امریکہ ءِ سروکی گچینکاری ءَ لوٹ اتگیں 270 الیکٹرل ووٹ ءِ گرگ ءَ پد ڈونلڈ ٹرمپ دومی رند ءَ سروک گچین بوتگ۔
فاکس نیوز ءِ رد ءَ ڈونلڈ ٹرمپ ءَ 277 گچینکاری ووٹ زرتگ ءُ کاملا ھیرس ءَ تاں انوگ ءَ 266 گچینکاری ووٹ گرگ ءَ سوبین بوتگ۔
صدارتی گچینکاری ءَ سوبمند بوھگ ءِ ھاترا 538 گچینکاری ءِ تہ ءَ کم چہ کم 270 ووٹ لوٹ اِتگ اَنت۔
ڈونلڈ ٹرمپ کہ امریکہ ءِ 47می صدر گچین بوتگ آئی ءَ گچینکاری ءِ آسر ءَ پد وتی سوبمندیں گشتانک ءَ ووٹر ءُ پاٹیانی منت گپتگ ءُُ گشتگ کہ اے ملک ءِ راجدپتر ءِ مستریں سیاسی زرمبشت انت۔
ڈونلڈ ٹرمپ ءَ گشتگ امریکا ءَ را گھتر کنگ لوٹ ایت ءُ نوں ما ایشی ءَ گھتر کنیں، امریکہ ءِ ٹپاں دوا کنیں، امریکہ ءَ من ءَ زوراکیں مینڈیٹ داتگ، من امریکہ ءَ مزن کن ایں۔
امریکہ ءِ صدارتی گچینکاری ءَ امریکی کانگریس ءِ بالادستیں ایوان سینیٹ ءَ ریپبلکن پارٹی ءَ گیشتریں بھر گپتگ۔
امریکی روتاک ”نیویارک ٹائمز“ ءِ رد ءَ ایوان ءِ 100 سیٹانی تہ ءَ ریپبلکن پارٹی ءَ 51 ءُ ڈیموکریٹ پارٹی ءَ 42 سیٹ گپتگ اَنت۔
کانگریس ءِ ایوان ءِ تہ ءَ 435 سیٹ ھم گچینکاری ءِ ھاترا دیم ءَ اَنت۔
امریکہ ءِ روتاک ”نیویارک ٹائمز“ ءِ رد ءَ ایوان ءِ نمائندگاں ریپبلکن پارٹی ءَ 191 ءُ ڈیموکریٹ پارٹی ءَ 169 سیٹ گپتگ اَنت۔
ھمے رنگ ءَ مرچی 11 ریاستانی گورنر ءِ گچینکاری ءِ روچ اِنت کہ ایشی ءِ تہ ءَ ریاستی کانون ساز ، شھر ءِ میئر ءُ بنجاھی سرکار ءِ نمائندگانی گچینکاری ھوار اَنت۔