بلوچ اسٹوڈنٹس کونسل پنجاب ءِ نیمگ ءَ چہ لاھور پریس کلب ءِ دیم ءَ زھرشانی برجم دارگ بیتگ چریشی ءَ بلوچستان ءَ برجاہ ریاستی زوراکی، شال ءَ کُشت ءُ کوش ءُ بلوچ یکجھتی کمیٹی ءِ سروک ڈاکٹر ماہ رنگ بلوچ ءَ ھوار دگہ مردمانی گیر کانونی آوار جنی ءِ ھلاپ ءَ زھرشانی نکش کنگ بیتگ-
لاھور زھرشانی ءَ بلوچستان ءَ ریاستی زوراکی ءُ تاکت ءِ بے کساس کارمرز ایر جتگ ءُ لوٹ کتگ کہ بلوچستان ءَ تاکت کارمرز زوت بند کنگ بہ بیت – آیاں گْوشتگ کہ ڈاکٹر ماہ رنگ بلوچ ءُ دگہ آوار جنگ بیتگیں مردمانی زوت یل کنگ ءِ لوٹ ھم کتگ-
ھمے میان ءَ بلوچ نودربراں جتاجتائیں شھدگانی سر ءَ روانک کشان ءَ ناراہ جتگ-
بلوچستان ءَ ریاستی کریک ڈاؤن زھرشانی کنوکانی کوش ءُ دزگیریانی ھلاپ ءَ بلوچستان ءَ ھوار پاکستان ءِ دگہ شھراں زھرشانیانی دْرچ برجاہ ءَ اَنت، ھب چوکی ءُ تربت بلوچ گلانی نیمگ ءَ چہ نندانک دیگ بیگ ءَ اِنت وھدے کہ باندا کراچی ءَ زھرشانی روانکے برجم دارگ بیگ ءَ اِنت-
زھرشانی کنوک دزگیری ماہ رنگ بلوچ آئی ءِ ھمراھانی یل کنائینگ ءُ ریاستی پوج ءِ نیمگ ءَ چہ کُشگ بیتگیں زھرشانی کنوکانی واستا انساپ لوٹ کنگ ءَ اَنت-