بلوچ اسٹوڈنٹس ایکشن کمیٹی ءَ ماِ کراچی ءَ برجم کتگیں صباء فیسٹیول ءِ سرجمیں اھوال شنگ کنان ءَ گوشتگ صباء یک کندیلے اَت کہ بلوچ چاگرد ءَ رُژنا کنگ ءِ سپر ءَ نمیران بوت، بلے اے فیسٹیول پَدّر کنت کہ صباء ءِ پگر ءُ کاروان روچ ءِ مرچی ھم بلوچ ورنایانی دروشم ءَ زندگ اِنت ۔
بلوچ اسٹوڈنٹس ایکشن کمیٹی ءِ نیمگ ءَ صباء لٹریری فیسٹیول، ملیر ءَ سوبمندی ءَ گوں برجم دارگ بوت، اے یک روچی مراگش ءَ جتائیں زانت ءُ زانشتی بھر ھوار بیتگ اَنت ۔بلوچ ءِ راجدپتری کوھن تریں سرڈگاراں چہ یکے ملیر ءَ 23 استپان (فروری) ءَ برجم داشتگیں صباء لٹریری فیسٹیول ءَ گُشتانک، پینل ڈسکشن،لمئی بولی کتابُک ءِ دیمدرائی، پٹ ءُ پولی تاک، ڈاکیومنٹری،کسمانک، ٹیبلو، زھگانی گام بھر ءُ نمیرانیں کمانچر بلوچ ءِ نام ءَ آرٹ ایگزبیشن ھوار بیتگ اَنت، مراگش ءَ بنجاھی سنگتاں ھوار مزن مزنیں بلوچ زانتکار،استاد، ادیب ءُ سیاسی جھدکاراں وتی ھیال درشان کتگ اَنت۔
مراگش ءِ بندات گوں بلوچ راجی سوت ءَ کنگ ءَ پد نمیرانیں صباء ءِ سر ءَ پنتاک ءُ نبشتانکی تاکے وانگ بیتگ، دیمتر ءَ نمیرانیں صباء ءِ سر ءَ پینل ڈسکشنے اَت کہ مھمان رمضان بامری،اصغر علی آزگ ءُ ظریف بلوچ بیتگ اَنت ءُ دیوان ءِ مھمانداری مُزیر بلوچ ءَ کُتگ، دیم ءِ پینل ڈسکشن کراچی ءَ بلوچ ءِ ھستیں جیڑہ ءِ سرھال ءِ سر ءَ نور بلوچ ءَ مھمانداری کتگ ءُ مھمان حفیظ بلوچ ءُ زرخان بلوچ بیتگ اَنت۔گُشتانکی بھر ءِ تہ ءَ بلوچ نبشتہ کار ءُ تجزیہ نگار انور ساجدی ءَ بلوچ سیاست ءُ ھستیں دور، پروفیسر ڈاکٹر فاروق بلوچ ءَ بلوچ ءُ بلوچستان ؛ اھدی دپتری پُژدر ،بساک ءِ بنجاھی مزن کارگشاد اظہر بلوچ ءَ بلوچ نودربر ءُ سیاسی گھگیری ءُ بساک ءِ بنجاھی ھالرسانی کارگشاد اُزیر بلوچ ءَ صباء لٹریری فیسٹیول ءِ ارزشت ءُ سوبمندی ءِ سرھالانی سر ءَ تران کتگ۔ ایشی ءَ پد پٹ ءُ پولی تاکانی تہ ءَ کندیلیں صباء ءِ رزوان بلوچ، رند ءُ لاشار ءِ جنگ ءِ غلام رسول کلمتی ، رسانکدر ءُ بلوچ راج ءِ فہد بلوچ، بانل دشیاری ءِ شاہ تاج بلوچ ءُ کراچی ءَ بلوچ راجی سیاست ءِ پُژدر ءِ تاک پیرجان بلوچ ءَ ونتگ اَنت۔ مراگش ءَ چار ڈاکیومنٹری پیش کنگ بیتگ کہ چو اے ڈول ءَ اَنت ؛کندیلیں صباء، بلوچستان کتاب کاروان، نمیرانیں مبارک قاضی ءُ نشہ آماچیں بلوچ ءِ سرھال بیتگ اَنت، اشاں پد گام بھر ءِ تہ ءَ زھگانی گپ ءُ ترانے ‘ کْوھنیں ملیر ءُ نوکیں ملیر’ ءِ سر ءَ ھوار، گام چاپ،گام پریزنٹیشن ، گام کسہ ءُ گام آرٹس ءَ ھوار بیتگ اَنت۔دیمی بھرانی تہ ءَ چہ سُر سنگار ازمی مجلس ءِ نیمگ ءَ نمیرانیں صباء ءِ سر ءَ ‘بیا او مُرید’ ءِ نام ءَ کسمانکے ءُ دلیریں شیرزال نمیرانیں صبین محمود ءَ دروت ندر کنان ءَ آئی ءِ سر ءَ یک کسمانکے پیش کنگ بیتگ ۔ ھمے پیم ءَ نمیرانیں کمانچر بلوچ ءِ نام ءَ آرٹ ایگزبیشن ءِ ھم بھرے ھواربیتگ ءُ اود ءَ بلوچ آرٹسٹ ءُ اکس کشّاں مھروان آرٹ اکیڈمی ءُ حمل سالار ءَ ھوار اے دگراں وتی آرٹ ءُ اکسانی اسٹال جنگ ءَ ھوار آیانی دیمدرائی ھم کتگ۔مراگش ءَ ‘لمئی بولی’ کتابُک ءِ دیمدرائی ھم کنگ بیتگ ءُ بلوچستان کتاب کاروان ءِ کتاب اسٹال ءُ سید ریفرینس کتابجاہ ءِ کتاب اسٹالے ھم برجم دارگ بیتگ۔
دیوان ءَ انور ساجدی ءَ تران کنان ءَ گوشت کہ نی ھما وھد اتکگ کہ ما راستیں گپ ءَ بہ کن ایں ءُ تاریخ ءَ تچک بہ کن ایں ، پہ راجی نپانی ھاتر ءَ کسی لھاز کنگی نہ اِنت، دوھزار ءَ پیش گْوست ءَ ھما رھشون ءُ سیاسی سروک کہ آیانی سر ءَ بلوچ مھلوک ءَ سِتک داشتگ اَت ، آیاں بلوچ راج ءُ بلوچ گُلزمین ءِ پہ وزارتے ءَ سودا جت ءُ مزاکرات ءُ جمھوریت ءِ نام ءِ سر ءَ بلوچ راج رَد دات ، اے مزنیں تاوانے ءُ ھمشی ءَ چہ مئے بنجاہ سال زوال بیت،اے بلوچ راجدپتر ءُ بلوچ جُنز ءِ تہ ءَ مستریں دگا اِنت۔بلے مرچی آیانی دور شتگ ءُ اے زمہ واری نی ورنایاں گون اِنت ءُ دیم ءَ برگ ءَ اَنت۔ نی بلوچ ورنایاں اے دروگیں سیاست رَد کتگ ءُ وتی راہ تچک کتگ ءُ من سدکاں کہ نی اے ورنا پُشت ءَ نہ کنز اَنت ءُ وتی ساھاں ندر کن اَنت بلے مکسد ءَ چہ سرینڈر نہ کن اَنت۔ ھمے پیم ءَ بلوچ راجدپتر زانت ڈاکٹر فاروق بلوچ ءَ تران کنان ءَ بلوچ ءُ بلوچستان ءَ راجدپتر ماں اھدی پژدر ءَگْوش اَنت کہ چوں ءُ چے پیم بلوچ ءُ بلوچستان اے مزنیں سرزمین ءِ واھند اَنت ءُ آیاں چے پیم وتی ڈیھ رکینتگ۔ اے دمگ ءِ سرجمیں اھدی آرٹ ءُ نشانی بلوچ ءِ دوداں گوں سیادی دار اَنت ءُ اد ءِ سرجمیں نشانی ھمے پَدّر کن اَنت کہ اے زمین گْوست ءَ چہ بلوچ ئیگ اِنت۔
دیوان ءَ بنجاھی سنگتاں صباء لٹریری فیسٹیول ءِ ارزشت ءُ مکسد گِشّینت ءُ گوشت کہ اے فیسٹیول ءِ مکسد صباء ءِ پگر ءُ فلسفہ ءِ زندگ دارگ ءُ آئی ءِ واب ءَ عملی دروشم ءَ مانا دیگ اِنت ءُ اے مُچی ھمے پَدّر کنت کہ صباء ناں تھنا زندگ اِنت بلکیں آئی ءِ پگر مھکم بیان ءَ ورنایانی دروشم ءَ دیم ءَ جُنزان اِنت۔ دیمتر ءَ سنگتاں گْوشت کہ اینچو اڈ جنجال ءِ تہ ءَ ھم بلوچ ورنایانی سیاسی گھگیری مھکم اِنت ءُ ھمک ڈولیں جنجالانی دیم ءَ اوشتگ ءُ بدواھاں جور جواب اِنت ءُ اے جھد ءُ سپر ھمے داب ءَ روان کنت ءُ مھکم تر بیان کنت۔
دیوان ءَ مزنیں کچے ءَ مھلوک ءَ بھر زُرت ءُ دیوان ءَ ھاسیں مھمان انور ساجدی، ڈاکٹر فاروق بلوچ، اصغر علی آزگ، رمضان بامری، زرخان بلوچ، حفیظ بلوچ، لالا وھاب بلوچ، رمضان بلوچ، نثار احمد ، ظریف بلوچ، ریاض بلوچ، ناصر بلوچ, نور بلوچ، بلال بلوچ، فوزیہ بلوچ، سلیم شھزادہ ءُ دیوان ءَ ساڑی ئیں بساک ءِ بنجاھی مزن کارگُشاد اظہر بلوچ، ھالرسانی کارگشاد اُزیر بلوچ، بنجاھی کمیٹی ءِ باسک پیرجان بلوچ ءُ فہد بلوچ بیتگ اَنت۔مراگش ءَ اتکگیں کُلّیں مھمان ءُ ادارھانی ھاس سید ھاشمی ریفرینس کتابجاہ،ماسٹر امام بخش کتاب جاہ، مھروان آرٹ اکیڈمی، سُرسنگار ازمی مجلس ءُ اے دگہ آرٹسٹ ءُ اکس کشّانی منتوار ایں کہ دیوان ءَ بھر زُرت ءُ اے راجی جھد ءَ مئے ھمراہ داری کُت۔
مراگش ءَ سرجمیں بھر یک یک ءَ سوبمندی ءَ گوں دارگ ءَ پد گُڈسر ءَ ساز ءُ زیملی بھر ءِ دیوان ءَ گوں آسر کنگ بیتگ۔