ماتانی جھانی روچ – گواڑگ بلوچ

ماتانی جھانی روچ

نبشتہ کار: گواڑگ بلوچ

دی بلوچستان پوسٹ

مروچی دنیا ءِ ھمک کُنڈ ءَ ماتانی میان اُستمانی ءِ روچ برجم دارگ بوگ ءَ اِنت، مروچی دگنیا اے روچ ءَ ماتانی روچ ءِ نام ءَ برجم دار اِیت ھر یکے وتی مات ءَ ساڈاہ اِیت بازینے وتی مات ءِ نام ءَ چندے دانک ھم نبشتہ کنت بلے چوشکہ من بلوچ سر زمین ءِ نندوکاں ءُ بلوچستان ءِ راستی چہ دگنیا ءَ جتا اَنت گڑا من جھد کناں کہ چندے دانک اے روچ ءِ درگت ءَ وتی زمینی راستیانی ھساب ءَ نبشتہ بکن آں –

بلوچستان یک ایردستیں زمینے اد ءَ مات ءُ گھار کجام ھالت ءَ زندگی کنگ ءَ اَنت اے گپ ءَ دگنیا انگت ءَ سرجم ءَ آشنا نہ اِنت-اے ھما سر زمین اِنت کہ اد ءَ مات ءُ گھار دگانی سر ءَ زندگی کنگ ءَ اَنت اے ھما زمین اِنت کہ اد ءَ مات ءُ گھار تھاریں کوٹیانی تہ ءَ بندیگ اَنت اے ھما زمین اِنت کہ اد ءَ مات ءَ ناں ائید ءِ وشی نسیب ءَ اِنت ناں اے دگہ وشی نسیب ءَ اِنت اے ھما زمین اِنت کہ اد ءَ ماتانی وشی تھاریں کوٹیانی تہ ءَ ٹارچر کنگ بوگ ءَ اَنت ھو آیانی تیر سپتگیں کنٹ اے ماتاں سوگات کنگ بوگ ءَ اَنت –

بلوچستان ھما زمین اِنت کہ اد ءَ مات ھما کارست اِنت کہ آ مروچی سرجمیں تھریکے شیف کنگ ءَ اِنت بلوچ مات بلوچستان ءِ مروچی تاریک جوڑ کنگ ءَ اَنت-

بلوچستان ھما جاہ ءَ اِنت کہ اد ءَ مات ءَ وتی جوانیں بچانی تیر سُپتگیں کُنٹ (لاش) گوں وتی دستاں کل کتگ اَنت بلے اُفف تک نہ کن اَنت وھدے بلوچ مات ءِ کارست ءِ شوھازگ ءَ بندات بہ کن ئے گڑ ترا لمّہ یاسمین ءِ وڑیں مات دست کپ اِیت کہ آ وتی جوانیں چک ءِ سر ءَ وت بیرک ءَ بند اِیت ءُ ماتیں سر زمین ءِ واستا کربان کنت لمّہ یاسمین ءِ ڈولیں ھزاراں مات دست کپ اِیت کہ آیاں وتی چک برات پت پہ وتن ءِ آجوئی ءِ ھاتر ءَ کربان کتگ اَنت ھزاراں چُشیں مات من دیستگ کہ آیانی بچ سالانی سال زندانی اَنت بلے اے ماتانی توکل چو کوہ ءِ باتیل ءَ برز اِنت-

بلوچستان ءِ تہ ءَ لبز ءِ مات ءِ ارزشت انچُش باز اِنت کہ اد ءَ زمین ءَ مات ءِ نام دیگ بوتگ بلوچ ءِ مھر گوں وتی زمین ءَ چُک ءُ مات ءِ مھر ءِ وڑ ءَ اِنت انچُش کہ یک ماتے ءَ وتی چُک دوست بیت ءُ چکے ءَ وتی مات ھمے وڑ ءَ بلوچ ءَ وتی مادریں وتن وتی سر زمین دوست اِنت –

میان اُستمانی ماتانی روچ ءَ بلوچ ءِ ھما سُرمگیں ھاک ءِ نام ءَ اوں ھما گمنام ماتانی نام ءَ کہ اے سر زمین ءِ آجوئی ءِ ھاتر ءَ ھرچ وڑیں کربانی دیگ ءَ چک ءُ پد نہ بوتگ اَنت ءُ مدام پہ کربانی دیگ ءَ جاڑیگ اَنت-

مروچی روچ بلوچستان ءِ نام ءَ کہ ھمک نیمگ ءَ شورھانی بوہ ءُ ھونانی جو تچگ ءَ اَنت،گڈسر ءَ من پھلی لوٹاں چہ وتی ماتیں وتن ءَ کہ من آئی ءِ ھک انچُش باز اِنت کہ من اے ھک ءَ ادا کت نہ کن آں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-