آشوب کیوبہ – تنویربلوچ

آشوب کیوبہ

نِبشتہ کار : تنویر بلوچ

دی بلوچستان پوسٹ

ما اگاں کیوبہ ءِ گوستانک ءِ سر ءَ چمشانکے بدے ایں گڑا مارا 1492 ءِ دھک دیم ءَ کیت کہ Christopher Columbus کیوبہ ءَ نام دات۔ Columbus ءِ پَٹ ءُ پُول کنگ ءَ پد کساس چار سد سال (1492-1892)ءَ کیوبہ Spain ءِ ایردست بیت۔ 1892 ءِ میان ءَ Spain ءُ America ءِ وت ماں وتی تھی جیڑھانی سبب ءَ ایشانی نیام ءَ یک معادہ( Paris معادہ) ءِ نام ءَ کنگ بیت۔ ھمے معادہ ءَ پد 20 مئی 1902 ءَ کیوبہ آزات بیت۔ امریکہ اولی ملک بیت کہ کیوبہ ءِ آجوئی ءِ پَلہ مُرزی ءَ کنت۔

آجوئی ءَ چہ پَد ھم کیوبہ سرجم ءَ وت واک نہ بیت ایشی ءِ تھی جیڑھانی گیش ءُ گیوار ، زری معاملہ ءُ ڈنی پالیسیاں امریکہ وتی دست ءَ مان کنت۔ ھمے وڑ ءَ امریکہ کیوبہ ءِ سرجمیں چیزاں وتی دست ءِ چیر ءَ کنت ءُ کیوبہ ءَ دوبر وتی ایردست جوڑ کَنت۔ امریکہ ءِ زُلم ءُ زوراکیانی بگیری ءَ پد کیوبہ ءِ تہ ءَ کسان ءُ مزنیں چِست ءُ ایر بندات بنت۔ امریکہ ءِ زُلم ءُ زوراکیانی ھلاپ ءَ 1920 ءَ یک کمیونسٹ پارٹی یے دیم ءَ کیت ءُ دگہ ھم کسان ءُ مزنیں پارٹی جُھد ءَ بندات کن اَنت۔

ھمے چِست ءُ ایرانی نیام ءَ بازیں نام مئے دیم ءَ کیت کہ آھانی تہ ءَ فیڈل کاسترو ءُ چی گویرا ھما اولی نام اَنت کہ کیوبہ ءِ آجوئی ءِ تہ ءَ اولی سپ ءَ اُوشتوک بوتگ اَنت۔

فیڈل کاسترو 13 اگست 1926 ءَ ودی بیت ءُ ھوانا یونیورسٹی ءَ کانون ءِ ڈگری ءَ گیپت۔ آ چہ وتی نودربری زمانگ ءَ چپی دست ءِ سیاست ءَ گوں باز نزیک بوتگ۔ ھمے زمانگ ءَ کہ کاسترو شاھدربرجاہ ءَ وانگ ءَ بیت گڑا بٹیسٹا امریکہ ءِ چیردستی ءَ کیوبہ ءِ سروک بیت۔ بٹیسٹا ءِ پَوج کیوبہ ءِ لس مھلوک ءِ سر ءَ ھرچ وڑیں زوراکی کن اَنت آیانی زمین ءَ وتی کن اَنت ءُ آھاں چہ ٹیکس گِر اَنت ءُ ھمک روچ آھاں لٹ ءُ کُٹ کن اَنت۔

ھمے وھد ءَ کہ امریکہ کیوبہ ءَ وتی ایردست کنت گڑا آ کیوبہ ءِ پالیسی ءَ ٹھین اِیت کہ ھِچ کس دو رند ءَ ھکومت ءَ اتک نہ کنت۔ 1953 ءَ وھدے گچینکاری بوگ ءَ بنت گڑا بٹیسٹا جھد کنت کہ دوبر گچینکاری ءَ بھر بزور اِیت ءُ ھکومت ءَ بہ بیت۔ گڑا کیوبہ ءِ لس مھلوک بٹیسٹا ءِ ھِلاپ ءَ یک روانکے کَش اَنت کہ بٹیسٹا ءِ پوج روانک ءِ سر ءَ اُرش کنت ءُ مھلوک ءَ لٹ ءُ کُٹ کَنت۔ ھمے اُرشاں چہ پد کاسترو ءُ آئی ءِ دگہ لھتیں ھمراہ ھمے مار اَنت کہ پُر ایمنیں جھد ءَ ھِچ آسر نیست گڈا آ سلاہ بندیں جھد ءِ پیسلہ کن اَنت۔

کساس 120 مردماں گوں ھوار کاسترو سلاہ بندیں جھد ءَ بندات کَنت۔ 26 جولائی 1953 ءَ آ وتی اولی اُرش ءَ بٹیسٹا ءِ مونکیڈا پُوجی بیرکانی سر ءَ کن اَنت کہ اے ل اُرش سوبمند نہ بیت ءُ ھمے اُرش ءِ سوب ءَ بٹیسٹا کاسترو ءِ سر ءَ کانون ءَ چپ روگ ءِ سر ءَ بُھتام جنت ءُ کاسترو گوں وتی ھمراھاں تاں دو سال بندیگ کنگ بیت۔

1955 ءِ بندات ءَ آ یلہ کنگ بنت ءُ کاسترو گوں وتی ھمراھاں درانڈیھ کنگ بیت۔ درانڈیھی ءَ پد کاسترو میکسیکو ءَ روت کہ اود ءَ آئی ءِ برات راول کاسترو پیسر ءَ چے ھمو ءَ بیت۔ میکسیکو ءِ روگ ءَ پد کاسترو دوبر دُز جَنگی ءِ جھد ءِ تیاریاں بندات کنت کہ آ ھمک فیلڈ ءَ چہ تعلق داروکیں مردماں وتی گروپ ءَ ھوار کنت۔ ھمے نیام ءَ کاسترو گوں چی گویرا دوچار کپ اِیت ءُ اولی گند ءُ نند ءَ چی گویرا کیوبہ ءِ آجوئی جھد ءَ ھوار بیگ ءَ رازی بیت ءُ چی گویرا جھد ءَ ڈاکٹر ءِ ھیسیت ءَ ھوار بیت۔

کاسترو ھمد ءَ وتی یک گروپے تیار کنت کہ کساس 82 مردم ھوار بنت ءُ ھیمشانی گوریلہ جھد ءِ تربیت کنگ ءَ بندات کنت۔ سرجمیں یک سالے تربیت کنگ ءَ پَد 2 دسمبر 1956 ءَ آ چہ آپی راہ ءَ کیوبہ ءِ دمگ “الیگری یا ڈی پیو” ءَ رو اَنت کہ اود ءَ سَر بوگ ءَ گوں بٹیسٹا ءِ پوج آھانی سر ءَ اُرش کنت کہ آھانی گیشتر سنگت شھید کنگ بیت۔ کاسترو، راول ءُ چی گویرا ءَ ھوار 20 مردم پشت کپ اِیت۔

کاسترو گوں ھمے کَمُّکیں کچ ءَ وتی گوریلہ کاروائیاں برجاہ دار اِیت۔ اے میان ءَ کسان ءُ مزنیں جڑپ کن اَنت ھمے جڑپانی سبب ءَ آ بٹیسٹا ءِ پوج ءَ مزنیں کچے ءَ تاوان دے اَنت ءُ توپک ءُ دگہ جنگی ساز ءُ ساماناں دزگیر کن اَنت۔ کاسترو ھمے گوریلہ جھد ءَ “26 جولائی مومنٹ” ءِ نام ءَ دانت کہ اے ھما سنگتانی نام ءَ اِنت کہ 26 جولائی 1953 ءَ شھید کنگ بوتگ اَنت۔

سرجمیں 2 سال ءِ جنگ ءَ پَد 1 جنوری 1959 ءَ بٹیسٹا ءِ پوج پروش وارت ءُ کیوبہ ءَ یلہ کنت روت اے گپ کیوبہ ءِ تہ ءَ ھما وڑ ءَ شِنگ ءُ تالان بیت کہ آس ھُشکیں جنگل ءَ اے گپ وھدے کاسترو ءِ کِر ءَ سر بیت گڑا کاسترو وتی پوج ءَ ھُکم دنت کہ ھمینچو زوت بیت کنت سرجمیں کیوبہ ءَ وتی دست ءَ بکن اَنت ءُ دیر نہ بیت کہ سرجمیں کیوبہ کاسترو ءِ پوج ءِ دست ءَ بیت۔ اے وھد ءَ کاسترو ءِ پوج ءِ کچ 3000 بیت کہ کیوبہ ءِ دوبر آجوئی ءَ گِر اَنت۔

کیوبہ ءِ دوبر آجوئی ءَ پد امریکہ اولی ملک بیت کہ آئی آجوئی ءَ من اِیت بلے انچو کہ کاسترو سوشلزم ءِ منوگرے بیت ءُ آئی ءِ گیش واھگ گوں سویت یونین ءَ بندوک بنت ءُ دیر نہ بِیت کہ امریکہ 1961 ءَ کیوبہ ءِ سر ءَ پابندی جنت۔

انچو کہ ما پیسر ءَ گشتگ اَت کہ کاسترو گوں 3000 ورنایاں امریکہ وڑیں تاکتے پروش دنت ءُ وتی زمین ءَ آجو کنت۔ دنیا ءِ نیام ءَ ھرچ چونیں ھم زور آورے بہ بیت آئی پُروش دیگ ءِ ھاتر ءَ مھکمیں پگر ءُ مھکمیں لیکہ درکار اَنت آ گوں تئی زمینی راستیاں نزیکی بکن اَنت۔ آجوئی ءِ گرگ ءِ ھاتر ءَ مھکمیں پگر ءُ مھکمیں لیکھانی بُنیات مھکمیں گَل ءُ پارٹی درکار اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانیانت –