چہ کراچی ءَ پاکستانی پورسز ءَ نیشنل ڈیموکریٹک پاٹی ءِ بنجاھی رھشون ءَ ھوار پنچ مردم آوار جتگ انت-
بیگواہ بیتگیں مردمانی توک ءَ این ڈی پی ءِ سینٹرل کمیٹی ءِ باسک مھراج شاد ، دودا الاھی، گمشاد ، مزمل بلوچ ءُ اسماعیل ابراھیم ھوار اَنت-
اے مردم گوستگیں شپ ءِ ساھت یک ءَ کراچی ءِ دمگ ھسن اسکوائر ءَ آوار جنگ ءُ بیگواہ کنگ بیتگ اَنت-
ایشانی توک ءَ دودا الاھی کیچ ءِ دمگ بلنگور، گمشاد مند، مزمل پسنی، مھراج کیچ آبسر ءُ اسماعیل ابراھیم مند ءِ ناماں زانگ بیتگ اَنت-
ایشانی توک ءَ چار نودربر اَنت کہ کراچی ءَ وانگ ءَ بیتگ اَنت ءُ اسماعیل درملک ءَ بیتگ ءُ چٹیاں وتی ھند ءَ بوگ ءَ پد کراچی ءَ جاندراھی ءِ ھاتر ءَ شتگ بیتگ-
زانگ بہ بیت بیگواہ کنگ بیتگیں مردمانی توک ءَ دودا الاھی ءُ گمشاد ایشی ءَ پیش اولی رند ءَ جون دوھزار ءُ بیست ءُ دو ءَ کراچی ءِ گند مسکن چورنگی ءَ آوار جنگ بیتگ ات اَنت پد ءَ چاردہ جون ءَ یل کنگ بیتگ اَنت ءُ یک رندے پد ءَ بیگواہ کنگ بیتگ اَنت-