد ءَ پیلو بکن اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-