کاروان منزل ءَ رس اتگ
نبشتہ کار: سنگت نورک بلوچ
دی بلوچستان پوسٹ
گاڑی ءِ سیٹ مرچی پورا چٹ جتائیں لزّتے دیگ ءَ اِنت ، مرچی مردم کرولا یے ءَ سوار اِنت ، سک ٹیٹ اِنت گند ئے ھاھا ، کاروان مسکرا کنان ءُ پہ وتی گڈّی منزل ءِ روگ ءَ چٹ ساڑی اَت ءُ دیم ءِ من کہ ھبکہ ءُ گُنگ اِتاں دل ءَ نہ لوٹ اِت کہ مرچی کاروان چہ منی دیم ءَ اندیم بہ بیت ۔ پُلی زان ئے زمین ءِ مھر چٹ جُتائیں مِھرے ، زمین ءِ مھر چہ لیلا ءُ مجنو ، شیرین ءُ پرھاد ، ھانی ءُ شےمرید ءِ اے کُلّانی مھراں چہ گیش اِنت ، پُلی زمین تئی سرجمیں زندگی ءَ لوٹ ایت ، زمین ساہ لوٹ ایت ءُ زمین من ءَ ءُ ترا لوٹ ایت ۔ ھو ھو زمین ساہ لوٹ ایت ، منی دپ ءَ ھلوتی تھنا ھمے گپ در آتک ءُ بس ۔
کاروان ءَ مارا گوں کسھاں ، مسکرا ءُ پنتاں چٹ گسی کُرتگ اَت ، چہ پیسر ئیگ ءَ جتائیں گپ ، جتائیں کسہ ، جتائیں پنت دیگ ءَ اَت ۔ پُلّی! پدائی نوکیں شَے یے نہ اِنت کہ تھنا من ئِے کنگ ءَ آں بلکیں پیسر اوں گران بھائیں سنگتاں اے پِڑ ءَ وتی ساہ ندر کرتگ اَنت ۔ ھرچ ھما شھید کہ پہ گلزمین ءَ ندر بوتگ کُلّاں وتی کچّ ءَ کرتگ ءُ اے کربانی ءِ درچ تاں آجوئی ءَ برجم بیت انت ۔ من کہ اے دگنیا ءَ وتی چم پچ کرت اَنت تہ ھمے گلامیں چاگرد ، ھمے بزّگی ، بے وسی ، بے وردنی ءُ ھستانکی لوٹانی ایر جَنَگ ، اے چیزاں تھنا من نا بلکیں بلوچستان ءِ دلبند ءَ کسے اوں گاماں ایر بہ کنت آ الّم یکبرے اے چیزاں مار ایت ، اگاں کسے گلامی ءَ بہ مار ایت آ الّم زانت کہ من ءَ چے کنگی اِنت ءُ آ پہ وتی آجوئی ءِ واستا جھد کنت ءُ جھد کنان بیت ۔ من گُنگ ءُ کاروان منی چمّانی تہ ءَ چاران ءُ پنت دیگ ءَ اَت ۔
من ء کاروان کہ مزن بوتاں ، من ءَ گلامی ءِ شومیں بیماری اوپار نہ بوت ءُ آتکاں ھما شھید بوتگیں ورنایانی توپک بڈّ ءَ کُرت ءُ مرچی یک شورو ءَ پُرّیں کرولا یے ءِ سیٹ ءَ نشتگ ءُ دیم پہ یک نوکیں منزلے ءَ راھی باں ءُ بلکیں چند ساھت ءَ پد من جانی ھساب ءَ چہ شما چٹ دور بہ باں بلے پگری ھساب ءَ مدام شمئے میان ءَ ساڑی آں ۔ من سدّکاں منی توپک الّم یکے ءِ بڈّ ءَ بیت انت۔
من کہ آ وھد ءَ جنگ ءَ ھوار بوتاں بلکیں جنگ ءَ شریں وڑے ءَ پوہ نہ بوتگ اِتاں بلے اینچو زانتگ اَت کہ گلامی ءِ سانکلانی گُڈّوک تھنا بس ھمے جنگ اِنت ۔ من بلکیں بندات ءَ گوں جنگ ءَ اینکدر مھکم نہ اتاں بلے من ءَ سگّ ھست اَت من وت ءَ را داشت ، جنگ ءَ را پوہ بوگ ءِ جھد کرت ءُ مرچی اے جاہ ءَ سر بوتگاں ۔ جنگ ازابی ءُ گژنگی ءِ نام اِنت بلکیں جنگ وشّی یے نہ اِنت ، اگاں کسے ءَ را بلوچ راج ءِ بزّگی ءِ درد مان اِنت آ الّم پہ راج ءِ ھاتر ءَ اے ازابانی کاٹگ ءَ چو تمردی ءَ تیار بیت ۔ تو کہ جنگ ءَ ھوار ئے گڑا تچکیں جھدکارے بہ بو گند ئے تو جنگ ءَ ھوار بوت ئے پد ءَ وتی زاتی زندگی یا پیسری پگر ءِ مٹ کنگ ءِ بدل ءَ ھمے لوٹ اِت کہ جنگ پہ من منی تب ءِ ھساب ءَ مٹ بہ بیت گڑا بہ زان ئے تو اندر ءَ پروش وارتگ ۔
کاروان کاروان وھد گوستگ نو ترا جنزگی اِنت ، سنگتے ءَ مئے گپ کپّی کُرت ۔ شر پُلّی من تیاراں ، کاروان ءَ بچکندگے جت ءُ وت ءَ را شر گیگ کنگ ءَ گوں دزگٹ بوت ۔
کاروان مھروانے اَت ، زمین مھرے اَت ءُ تِچکیں سرمچارے اَت ۔ کاروان ءِ داتگیں پنت تھنا منی واستا نہ اِت اَنت بلکیں کاروان ھرچ بلوچ زھگ ءَ را ھکیکتاں پوہ کنگ لوٹگ ءَ اَت ۔ کاروان رازدارے اَت ءُ گَل ءِ کارشونانی سر ءَ تچکی ءَ ایر آتکگ اَت بلے کُل چیزاں ابید کاروان ءَ یک ٹوھیں راھے وتی کرتگ اَت بلکیں کاروان یک پدائی یے اَت ۔
کاروان سیٹ ءِ سر ءَ نشتگ اَت ، مھروانیں دابے ءَ وتی گڈّی گپّانی درشانی بندات ئِے کُرت ؛ سنگتاں گپ باز اِنت ءُ وھد کمّ اِنت ، مئے ءُ شمئے مُچّانی راہ ھمیش اِنت گڑا من شمارا رکست کناں ، کاروان ءَ گڈّی بچکند جت ءُ مارا وشّی کُرت ، گاڑی ءِ دروازگ ئِے بست ءُ دیم پہ گڈّی منزل ءَ راھی بوت ۔ کاروان روان بوت ءُ منی چم بند بوان بوت اَنت ، کاروان جُنز اِت ءُ من انگت ھمود ءَ اوشتاتگ اِتاں ۔ اچانگ ءَ من پَچ لرز اِتاں ، چم پچ کُرتاں تہ بس من آں دگہ کس نیست ءُ کاروان ءِ گاڑی ءِ ٹیرانی پَد انگت تازہ تازہ اَنت ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت-