بلوچ یکجھتی کمیٹی ءِ جارکش ءَ گوشتگ کہ 2 اگست ءَ نوشکی ءَ بلوچ راجی مچی ءِ نندانک ءِ سر ءَ ایف سی ءِ سر ءُ دیم تیرگواری ءِ سوب ءَ یک ورنایے شھید ءُ دو ٹپی بتگ اَنت۔ ٹپی بیتگیں مردمانی تہ ءَ یک ورنایے حمکت اللہ ءَ گٹ ءَ تیرے ءَ سپتگ ھمے سوب ءَ گوستگیں چل روچ اِنت کہ سکا گوں ناگیگیں جاوراں الاج ءَ بیتگ اَنت۔ چہ شال ءَ ٹراما سینٹر ءَ درمان کنگ ءَ پد پہ شرتریں درمان ءَ کراچی ءَ برگ بیتگ۔ کراچی ءَ یک نادراھجاھے ءَ آئی ٹپانی درد نہ سگ اِتگ اَنت ءُ شھید بیتگ۔
آئی ءَ گوشتگ کہ پہ بلوچ راجی مچی ءِ دارگ ءَ ھاتر ءَ ریاست ءَ بلوچستان ءِ جتاجتائیں شھراں زُلم ءُ زوراکی کتگ ۔ ھمے سوب ءَ سے ورنا شھید ءُ سی ءِ نزیک ءَ سکا ٹپی بیتگ اَنت۔ شھید ھکمت اللہ ھم ھمے ٹپی بیتگیں مردمانی تہ ءَ ھوار بوتگ کہ آ آدینگ ءِ روچ ءَ کراچی ءَ شھید بیتگ۔ پہ راجی مچی ءِ آھوکیں کاروان ءُ پد ءَ نندانکانی میان ءَ بیتگیں اُرشاں ٹپی بیتگیں مردم جتاجتائیں نادراھجاھاں الاج کنگ بیگ ءَ اَنت ءُ چہ آیاں لھتے ءِ جاور ناگیگ اَنت۔ چہ آیاں مستونگ ءِ جھمنند مطلب ھم ھوار اِنت۔
آئی ءَ گوشتگ کہ ریاست بلوچ لس مردمانی چہ سیاسی ءُ راجی جھد ءَ ترس آماچ اِنت ءُ پہ اے زرمبشت ءِ ایرموش کنگ ءَ زور ءُ تاکت کارمرز کنگ ءَ اِنت۔ بلے درسیں ریاستی زوراکیاں ابید ریاست بلوچانی توکل ءِ پروشگ ءَ بے سوب بیتگ۔
آئی ءَ گوشتگ کہ بلوچ چکچینی ءِ ھلاپ ءَ چست بیتگیں اے زرمبشت اے وڑیں زوراکیانی دیمپان اِنت کہ اے ریاست بلوچ چکچینی کنگ ءُ پیداک اِنت۔ ما سدک ایں کہ بلوچ راج ءِ دیمونی یک روچے الم رنگ کار اَنت ءُ بلوچ سرڈگار ءِ سر ءَ زوراکی پہ مدامی ھلاس کنگ بیت۔ زوراکی ءُ تونگری گوں ھاکاں ھوار بیت ءُ بلوچانی جھد گوں سوبمندی ءَ ھمگرنچ بیت۔
آئی ءَ گوشتگ کہ شھید حکمت اللہ ءِ دیمونی پہ مدامی گیر آرگ بنت ءُ اے دیمونی پہ بلوچ راجی زرمبشت ءَ مادنیں راہ بنت۔