ھال شنگ کنوکیں ادارہ بی بی سی ءَ ھندوستان ءِ درور دیان ءَ گوشتگ کہ سَے شمبے ءُ چار شمبے ءِ میانی شپ ءَ پاکستان ءِ زیردستیں کشمیر ءَ ’آپریشن سندور‘ ءِ درچ ءَ ناشرکارانی بنجل نشانگ کتگ انت – پاکستان ءِ پوج ءِ گوشگ انت کہ انڈیا ءِ اے اُرشاں زھگ ءُ زالبولاں ھوار ھشت شھری بیران ءُ سِی ءُ پنچ مردم زدگ بیتگ انت ءُ دو مردم بیگواہ انت-
پاکستانی پوج ءِ جارکش لیفٹینٹ جنرل اھمد شریف چوھدری ءَ گوشتگ داں انگت ءَ سر بیتگیں اھوالانی رد ءَ انڈیا ءَ شش جاھاں جتا جتائیں اُرشاں بیست ءُ چار اُرش کتگ انت-
سَے شمبے ءِ شپ ءَ یک درشانے ءَ پاکستانی پوج ءِ جارکش ءَ گوشتگ انڈیا ءِ نیمگ ءَ پاکستان ءِ اُستان پنجاپ اھمد پور شرقیہ، مریدکے، سیالکوٹ ءُ شکر گڑھ ءُ پاکستان ءِ زیردستیں کشمیر ءِ کوٹلی ءُ مظفر آباد نشانگ کتگ انت-
انڈیا ءِ سرکار ءَ پاکستان ءُ آئی ءِ زیردستیں کشمیر ءِ نُھ جاھاں ناشرکارابی انفراسٹرکچر ءِ نشانگ کنگ ءِ ٹاہ داتگ ءُ آئی ءِ ٹاہ انت کہ اے اُرشاں لس مھلوک ءُ پوجی بنجل نشانگ کنگ نہ بیتگ انت-
پاکستانی پوج ءِ جارکش لیفٹینٹ جنرل اھمد شریف چوھدری ءَ بی بی سی ءَ یک انٹرویو ءَ گوشتگ انڈیا ءِ میزائل اُرشاں پد پاکستان ءَ انڈیا ءِ برزی دو جنگی جھاز ءُ یک ڈرونے دور داتگ انت-