یکشلیں اُرش
ٹی بی پی شونگال
پانزدہ نومبر ءِ شپ ءَ کلات ءِ ھند شاہ مردان ءَ فرنٹیرکور ءِ بنجاھی بنجل ءِ سر ءَ بلوچستان ءِ آجوئی ءِ واستا پرکاریں بلوچ لبریشن آرمی ءَ اُرش کتگ ءُ بنجل ءِ آؤٹ پوسٹ دستیگ کتگ اَنت ءُ پاکستانی پوج ءِ سلاہ پچ گپتگ اَنت- پاکستانی پوج ءِ جارکش ءِ رد ءَ اے اُرش ءَ نان کمیشنڈ آپیسراں ھوار ھشت کارندہ مرتگ ءُ ھبدہ زدگ بیتگ اَنت ءُ بلے بی ایل اے ءَ بیست ءُ نُھ سپاھیگانی کُشگ ءِ گپ دیم ءَ آورتگ –
اے اُرش سرجمیں بلوچستان ءَ پوجی بنجل، مزن شھدگ ءُ لشکری کارجاھانی سر ءَ بلوچ سلاہ بندیں آجوئی لوٹوکیں گلانی ھمسنت بلوچ راجی آجوئی سنگر ءِ اُرشانی درچ اِنت کہ سیزدہ نومبر ءَ بلوچ شھیدانی روچ ءَ برجاہ بیتگ اَنت- سیزدہ نومبر ءَ بلوچ شھیدانی روچ ءِ درگت ءَ بلوچ سلاہ بندانی ھمسنتیں گل بلوچ راجی آجوئی سنگر ( براس) ءَ بلوچستان ءِ مزن شھدگانی سر ءَ شش جاہ ءَ راہ بستگ ءُ پاکستانی پوج، لشکری کار شون، گیس پائپ لائن، مڈی بروکیں گاڑی، چیریں ادارھانی کارندہ ءُ ڈیتھ اسکواڈ ءِ سر ءَ سدانی اُرش کتگ ءُ لیویز کارمندانی سِلاہ دستیگ کتگ ءُ پاکستانی پوج ءِ میجر ھسیب ءَ ھوار بازیں کارندہ کشتگ اَنت-
شال ءِ ریل اسٹیشن اُرش ءَ پد بلوچستان ءِ بازیں جاھاں انٹرنیٹ بند کنگ بیتگ ءُ بلوچستان ءَ پوجی آپریشن گیشی ءِ اھوال آیگ ءَ اَنت بلے دو دھکاں گیش بلوچستان ءَ برجاھیں آجوئی ءِ جنگ ءَ تاکت ءِ زور ءَ ھلاس کنگ ءِ بے سوبی پوجی آپریشنانی گپ کنگ بلوچستان ءِ زمین ءِ راستیانی نا بلدی ءِ درشان اِنت-
بلوچستان ءَ پوجی آپریشن پیش ءَ ھم بے سوب بیتگ اَنت ءُ آیوکیں وھداں ھم جتا آسر نہ بنت اِنت- پوجی آپریشناں زورانسری بیگواھی ءُ ابید ءِ آمدگس ءِ پرمان ءَ کوشانی وئیل گیش بنت اِنت بلے بلوچ انسرجنسی ءِ انسداد ءِ ممکن بیت نہ کن اَنت-