دَہ اداراں گیش زھری ءِ سر ءَ کنٹرول کنگ، آپریشن ھیروپ ءِ پوجی ھیلکاری بیتگ- بی ایل اے

بلوچ لبریشن آرمی ءِ جارکش جیئند بلوچ ءَ رسانکدراں سرجمیں درشان ءِ شنگ کنان ءَ گوشتگ سرمچاراں چار شمبے ءِ روچ ءَ دَہ اداراں گیش ھزدار ءِ دمگ زھری سرجم ءَ کنٹرول کتگ ءُ زورگریں پوج ءِ رِٹ ھلاس کتگ- دَہ اداراں پد دراھیں سرمچار سلامتی واتر وتی مھکمیں بنجلاں شتگ انت- اے آپریشن ءَ بلوچ لبریشن آرمی ءِ دو یونٹس، اسپیشل ٹیکٹیکل آپریشنز اسکواڈ ( ایس ٹی او ایس) ءُ فتح اسکواڈ ءَ بھر زرتگ – اے پیشگامی ءَ آیاں بی ایل اے ءِ انٹیلیجنس ونگ زراب ءِ کمک گون بیتگ-

آئی ءَ گوشتگ بلوچ لبریشن آرمی ءِ سرمچاراں نیمروچ ءِ ساھت 12:30 ءِ نزیک ءَ زھری ءِ شھر ءَ آپریشن بندات کتگ ءُ لیویز تھانہ، بینک ،نادرا آفس ءُ میونسپل کمیٹی ءِ کنٹرول سمبالیتگ-

آئی ءَ گوشتگ ھزدار ءِ شھر ءَ چِل کلو میٹر دور زھری ءِ شھر ءَ سرمچار جتا جتائیں جاھاں مھکمیں سنگر بندی بیتگ ءُ تر ءُ تاب اش کتگ- ءُ ھمے وھد ءَ سرمچاراں مسیتاں جار ڈاھینتگ ءُ مھلوک ءِ مُچی ءِ گون ءَ تران کتگ-

ھمے وھد ءَ سرمچاراں پورسز دستانی چِست کنگ ءَ لاچار کتگ ءُ آیانی گور ءَ چہ 23 کلاشنکوفاں ھوار بازیں کچے ءَ بارود ءُ گولہ، سرکاری ریکارڈ ءُ گاڑی ءُ پرٹ گپتگ انت ءُ گون وت برتگ انت ءُ ماڑی مانداشتگ انت-

جارکش ءَ گوشتگ بی ایل اے ءِ کنٹرول ءِ ھلاس کنگ ءِ واستا شھر ءَ پیشگامی کنوکیں پاکستانی پوج ءِ سِی ءُ پنچ گاڑیانی کاروان ءِ سر ءَ سنگر گپتگیں سرمچاراں زھری کوچو ءِ ھند ءَ ریموٹ کنٹرولڈ آئی ای ڈی اُرش ءِ نشانگ کتگ ءُ پد ءَ وتکاریں سلاھانی گون ءَ نشانگ کتگ کہ چریشی ءِ آسر ءَ یک گاڑی یے تباہ بیتگ ءُ کم چہ کن چار کارندہ مرتگ ءُ ھپت زدگ بیتگ انت-

آئی ءَ گوشتگ بلوچ لبریشن آرمی ءَ بلوچ راج ءِ نیمگ ءَ سرجمیں کمک گون بیتگ ءُ جتا جتائیں جاھاں بلوچ راج ءَ سرمچارانی گچینی وش اتکی کتگ انت – دَہ اداراں اے دستیگی ءِ وھد ءَ مھلوک ءِ جان ءُ ساہ ءُ آیانی ساز ءُ سامانی پھریزگ سدکی کتگ انت ءُ بلوچ راج ءَ ھچ پئیمیں جانی یا مالی تاوان نہ بیتگ انت-

جیئند بلوچ ءَ گوشتگ ھمے وڑ کلات ءِ ھند پندران ءَ سرمچاراں دمگ گپتگ ءُ دامگی کمپنی ءِ دو کارندہ دزگیر کتگ انت ءُ آیانی جست ءُ پرس برجاہ انت-

آئی ءَ گوشتگ بلوچستان ءِ گواچنی ءُ تزویراتی دروشم ءِ گچینی جاہ زھری لھتے ادارانی وھد ءَ سرجمی ءَ کنٹرول کتگ ءُ زورگرین پوج ءِ رٹ ھلاس کنگ بلوچ لبریشن آرمی ءِ تاکت ءُ بنکی زور ءِ امل ءَ تچک کنت انت – اے ھما درچ ءِ تچکیں منانک انت کہ دشمنیں پوج اندر ءَ نیزور انت بس لس شھریانی سر ءَ وتی زور ءَ کارمرد کنت اِنت- وھدیکہ زورگریں پوج ءِ دیم گوں بلوچ لبریشن آرمی ءِ دیم ءَ بیت انت دشمن پروشی ءِ آماچ بیت انت – اے سرجمیں راج ءِ واستا کلوھے کہ اگاں بلوچ راج تاکت ءِ گون ءَ یکجاہ بہ بیت گڑا اے لگوریں دشمن یکیں شپ ءَ مئے سرڈگار ءَ تچ ایت-

گڈسر ءَ گوشگ بیتگ کہ بی ایل اے ءِ اے کنٹرول آپریشن ھیروپ ءِ دومی درچ ءِ چن ءُ لانچانی بھر انت ءُ اے یک ھیلکاری یے بیتگ – بلوچ لبریشن آرمی اے سوبمندیں ھیلکاری ءَ من ایت-