بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں چار جتاجتائیں اُرشاں دژمنیں پوج ءُ آئی ءِ وتگڑیں چاردہ اگست ءِ مراگش نشانگ کُرتگ اَنت۔
جارکش ءَ گْوشتگ کہ اولی اُرش ءَ مئے سرمچاراں آواران ءِ ھند مالار ءَ برجاھیں پاکستانی پوج ءِ بنجل ءِ سر ءَ 13 اگست ءَ سَے شمبے ءِ بیگاہ ءَ چہ دو نیمگاں گوں نوکین ءُ ٹوھیں سلاھاں اُرش کُرتگ، اُرش ءَ دژمن ءِ سَے کارمند مُرتگ ءُ باز ٹپی بیتگ۔
جارکش ءَ گْوشتگ کہ سنگرانی سر ءَ راکٹ جنگ ءَ ابید بنجل ءِ تہ ءَ ھم راکٹ جتگ کہ چہ ایشی ءَ دژمن ءَ گیش مالی تاوان بیتگ۔
جارکش ءَ گْوشتگ کہ پروش وارتگیں دژمن ءَ چہ نوکیں چیرجنگی رِپکاں آگولو اِنت ءُ وتی پروش ورگ ءِ چیر دیگ ءَ لس آبادیانی سر ءَ ماٹر آس دنت۔ اُرش ءَ پد دژمن ءِ تیرگْواریاں رھدربر ابدُلھالک ء دوست مھمد شھید بیتگ۔
جارکش ءَ گْوشتگ دژمنیں ریاست چہ مردمگری ءَ زبھر ءُ یک بدکِردیں دژمن ئِے کہ نہ تیوک ءَ لس آبادیانی سر ءَ تیرگْواری کنت ءُ آیاں نشانگ کنت بلکیں آیانی لاشاں ھم کمشرپ کنت ءُ کھول ءَ تُرسینگ ءِ جُھد ءَ کنت۔
جارکش ءَ گْوشتگ کہ اے اُرش ءَ ریاست ءِ پوج ءَ تیرگْواری ءَ شھید بیتگیں رھدربر ابدُلھالک ءِ لاش پوج ءَ گوں وت بُرتگ۔ شھید ءِ زھگ ءُ ھند ءِ مردماں زھرشانی کُرتگ کہ پوج ءَ مردم زوراکی ءِ نشانگ کُرتگ ءُ بیھار داتگ اَنت۔
جارکش ءَ گْوشتگ کہ دومی اُرش ءَ سرمچاراں سیزدہ اگست ءِ روچ ءِ سَے ءَ ھاران شھر ءَ گزی دگ ءِ سر ءَ برجاھیں زورگریں پاکستانی پوج ءِ پانگس ءِ سر ءَ گوں گرنیڈ لانچراں اُرش کُرتگ۔ اُرش ءَ دژمنیں لشکر ءَ جانی ءُ مالی تاوان بیتگ۔
جارکش ءَ گْوشتگ سیمی اُرش ءَ سرمچاراں سیزدہ اگست ءِ روچ ءِ یک ءُ بیست ءَ پنجگور شھر ءَ کلم چاراہ ءَ برجاھیں پاکستانی پوج ءِ پانگس ءِ سر ءَ دستی بمب اُرشے کُرتگ۔ سرمچاراں ھما وھد ءَ اُرش کُرتگ وھدے دژمنیں پوج ءِ گاڑی اوشتوک بیتگ ءُ گاڑی ءِ دیم ءَ دو کارمند اوشتاتگ کہ دوئیں کارمند بمب ءِ زد ءَ اتکگ ءُ ٹپی بیتگ اَنت۔
جارکش ءَ دیمتر ءَ گْوشتگ کہ چارُمی اُرش ءَ سرمچاراں سیزدہ اگست ءَ شپ ءِ ھشت ءُ چل ءُ پنچ ءَ بارکان شھر ءَ درسرکاری وانگجاہ (گل پبلک گرامر ہائی سکول) ءِ میدان ءَ چاردہ اگست ءِ بابت ءَ برجم داشتگیں مراگش ءِ سر ءَ دستی بمب اُرشے کُرتگ۔
آئی ءَ گْوشتگ کہ بلوچ راج وتی دژمن ءَ شری ءِ سر ءَ زانت ءُ بلوچ راج گوں آجوئی زْرمبشت ءَ بندوک بیت ءُ دژمن ءِ دُرسیں میارباریانی بیر ءَ گیپت۔
جارکش ءَ گْوشتگ کہ بلوچستان لبریشن فرنٹ اُرشانی زمہ واری ءَ منّ ایت ءُ داں زورگپتیں بلوچستان ءِ آجوئی ءَ پوج ءُ آئی ءِ کمکارانی سر ءَ اُرش برجاہ بنت۔