زمران ءَ پاکستانی لشکر ءِ بنجل ءِ سر ءَ سلاہ بندیں مردماں اُرش کتگ-
بلوچستان ءِ دنگ کیچ ءِ ھبد زامران ءَ مزنیں کساسے ءَ سلاہ بندیں مردماں پاکستانی لشکر ءِ بنجل ءِ سر ءَ اُرش کتگ ۔
ھالانی رد ءَ پوج ءِ بنجل ءِ سر ءَ راکٹ ءُ دگہ سلاھاں گوں اُرش کنگ بوتگ۔
اے اُرش ءَ پوج ءِ کارندھانی بیرانی ءِ ھال ھست بلے واکداراں اے بابت ءَ ھچ وڑیں ھال ءُ اھوال دیم ءَ نیاؤرتگ –
اُرش کنوکاں کیمپ ءِ نزیک ءَ ھستیں نگرانی کیمرہ ھم نشانگ کتگ ءُ تباہ کتگ اَنت۔
انگت ءَ ھچ گل ءَ اے اُرش ءِ ذمہ واری نہ زرتگ۔
پاکستان ءِ آجوئی ءِ روچ ءِ درگت ءَ سرجمیں بلوچستان ءَ پاکستانی لشکر، سرکاری کارگس ءُ مراگش جاھانی سر ءَ اُرشانی تہ ءَ گیشی اتکگ۔
گوستگیں روچ ءَ بگر داں انیگ ءَ بنجاھی شھر شال ءَ ھوار پنجگور، ھزدار، ھاران، گوادر، تربت، آواران ءِ بازیں دمگاں تراک ءُ سلاہ بندیں اُرش بوتگ اَنت۔