دے اسرائیل لابی (The Israel Lobby)
نبشتہ کار: زِرد بلوچ
دی بلوچستان پوسٹ
اے کتاب(The Israel Lobby) ھستیں وھد ءِ دو تنک ٹینک ءُ میان استمانی سیاست زانت جھون جے میئرشائمر ( John J. Mearshimer ) ءُ اسٹیپن ایم والٹ (Stephen M. Walt) ءَ ھواری ءَ نبشتہ کُتگ۔ بندات ءَ اے سرھال ءِ سر ءَ یک آرٹیکلے ءِ درُوشم ءَ کار کنگ بوتگ ءُ دیمتر ءَ 2006 ءَ اے کتاب ءِ تہ ءَ مٹ کنگ بوتگ۔
اے کتاب گیشی اسرائیل ءِ ماں امریکہ ءِ Foreign policy ءِ سر ءَ سانمند بوگ ءُ لابی(Lobby) برورد ءَ میان استمانی ءُ سیاست ءُ ھاس مڈل ایسٹ ءِ تہ ءَ اسرائیل ءِ نپانی رکینگ ءِ سر ءَ باوست کنت۔ اے کتاب اسرائیل ءِ وتی نپانی پاھازگ ءِ ھاتر ءَ جوڑ کتگیں لابی ءِ سر ءَ ھم باوست کنت۔ نبشتہ کار امریکہ ءِ اسرائیل ءَ بے کساس کُمک ءِ سر ءَ باوست کنان ءَ گْوشت ئِے کہ امریکہ ءِ نیمگ ءَ چہ آیوکیں اے کساس ءَ کُمک اسرائیل ءِ تہ ءَ ڈیموکریٹک لوٹ ءُ اسٹریٹجک نپانی بنیات ءَ ناں بلکیں اے اسرائیل ءِ جوڑ کُتگیں لابی ءِ برورد اِنت۔
امریکہ ءِ پہ اسرائیل ءَ Unconditional کُمک ءُ اخلاقی مدت ءِ سبب ءَ امریکہ ءَ سانمند کنوکی اسرائیل ءِ جوڑ کُتگیں لابی اِنت۔ امریکہ ءِ نیمگ ءَ رس اِتگیں کُمک تھنا اخلاقی نہ اَنت بلکیں آیانی تہ ءَ مزنیں کچے ءَ مالی، پوجی ءُ ڈپلومیٹک کُمک ھوار اَنت کہ آ امریکہ ءِ نیمگ ءَ چہ دگنیا ءِ دگہ ھچ استان ءَ دیگ نہ بوتگ اَنت۔
اگاں ما امریکہ ءِ نیمگ ءَ چہ اسرائیل ءَ رس اِتگیں زری(Economic) کُمک ءِ ھبر ءَ بہ کنیں گُڑا امریکہ ءِ مڈیانی دپ ھرچ وھد ءَ پہ اسرائیل ءَ پچ بوتگ۔ انچوش کہ مارا گندگ ءَ کیت، 2006 ءِ اسرائیل ءُ فلسطین جنگ ءِ وھد ءَ 154 بلین ڈالر امریکہ نیمگ ءَ چہ اسرائیل ءَ دیگ بیت کہ آ دوبر لوٹگ ھم نہ بوتگ اَنت۔امریکہ ھمُک سال اسرائیل ءَ 3 بلین ڈالر ءِ کُمک کنت کہ اے امریکہ ءِ سرجمیں Foreign Aid Budget ءِ 1/6 بھر اَنت۔ پیش ءَ اسرائیل ءَ ھرچ کُمک کہ کنگ بوتگ آ وام(Loan) ءِ دروشم ءَ دیگ بوتگ اَنت بلے 1974 ءَ پد بازیں جنگی کُمک Grant ءِ شکل ءَ دیگ بوگ ءَ اَنت۔
ھمے داب ءَ ما اسرائیل ءِ جنگی(Military) کُمک ءَ بہ چار ایں داں گندگ ءَ کیت کہ امریکہ ءِ ھرچ وھد ءَ لوٹ ھمیش بوتگ کہ اسرائیل مڈل ایسٹ ءِ تہ ءَ جنگی ھوالہ ءَ مُھکم بہ بیت۔ اگاں ما اسرائیل ءِ Advanced جنگی سلاھاں بہ چار ایں کہ آیانی تہ ءَ F-15، F-16، بلیک ھاک(Black Hawk) ھیلی کاپٹر ءُ دگہ بازیں جنگی ساز ءُ سامان ھوار اَنت کہ درست چہ امریکہ ءِ نیمگ ءَ اسرائیل ءَ رس اِتگ اَنت۔
اسرائیل ءَ امریکہ ءِ نیمگ چہ نہ کُٹوکیں ڈپلومیٹک(Diplomatic) کُمک رس اِتگ۔ آیاں چہ یکے ایش اِنت کہ امریکہ ءَ سرجمیں استانی Nuclear Programs داشتگ اَنت یا آیانی سر ءَ بندش جتگ بلے اسرائیل ءِ سر ءَ مارا چُشیں ھچ بندش گندگ ءَ نئیت ءُ آئی ءِ نیوکلیر پروگرام ھم دارگ نہ بوتگ اَنت۔
دیمتر ءَ ما اسرائیل ءِ ارزشت ءَ امریکہ چماں بہ چارا ایں داں مارا سما بیت کہ اسرائیل ءِ Importance امریکہ چماں ھمک وھد ءَ یک ھساب ءَ نہ بوتگ۔ سرد جنگ ءِ وھد ءَ امریکہ ءَ اسرائیل بے کساس کُمک کُتگ بلے انوگیں وھد ءَ اسرائیل ءِ ارزشت امریکہ ءِ کر ءَ کم بوتگ۔ بلے اے گپ یات بہ بیت کہ اسرائیل ءِ ارزشت ھلاس نہ بوتگ بس کم بوتگ۔
اگاں ما اسرائیل لابی (Israel Lobby) ءِ جند ءَ سرپد بوگ ءِ جُھد ءَ بکنیں گُڑا مارا گندگ ءَ کیت کہ اسرائیل ءِ نیمگ ءَ پہ وتی نپانی رکینگ ءِ ھاتر ءَ جوڑ کُتگیں لابی ءِ تہ ءَ آئی ءِ سیاسی ٹولی، رسانکدر (Media) ءُ تنک ٹینکانی مزنیں اسر رسوکے گندگ ءَ کیت۔ اے لابی امریکہ ءِ پالیسیانی سر ءَ سان دور دیگ ءُ اسرائیل ءِ نپانی رکینگ ءِ ھاتر ءَ لابی ءِ تہ ءَ ھواریں Think Tanks، میڈیا ءُ وانگی ادارھاں گیش کارمرز کنت۔
دیمتر ءَ کتاب مڈل ایسٹ ءِ تہ ءَ امریکہ ءِ دری پالیسی(Foregin Policy) یانی سر ءَ باوست کنت کہ چوں اسرائیل ءِ اڈ داتگیں لابی ءَ مڈل ایسٹ ءِ تہ ءَ امریکہ دری پالیسی سانمند کُتگ اَنت. آ پالیسی فلسطین ءِ هلاپ ءَ امریکہ ءِ پالیسی بہ بنت، عراق جنگ، شام ءُ ایران هلاپ ءَ امریکہ ءِ پالیسی بہ بنت یا کہ لبنان جنگ ءِ تہ ءَ اسرائیل ءِ کُمک کنگ بہ بیت.
اگاں ما فلسطین ءِ جیڑہ ءِ تہ ءَ لابی ءِ کردار ءَ چارگ ءُ ٹپاسگ ءِ جُھد ءَ بہ کنیں داں سما کنگ بیت کہ اسرائیل لابی ھما پالیسی یا پیسلہ یاں رد کنت کہ آ اسرائیل ءُ فلسطین ءِ میان ءَ جنگ بندی یا امن ءِ سر ءَ زور دینت ءُ بازیں انچیں ویل ھم بوتگ اَنت کہ لابی ءِ سان ءِ سبب ءَ امریکہ ءَ اسرائیل ءِ پلا مرزی کُتگ۔ چوشکہ، 1993 ءِ اوسلو منگ نامہ بہ بیت کہ آئی ءَ پد ءَ ھم امریکہ اسرائیل ءِ ھک ءَ بوتگ، 2000 ءِ Camp David مزاکرات بہ بیت کہ آئی ءِ تہ ءَ ھم امریکہ ءَ فلسطین ءِ مؤقف رد کُتگ ءُ انتفاضہ 2000-2005 ءِ وھد ءَ ھم امریکہ ءَ اسرائیلی ارُشانی پلا مرزی کُتگ۔
ھمے داب ءَ عراق ءِ جنگ ءِ بابت ءَ نبشتہ کار لک اَنت، اسرائیل لابی ھاس کر نیوکانزرویٹو(Neoconservative) ٹولی ءَ عراق جنگ ءِ ھاتر ءَ امریکہ ءِ سر ءَ سک باز زور داتگ۔ اے رد ءَ چندے ویل ھست اَنت کہ آ اے ھبر ءَ گیش پدر کن اَنت۔ چوشکہ 9/11 ءَ پد صدام حسین ءَ اسرائیل ءُ ھمے ھند ءُ دمگانی ھاتر ءَ ترس ءِ لیکہ ءُ جنگ ءِ پلا مرزی کنگ، 2003 ءَ عراق ءِ سر ءَ ارُش ءِ وھد ءَ AIPAC ( اسرائیل لابی تہ ءَ پر ارزشت داریں ٹولی یے) ءُ دگہ ٹولیاں جنگی بیانیہ گیش مُھکم کُتگ۔ اے جنگ ءَ ناں تھنا مڈل ایسٹ سُرینتگ بلکیں ایران ھم گیش مُھکم کُتگ کہ آ اسرائیل ءِ ھاتر ءَ سک مزنیں تُرسے۔
شام ءُ ایران ءِ ھلاپ ءَ امریکہ نیمگ ءَ چہ دیم ءَ آؤرتگیں پالیسیانی تہ ءَ ھم لابی ءِ سک ءَ مزنیں دزمانجی گندگ ءَ کیت کہ آئی ءَ امریکہ ایران ءُ شام ءِ ھلاپ ءَ ترُندیں پالیسیانی آرگ ءَ مجبور کُتگ۔ آ پالیسیانی تہ ءَ استانانی سر ءَ پابندی جنگ ءُ رجیمانی مٹ کنگ ءِ پالیسی ھوار اَنت ءُ اے پالیسیانی بنُکی مول ءُ مراد اسرائیل ءِ نپانی رکینگ اِنت۔
لبنان جنگ ءِ تہ ءَ لابی کرد ھم ھمے داب ءَ گندگ ءَ کیت۔ وھدے کہ اسرائیل ءَ حزب اللہ ءِ سر ءَ ارُش کُتگ گڑا امریکہ ءَ ناں تیوک ءَ اے جنگ ءِ پلا مرزی کُتگ بلکیں میان استمانی سطح ءَ اے جنگ ءِ سر ءَ نگد ھم کُتگ۔ ءُ لبنان جنگ ءِ جنگ بندی ءِ ھاتر ءَ ھم امریکہ ءَ میان استمانی جُھدانی دیم ءَ اڑاند پیداک کُتگ۔ ھمے عملانی سبب ءَ لبنان ءِ جمھوری حکومت نزور بوتگ ءُ ایران ءُ حزب اللہ گیش مُھکم بوتگ کہ ایشی ءَ چہ امریکہ ءَ گیش تاوان رس اِتگ۔
اد ءَ چہ اے شے پدر بیت کہ ھمک وھد ءَ اسرائیل لابی ءَ امریکہ ءِ پالیسی ھما نیمگ ءَ بُرتگ اَنت کہ آ مڈل ءُ امریکہ دوئینانی نپانی ھلاپ ءَ بوتگ اَنت۔ ھمے پالیسیانی سبب ءَ مڈل ایسٹ ءِ جاور گیش ھراب بوتگ اَنت۔ نبشتہ کار گُش اَنت کہ اے پالیسیانی سبب ءَ تھنا امریکہ ناں بلکیں اسرائیل ءَ ھم ھمے رنگ ءَ تاوان وارتگ۔ چرے ویلاں اسرائیل ءِ سلامتی ھم تُرس ءِ آماچ بوتگ۔
اے کتاب ءِ وانگ ءَ پد ما اے سرپد بیت کنیں کہ میان استمانی سیاست ءُ تاکت ءِ لیب ءِ تہ ءَ میان استمانی تاکت وریں استانانی اڈ داتگیں لابیانی سک ءَ مزنیں اسر رسوکے گندگ بیت اِنت۔ پاور ءِ تہ ءَ استان لابیاں پہ وتی سیت ءُ نپانی رکینگ ءِ ھاتر ءَ کارمرز کن اَنت ءُ مُھکمیں لابی استاناں گیش مُھکم کنت۔ مرچیگیں وھد ءَ ما اگاں امریکہ ءَ بچاراں ھستیں دگنیا ءِ تہ ءَ سرد جنگ ءَ پد ایوک ءُ تھنائیں تاکت زانگ بیت، آئی ءِ پشت ءَ ھم سک ءَ مزنیں کچے ءَ آئی ءِ جند ءِ جوڑ کُتگیں لابی ءُ ٹولیانی دست ءَ مان اِنت۔ ھمے داب ءَ اگاں ما اسرائیل ءُ لابی یے گپ ءَ بہ کنیں گُڑا زانگ بیت کہ یھودیانی یورپ ءُ دگہ ھند ءُ دمگاں چہ آیگ ءُ فلسطین وڑیں زمین ءِ سر ءَ جاگہ کنگ، ناں تھنا جاگہ کنگ بلکیں وتی یک استان ءِ وجود ءَ آرگ ءِ پشت ءَ ھم اسرائیل ءِ جوڑکُتگیں لابی ءِ کمال اِنت کہ آئی ءِ ھما وھد ءِ تاکت اے چیز ءِ سر ءَ جاڑیگ کُتگ اَنت کہ مڈل ایسٹ ءِ تہ ءَ چہ فلسطینیاں گیش ما شُمئے نیاں رکینت کن ایں۔ اسرائیل ءِ اے کچ ءَ وتارا منارینگ ءُ دری کُمک گرگ ایوک ءُ تھنا اسرائیل ءِ اڈ داتگیں لابی ءِ برورد اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-