بلوچ راجی یکمُشتی ءُ جنگ
نبشتہ کار: ھَوا بلوچ
دی بلوچستان پوسٹ
بلوچ راج ءِ یکمُشت ءُ تپاک بوھگ ھستیں وھد ءُ جاورانی مستریں لوٹ اِنت۔ بلوچ سر ڈگارے سر ءَ ھر کُجا کہ بلوچ راج نشتگ وڑے نہ وڑے ءَ پاکستان ءِ زُلم ءُ زوراکیانی آماچ اَنت ءُ آ زندگی ءِ بنیادی آسراتیاں چَہ زبھر اَنت۔
بلوچ چُکچینی گوں زوراکیاں یکشل ءَ برجاہ اَنت بلوچ چاگرد، آئی ءِ دود ءُ ربیدگ، زبان ءُ راجی پچار کُل ولگوج کنگ بوگ ءَ اَنت۔ بلوچ مھلوک ءِ زورانسری بیگواھی ءَ چہ پَد سالانی سال آیاں ازیت جاھاں دارگ یاکہ زورانسری بیگواھی ءَ پَد آیانی ژانگولیں جونانی دور دیگ، بلوچ راج ءِ دود ءُ ربیدگ ءَ پادمال کنگ ءُ پوجی لشکرکشی کنگ ءُ باڈر بزاں سیمسراں بند کنگ ءُ مردماں پہ لاپ ءِ شوھاز ءَ بزگ ءُ وار کنگ ءُ ایدگہ زُلم ءُ زوراکی بلوچ لس مھلوک ءِ ھمُک روچی ئیں کسہ جوڑ بوتگ اَنت۔
انچوشکہ راج یکے ءُ جیڑہ ءَ یکے گُڑا ما چیا بھر بھر بہ بئیں؟ راج ءِ چُشیں ھچ بھرے نیست اِنت چَہ ریاستی زلم ءُ زوراکیاں بہ رکّ اِیت۔ اُستاد ءُ نودبر، ڈاکٹر اھوالکار(صحافی)، سیاسی، چاگردی ورکر ءُ شھزانت، یاکہ بزگر، شپانک، مید ءُ دھکاناں بِگر داں پیر ءُ ورناھاں کُل یک اِیں آس ءَ سُچگ ءَ اَنت۔ گُڑا بلوچ راج ھمئے سر پد بہ بیت کہ وت ماں وتی جنگ، یک ءُ دومی ءَ گوں دلرنج بوگ ءُ چوشیں جاوراں دست ءِ کُٹ ءَ کنگ ءُ بے تواری ءَ نندگی ءُ چارگی نہ اِنت اے وڑیں ساھتاں یکجاہ بوگ ءُ دُژمن ءِ زُلم ءُ زوراکیانی ھلاس کنگ ءِ ھاتر ءَ یکجاہ ءُ تپاک بوگی اِنت۔ھر وڑیں کُربانی دیگی اِنت ءُ ھر زُلم ءِ ھلاپ ءَ اوشتگی اِنت ءُ گھگیری کنگی اِنت۔
ما اگاں ایندگہ آجو بیتگیں راجانی راجدپتر ءَ بِہ چاریں گُڑا مارا بازیں درور دست کپ اِیت کہ ھما راجاں گُلامی ءِ تھاریں شپ پَہ آجوئیں گوربامے یے دیگ ءَ دُرست تپاک ءُ ھکمُشت بیتگ اَنت ءُ ھر وڑیں جاوراں زُلم ءُ زوراکی ءِ بگیری ءَ گھگیری کُتگ۔
ھر وڑیں سوبمندی ءِ راستی راجی یکجاھی اِنت، وھدیکہ مئے بلوچ راج یکجاہ بوگ ءَ سوبمند بوت گُڑا ھچ وڑیں تاکت بلوچ راج ءِ سر ءَ زُلم ءُ زوراکی کُت نہ کنت۔ پمیشکا بیا اِت سمائی (شعوری) بنیاد ءَ راجی یکجاھی ءِ پیسلہ ءَ بہ کن اِیں ءُ بلوچ راجی آجوئی ءِ جنگ ءِ بھر بہ بئیں ءُ وتی آجوئی ءِ جنگ ءَ وت سوبمند بہ کن اِیں۔
مروچی اگاں ما بلوچ یکمُشت ءُ یکجاہ نہ بوت اِیں ءُ آجوئی ءِ جنگ ءِ بھر نہ بوت اِیں گُڑا باندا پہ ما تباھی ءَ دگہ ھچ پشت نہ کپ اِیت۔مروچی ما اے وڑیں جنگی جاورے ءَ زندگ اِنت گُڑا مئے زند ءَ تھنا جنگ مانا ئے دات کنت، آجوئی ءِ جنگ مٹ ءُ بدلی ءِ وشھالی ءِ اوّلی ءُ گُڈی راہ اِنت بیدے جنگ ءَ زوراکیانی دیم دارگ نہ بیت۔
اگاں بلوچ راج ءَ اے میان ءَ نزوری پیش داشت ءُ آجوئی ءِ جُھد ءُ جنگ نزور داشت اَنت گُڑا پاکستان گیش بلوچ ءِ کُشگ ءُ جَنگ ءَ گوں تُرندی ءَ برجاہ دار ایت، آجوئی جنگ بلوچ راج ءِ ھستی ءِ رکینگ ءُ برجم دارگ ءِ جنگ اِنت، اے جنگ ءِ آسر پہ بلوچ راج ءَ آسودگی ءُ ایمنی ءَ اِنت۔ اے راستے کہ جنگ ءِ مردم بوت کنت داں منزل ءَ زندگ مہ باں بلے پہ جزم گُشاں چَہ آیاں پد ھما کہ بلوچ سر زمین ءِ سر ءَ زند گوازین اَنت آ الّم وتی زند ءَ پَہ وشھالی گوازین اَنت، پمیشکا الّمی اِنت بلوچ ءَ را داں گُڈی ساہ ءَ گوں آجوئی ءِ جنگ ءَ بندوک بوگی اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی ءِ اِنت –