کیتھارینابلوم ءِ گاریں اِزت
گدار(ناول)
ندکار :ھائنرش بول
رجانکار: شاھد اھمد
پنچمی بھر
دی بلوچستان پوسٹ
چہ بلوم ءَ چار روچ ءِ دست گَٹّی ءِ بابت ءَ ھرچی پٹ ءُ پول ئِے کُت، آئی ءَ چُشیں شک ءُ گمان والا گپ در نہ یتکگ اَت، بلے وھدے یکشمبے والا روچ آئی ءِ کارانی جُست اتکگ گڑا چہ اد ءَ لھتے گرانی اتکگ اِت اَنت۔ وھدے کہ چارشمبے ءِ روچ آئی ءِ دست گَٹّی ءِ سیادی اِنت گڑا آ ھمے وڑ اَت! ھمے روچ دو بج ءَ بلورنا ءَ کیتھارینا بلوم ءِ 280 مارک یک ھپتگے ءِ ھساب چہ دو ھپتگانی مُز داتگ اَت ئِے، گوستگیں مُز ءِ دیگ ءِ سبب اِیش اَت کہ آ ھما روچ دو بج ءَ وتی جنین ءِ ھمراھی ءَ اسکینگ ءِ واست ءَ روگ ءَ اَت۔ اے چکر ءَ بلورنا ءُ آئی ءِ جنین ءَ کیتھارینا ءَ چہ کول زُرت اے سوگند گپت کہ آ اے بری لازم موکل بہ گپت ءُ اے ھم کہ کارنول ءِ موہ ءَ آ وتی وھد ءَ سَیل ءُ چکرگ ءَ بہ گوازین اِیت ناں کہ ھر وھد ءَ وڑ ءَ گیشیں کار بہ کنت اَنچوش کہ ھر سال ءَ اَئید ءِ ھمے موہ ءَ بہ کنت۔ بلوم گندگ ءَ دوئیں مرد ءُ جَن ءَ اے ھم گْوشت کہ ھمے بیگاہ ءَ آ یک ناچ ءِ مھپلے ءَ روگ ءَ اَت کہ آئی ءِ مزھبی مات چہ ایلز وولٹرس گند اِیت ھمے واست ءَ آ ایشی ءَ زلور ھوار بہ لوٹ اِیت۔ آئی ءَ را مسزبلورنا ءَ گْوشت” کیٹی۔
تو پگر مہ کن، وھدے ما واتر بیائیں گڑا ما یک پارٹی یے کنیں اود ءَ تم ناچ کُت کن ئے۔“ ھمے پنچ یا شش سالانی میانجی ءَ وھدے آ چہ شھر نیشت، آئی ھمے گِلہ کُت کہ نوں آئی ءَ چُشیں موہ نہ رس اِیت کہ آ دل ءِ مَیل ءَ ناچ بکنت۔ آئی ءَ مسز مسزبلورنا ءَ را گْوشت کہ ناچ ءِ مدام بدنامیں جاگہ اَنت۔ کہ اود ءَ جنسی شُدیک ءِ نودربر بہ اَنت۔ کہ ھمے پگر تہ ءَ اَنت کہ کسے ءَ وتی ھمراھی بہ بَر اَنت، چُشیں بے کاریں جاگہ اَنت کہ آئی ءِ تب ءُ مزاج ءَ نہ لگ اَنت۔ پشت کپت ناچ ءِ جُست، گڑا اود ءَ روگ ءِ ھچ واھگ نست اَت ئِے۔
ھمے سابت کنگ ءَ ھچ مشکل نہ یتک کہ چارشمبے ءِ نیمروچ ءَ کیتھارینا ءَ را دو ساھت مسٹر ءُ مسز ھیپرنز ءِ لوگ ءَ کار ئِے کُت اود ءَ آئی ءَ را مُجتی لوٹگ ءِ کمک ءِ واست ءَ شُتگ اَت۔ پرچا کہ ھما روچ ءَ دوئیں مرد ءُ جن کارنول ءِ موہ ءَ وتی جنک پہ گند ءُ نند ءَ لیمگو روگ ءَ اَت، ھمے واست ءَ کیتھارینا ءَ ھما پیریں جوڑ ءَ را وتی پوکس ویگن ءَ اسٹیشن ءَ رسینت۔
اگر چہ آئی موٹل ءِ اوشتارینگ ءَ پریشان بوت بلے آ زِد کنگ ءَ آئی ءِ سامان چست کُت آئی ءَ پلیٹ پارم داں وش روگی کُت(” زاناں زر ءِ ھاتر ءَ۔“ اوہ انّا، ما آئی ءِ ھما مھربانی ءِ سبب ءَ آئی ءَ را بدل ءَ ھچ چیزے دات نہ کُت۔ ءُ اگاں چُش کنگ ءِ جُھد بہ کُتیں گڑا الم آ دلتپرکہ بوتگ اَت۔“ ھمے گپ دوئیں مرد ءُ جن ءِ یک جُستے ءِ پسّو ءَ داتگ اَت) ھمے سابت بوت کہ ریل پنج ءُ نیم ءَ شُتگ اَت۔ نوں اگاں پنچ ءُ دہ ءَ تک کیتھارینا وتی موٹل ءِ کشگ ءَ چہ مُچانکی ءَ در کنگ ءَ سوبمند بوتگ اَت، ءُ پد ءَ بیست ءُ بیست پنچ منٹ ءَ چہ شھر ءَ ڈن وتی اوتاک ءَ سر بوتگ اَت گڑا ایشی ءِ متلب ایش اِنت کہ آ شش یا شش ءُ پانزدہ وتی لوگ ءَ رس اِتگ اَت۔ چمیشی ءَ یک منٹے ءَ ھم چُش اوں نہ اِنت کہ ھمے ھساب ءَ نہ اِت اَنت۔ آئی ءَ لھتے وھد ھم داتگ اَت کہ وھدے آئی ءَ دپ ءُ دست شُشتگ اِت اَنت، گُد ءُ پُچ مَٹ کُتگ اِت اَنت، اد ءَ آ وتی چہ موٹل ءَ انّا بلکیں ٹرام ءَ شُتگ اَت۔ آئی ءِ گُد اوں ناں کہ بدؤوانی وڑ ءَ اِت اَنت ءُ ناں کہ ھسپانوی۔ آئی ءِ مید سُھریں کارنیشن اِت اَنت، سُھریں اسٹاکنگ ءُ سواس، کتھی رنگ ءِ بلاؤز ءُ ھمے رنگ ءِ ٹویڈ اسکرٹ۔ اگرچہ اے گپ لس نہ اَت کہ کیتھارینا چہ وتی موٹل ءَ شُتگ اَت یا چہ ٹرام ءَ، بلے آئی گُشگ ھمے واست ءَ المی اِنت کہ پٹ ءُ پول ءِ ساھت ءَ ھمے چیز ارزشتے ءِ بنیاد ءَ بوتگ اَت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت-