روکپتی بلوچستان ءِ دمگ چھبار ءِ شھر ءِ نیام ءَ زیک سے شمبے ءِ روچ ءَ سُھب ءِ11 بج ءِ وھد ءَ ایرانی لشکر ءِ سپاہ ءِ چیریں ادارھانی کارمند ءَ اَبید میارباری ءُ آمیدگِس ءِ پرمان ءَ یک بلوچے آوار جتگ ءُ بیگواہ کُرتگ۔
آوار جَنَگ بوتگیں مردم ءِ پجار “ ابدالوھید ھوت” مولابکش ، چھبار ءِ جھمنند زانگ بیتگ۔
گیشیں ھالانی رد ءَ ابدالوھید گوں وتی زاتی گاڑی ءَ شھر ءَ نگن ءِ گِرگ ءَ شُتگ کہ اودا ءَ لشکر ءَ اوار جتگ ءُ آئی ءِ گاڑی ھم گوں وت بُرتگ ، کھول ءِ بازیں پٹ پول ءَ پَد انگت ھم چیریں ادارہ ءَ آئی ءِ آوار جَنگ نہ منّ اِتگ ءُ آئی جاور ھال ءِ بابت ءَ ھیچ وڑیں ھال نیست انت-
زانگ بہ بیت روکپتی بلوچستان ءَ مردمانی بیگواھی ءِ اھوالانی توک ءَ ھما وھد ءَ گیشی اتکگ کہ گوستگیں سال ءَ چھبار ءَ یک بلوچ جنکے ءِ گون ءَ ایرانی پولیس آپیسر ابراھیم کوچگی زئی ءَ جنسی زوراکی کتگ ءُ چریشی ءَ پد دمگ ءَ چست بیرگیں برانزانی پژدر ءَ مھلوک بیگواہ کنگ ءُ کوشانی توک ءَ گیشی اتکگ اَنت-